ನಾಗೇಂದ್ರ ಕೋರ್ಟ್‌ನಿಂದ ಕ್ಲೀನ್‌ ಚಿಟ್‌ ಪಡೆಯಲಿ, ಬೇರೆ ಪರಿಶಿಷ್ಟ ಶಾಸಕರಿಗೆ ಸಚಿವ ಸ್ಥಾನ ನೀಡಿ: ಆರ್‌ ಅಶೋಕ

ಸಚಿವ ಬಿ.ನಾಗೇಂದ್ರ, ಇಡಿ ಮತ್ತು ಸಿಬಿಐ ತನಿಖೆಯಲ್ಲಿ ಕ್ಲೀನ್‌ ಚಿಟ್‌ ಪಡೆದಿಲ್ಲ. ಅವರು ಕನಿಷ್ಠ ಜನಪ್ರತಿನಿಧಿಗಳ ನ್ಯಾಯಾಲಯದಲ್ಲಾದರೂ ಕ್ಲೀನ್‌ ಚಿಟ್‌ ಪಡೆಯಲಿ. ಅಲ್ಲಿವರೆಗೆ ಸಚಿವ ಸ್ಥಾನದಲ್ಲಿ ಇರುವುದು ಬೇಡ ಎಂದು ಪ್ರತಿಪಕ್ಷ ನಾಯಕ ಆರ್‌ ಅಶೋಕ ಹೇಳಿದರು.

ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಜಾರಿ ನಿರ್ದೇಶನಾಲಯ ಹಾಗೂ ಸಿಬಿಐ ಐವತ್ತು ವರ್ಷಗಳಿಂದಲೂ ಇದೆ. ಆದರೆ ಸಚಿವ ಬಿ.ನಾಗೇಂದ್ರ ಇವುಗಳ ದಾಳಿ ರಾಜಕೀಯ ಪ್ರೇರಿತ ಎನ್ನುತ್ತಾರೆ. ಹಾಗಾದರೆ ವಾಲ್ಮೀಕಿ ಅಭಿವೃದ್ಧಿ ನಿಗಮದಲ್ಲಿ 187 ಕೋಟಿ ರೂ. ಹಗರಣ ಹೇಗೆ ನಡೆಯಿತು? ನಾಗೇಂದ್ರ ಅವರ ಬ್ಯಾಂಕ್‌ ಖಾತೆಗೆ ನೇರವಾಗಿ 1.2 ಕೋಟಿ ರೂ. ಜಮೆಯಾಗಿದೆ. ಅವರ ಸಂಬಂಧಿಕರ ಖಾತೆಗೆ ಹಣ ಜಮೆಯಾಗಿದೆ. ಸಿಬಿಐ ಚಾರ್ಜ್‌ ಶೀಟ್‌ನಲ್ಲಿ ನೋಡಿದರೆ ಅವರ ಸಂಬಂಧಿಕರು ಅದನ್ನು ಒಪ್ಪಿಕೊಂಡಿದ್ದಾರೆ. ನಿಗಮದ ಹಣ 600 ಖಾತೆಗಳಿಗೆ ಹೋಗಿದೆ ಎಂದರೆ ಅದಕ್ಕೆ ಸಚಿವರ ಸಹಮತ ಇದೆ ಎಂದೇ ಅರ್ಥ. ಸಚಿವರ ಸಹಾಯಕ ನಾಗರಾಜ್‌ ಅವರ ಖಾತೆಗೂ ಹಣ ಬಂದಿದೆ ಎಂದರು.

ಈ ಹಣ ಆಂಧ್ರಪ್ರದೇಶದ ಸಹಕಾರಿ ಬ್ಯಾಂಕ್‌ಗೆ ಹೋಗಿ ಬಳಿಕ ಬಳ್ಳಾರಿ ಜಿಲ್ಲೆಗೆ ಹೋಗಿದೆ. ರಾಜ್ಯದಲ್ಲಿ ಬೇರೆ ಯಾವ ಜಿಲ್ಲೆಗೂ ಆ ಹಣ ಹೋಗಿಲ್ಲ. ಇದು ಪೂರ್ವ ಯೋಜಿತ ಕಳ್ಳತನ. ಸಿಬಿಐ ಮೂರು ಚಾರ್ಜ್‌ಶೀಟ್‌ ನೀಡಿದ್ದು, ಅದರಲ್ಲಿ ಪ್ರಮುಖ ಆರೋಪಿ ಇವರೇ ಆಗಿದ್ದಾರೆ. ಮಾಜಿ ಸಿಎಂ ಸಿದ್ದರಾಮಯ್ಯ 89 ಕೋಟಿ ರೂ. ಅಕ್ರಮ ನಡೆದಿದೆ ಎಂದು ಸದನದಲ್ಲೇ ಒಪ್ಪಿಕೊಂಡಿದ್ದರು. ಎಸ್‌ಐಟಿ ರಚಿಸಿ ಕ್ಲೀನ್‌ ಚಿಟ್‌ ತೆಗೆದುಕೊಂಡಿದ್ದಾರೆ. ಆದರೆ ಉಳಿದ ಸಿಬಿಐ, ಜಾರಿ ನಿರ್ದೇಶನಾಲಯ ಕೂಡ ಕ್ಲೀನ್‌ ಚಿಟ್‌ ನೀಡಬೇಕಿದೆ. ಬಿಜೆಪಿ ಅವಧಿಯಲ್ಲಿ ಕೆ.ಎಸ್.ಈಶ್ವರಪ್ಪ ಅವರ ವಿರುದ್ಧ ಆರೋಪ ಬಂದಾಗ ತನಿಖೆ ನಡೆದಿತ್ತು. ಕ್ಲೀನ್‌ ಚಿಟ್‌ ಬಂದರೂ ಅವರನ್ನು ಸಚಿವರಾಗಿ ಮರು ನೇಮಕ ಮಾಡಲಿಲ್ಲ. ಜನಪ್ರತಿನಿಧಿ ನ್ಯಾಯಾಲಯದಲ್ಲಿ ಕ್ಲೀನ್‌ ಚಿಟ್‌ ತೆಗೆದುಕೊಂಡು ಬಂದು ಸಚಿವರಾಗಿ ನೇಮಕವಾದರೆ ನಮ್ಮ ಅಭ್ಯಂತರವಿಲ್ಲ ಎಂದು ಹೇಳಿದರು.

ಇದು ಪರಿಶಿಷ್ಟರ ಹಣವಾಗಿದ್ದು, ಇದನ್ನು ಉಳಿಸಬೇಕಿದೆ. ಇದು ನೇರವಾಗಿ ಖಜಾನೆಗೆ ಕೈ ಹಾಕಿ ಕದ್ದಿರುವ ಪ್ರಕರಣ. ಇದು ಕೇವಲ ಒಬ್ಬ ನಾಗೇಂದ್ರರ ಪ್ರಶ್ನೆಯಲ್ಲ. ಇದು ಲೂಟಿ ಮಾಡಿದವರ ವಿರುದ್ಧ ಕ್ರಮ ಕೈಗೊಳ್ಳಬೇಕಾದ ಪ್ರಕರಣ. ನಾಗೇಂದ್ರ ಅವರನ್ನು ಬಿಟ್ಟು ಬೇರೆ ದಲಿತರನ್ನೇ ಸಚಿವರಾಗಿ ನೇಮಕ ಮಾಡಲಿ ಎಂದರು.

ತನಿಖೆ ಮಾಡದೆಯೇ ನಾಗೇಂದ್ರ ಜೈಲಿಗೆ ಹೋಗಲು ಹೇಗೆ ಸಾಧ್ಯ? ತನಿಖೆಯಾಗದೇ ಇದ್ದಲ್ಲಿ 9,000 ಪುಟಗಳ ಚಾರ್ಜ್‌ಶೀಟ್‌ ಸಲ್ಲಿಕೆ ಮಾಡಲು ಹೇಗೆ ಸಾಧ್ಯವಾಗುತ್ತದೆ? ಈಶ್ವರಪ್ಪ ಅವರ ಘಟನೆ ನಡೆದಾಗಲೂ ಕಾಂಗ್ರೆಸ್‌ನವರ ವಿರುದ್ಧ ತನಿಖೆ ನಡೆಯುತ್ತಿತ್ತು. ಆಗ ಈಶ್ವರಪ್ಪ ಅವರ ರಾಜೀನಾಮೆ ಪಡೆಯಲಾಗಿತ್ತು. ಆದರೆ ಈಶ್ವರಪ್ಪ ಎಂದಿಗೂ ಚೆಕ್‌ನಲ್ಲಿ ಹಣ ಪಡೆದಿರಲಿಲ್ಲ. ನಾಗೇಂದ್ರ ನೇರವಾಗಿ ಚೆಕ್‌ನಲ್ಲೇ ಹಣ ಪಡೆದಿದ್ದಾರೆ. ಹಿಂದೆ ಹೋರಾಟ ಮಾಡಿ ಅವರು ರಾಜೀನಾಮೆ ನೀಡುವಂತೆ ಮಾಡಿದ್ದೆವು. ಈಗಲೂ ಅದನ್ನೇ ಮಾಡುತ್ತೇವೆ. ಬೇಗ ರಾಜೀನಾಮೆ ನೀಡಿದರೆ, ಬರಗಾಲ, ಬಿಡದಿ ಟೌನ್‌ಶಿಪ್‌, ನೈಸ್‌, ಕಾವೇರಿ ಮೊದಲಾದ ವಿಷಯಗಳ ಬಗ್ಗೆ ಚರ್ಚೆ ಮಾಡಬಹುದು. ಸಿಎಂ ಡಿ.ಕೆ.ಶಿವಕುಮಾರ್‌ ಭ್ರಷ್ಟಾಚಾರ ರಹಿತ ಎಂದು ಮಾತಾಡುತ್ತಾರೆ. ಅವರು ಮೊದಲು ಸಚಿವರ ರಾಜೀನಾಮೆ ಪಡೆದು ಚರ್ಚೆಗೆ ಅವಕಾಶ ಮಾಡುತ್ತಾರೆಂಬ ವಿಶ್ವಾಸವಿದೆ ಎಂದು ತಿಳಿಸಿದರು.

ಚಾಮರಾಜನಗರದಲ್ಲಿ ಸ್ಥಳೀಯರಾದ ಮೂವರನ್ನು ಎನ್‌ಕೌಂಟರ್‌ ಮಾಡಿರುವುದರ ವಿರುದ್ಧ ತಮಿಳುನಾಡು ಸರ್ಕಾರ ನಿರ್ಣಯ ಕೈಗೊಂಡಿದೆ. ಇದು ರಾಜ್ಯಕ್ಕೆ ಆಗಿರುವ ಅಪಮಾನ. ರಾಜ್ಯದ ಸಮಸ್ಯೆಯನ್ನು ಇಲ್ಲೇ ಪರಿಹಾರ ಮಾಡಬೇಕಿತ್ತು. ಅಲ್ಲಿ ಪರಿಹಾರ ಕೊಡುವುದು ಒಳ್ಳೆಯ ಸಂಸ್ಕೃತಿ ಅಲ್ಲ. ಇದನ್ನು ಕನ್ನಡ-ತಮಿಳು ಭಾಷೆಯ ಸಂಘರ್ಷ ಮಾಡಲಾಗುತ್ತಿದೆ. ಈ ಪ್ರಕರಣದಲ್ಲಿ ಅರಣ್ಯ ಇಲಾಖೆ ತಪ್ಪು ಮಾಡಿರುವುದು ಸ್ಪಷ್ಟವಾಗಿದೆ. ರಾಜ್ಯ ಸರ್ಕಾರ ಸರಿಯಾಗಿ ತನಿಖೆ ಮಾಡಿದ್ದರೆ ಈ ಸಮಸ್ಯೆ ಉಂಟಾಗುತ್ತಿರಲಿಲ್ಲ ಎಂದರು.