Read E-paper
ಚೆನ್ನೈನ ನಿವಾಸದಲ್ಲಿ ಸಹಿ ಮಾಡಿ ಇಟ್ಟಿದ್ದ ಖಾಲಿ ಚೆಕ್ಗಳನ್ನು ನನ್ನ ಗಮನಕ್ಕೆ ಬಾರದಂತೆ ತೆಗೆದುಕೊಂಡು ೪೬ ಕೋಟಿ ರೂ ಪಡೆಯುವ ಪ್ರಯತ್ನ ನಡೆಸಿರುವುದಾಗಿ ನಟಿ ಅಂಬಿಕಾ ವಿರುದ್ಧ ಸೋದರಿ ರಾಧಾ ದೂರು ದಾಖಲಿಸಿದ್ದಾರೆ.
ಅಂಬಿಕಾ ಮತ್ತು ಸೋದರ ಮಲ್ಲಿಕಾರ್ಜುನ ಕುಂಜನ್ ನಾಯರ್ ಅವರ ಹೆಸರನ್ನು ದೂರಲ್ಲಿ ಉಲ್ಲೇಖಿಸಿ ಗ್ರೇಟರ್ ಚೆನ್ನೈ ಪೊಲೀಸ್ ಆಯುಕ್ತರಿಗೆ ಸಲ್ಲಿಸಲಾಗಿದೆ. ವ್ಯವಹಾರ ಸಂಬಂಧಿತ ವೆಚ್ಚಗಳಿಗಾಗಿ ಐಡಿಬಿಐ ಬ್ಯಾಂಕ್ನಲ್ಲಿ ಚಾಲ್ತಿ ಖಾತೆಯನ್ನು ಹೊಂದಿದ್ದು, ಚೆನ್ನೈ ನಿವಾಸದಲ್ಲಿ ಸಹಿ ಮಾಡಿದ ಕೆಲವು ಖಾಲಿ ಚೆಕ್ಗಳನ್ನು ಇರಿಸಿದ್ದೆ. ಪ್ರಯಾಣದಲ್ಲಿ ಇರುವಾಗ ವೇತನ, ಉಪಯುಕ್ತ ಸೇವೆಗಳ ಬಿಲ್ಗಳು, ತೆರಿಗೆಗಳು ಮತ್ತು ತೋಟದ ನಿರ್ವಹಣೆಯಂತಹ ದಿನನಿತ್ಯದ ಪಾವತಿಗಳಿಗಾಗಿ ಈ ಚೆಕ್ಗಳನ್ನು ಇರಿಸಲಾಗಿತ್ತು ಎಂದು ರಾಧಾ ತಿಳಿಸಿದ್ದಾರೆ.
ಜನವರಿ 2025 ರಲ್ಲಿ ವ್ಯವಹಾರದ ಹೆಸರನ್ನು ಬದಲಾಯಿಸಿದ ನಂತರ, ಹೊಸ ಚೆಕ್ ಬುಕ್ ಸಿಕ್ಕಿತು. ಹಿಂದಿನ ಚೆಕ್ ಬುಕ್ ಬಳಕೆಯನ್ನು ನಿಲ್ಲಿಸಿದ್ದೆ. ಮನೆಯಲ್ಲಿದ್ದ ಹಳೆಯ ಚೆಕ್ಗಳ ಬಗ್ಗೆ ತಾವು ಮರೆತಿದ್ದೆ. ಸೆಪ್ಟೆಂಬರ್ 17 ರಂದು ಬ್ಯಾಂಕ್ ಅಧಿಕಾರಿಗಳು ಸಂಪರ್ಕಿಸಿ ಹಳೆಯ ಐದು ಚೆಕ್ಗಳನ್ನು ಅಂಬಿಕಾ ಅವರ ಹೆಸರಿನಲ್ಲಿ ಒಟ್ಟು 46 ಕೋಟಿ ರೂ. ಪಡೆಯಲು ಬ್ಯಾಂಕ್ಗೆ ಸಲ್ಲಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಅಂಬಿಕಾ ಅವರಿಗೆ ತಾವು ಚೆಕ್ಗಳನ್ನು ನೀಡಿರಲಿಲ್ಲ ಅಥವಾ ಅಂತಹ ಪಾವತಿಗಳ ಯಾವುದೇ ವ್ಯವಹಾರ ಆಕೆಯೊಂದಿಗೆ ನಡೆಸಿಲ್ಲ ಎಂದು ಹೇಳಿರುವ ರಾಧಾ, ತಕ್ಷಣ ಪಾವತಿಯನ್ನು ತಡೆಯುವಂತೆ ಬ್ಯಾಂಕ್ಗೆ ಸೂಚಿಸಿದ್ದಾರೆ. ಆ ಚೆಕ್ಗಳನ್ನು ಸಹೋದರ ಮಲ್ಲಿಕಾರ್ಜುನ ಭರ್ತಿ ಮಾಡಿದ್ದಾರೆ ಎಂದು ಆರೋಪಿಸಿದ್ದಾರೆ. ಕಾನೂನುಬಾಹಿರ ಆರ್ಥಿಕ ಲಾಭಕ್ಕಾಗಿ ಆ ದಾಖಲೆಗಳನ್ನು ಬಳಸಲು ಅಂಬಿಕಾ ಮತ್ತು ಮಲ್ಲಿಕಾರ್ಜುನ ಒಟ್ಟಾಗಿ ಕೆಲಸ ಮಾಡಿದ್ದಾರೆ ಎಂದು ಹೇಳಿಕೊಂಡಿದ್ದಾರೆ. ತಾವು ಚೆನ್ನೈನಿಂದ ಹೊರಗಿದ್ದಾಗ ತಮ್ಮ ಕೊಠಡಿಯಿಂದ ಆ ಚೆಕ್ಗಳನ್ನು ಪಡೆಯಲಾಗಿದೆ ಎಂದು ರಾಧಾ ಆರೋಪಿಸಿದ್ದಾರೆ.
ಒಂದೂವರೆ ವರ್ಷದಿಂದ ಕುಟುಂಬದಿಂದ ಬಂದ ನ್ನ ಆಸ್ತಿ ಕಡೆಗೆ ನನ್ನ ಪ್ರವೇಶ ತಡೆಯಲಾಗಿದೆ ಎಂದು ರಾಧಾ ಆರೋಪಿಸಿದ್ದಾರೆ. ಅಲ್ಲಿ ಬೆಲೆಬಾಳುವ ವಸ್ತುಗಳು, ಆಭರಣಗಳು, ಆಸ್ತಿ ದಾಖಲೆಗಳು ಮತ್ತು ಇತರ ದಾಖಲೆಗಳನ್ನು ಇಡಲಾಗಿದೆ ಎಂದು ಹೇಳಿದ್ದಾರೆ. ಆರೋಪಗಳ ಬಗ್ಗೆ ತನಿಖೆ ನಡೆಸಿ ಆರೋಪ ಸಾಬೀತಾದರೆ ಕ್ರಿಮಿನಲ್ ಕ್ರಮ ಕೈಗೊಳ್ಳುವಂತೆ ರಾಧಾ ಪೊಲೀಸರಿಗೆ ಮನವಿ ಮಾಡಿದ್ದಾರೆ.
ರಾಧಾ ಅವರ ಅಕ್ಕ ಅಂಬಿಕಾ ಮಲಯಾಳಂ, ತಮಿಳು ಮತ್ತು ಕನ್ನಡ ಚಿತ್ರರಂಗದಲ್ಲಿ ಪ್ರಮುಖ ನಟಿಯಾಗಿ ಹೆಸರುವಾಸಿಯಾಗಿದ್ದರು. ಕನ್ನಡದಲ್ಲಿ ಅಂಬರೀಶ್, ರವಿಚಂದ್ರನ್, ಸುದೀಪ್ ಮತ್ತಿತರ ನಟರ ಜೊತೆಗೆ ನಟಿಸಿದ್ದಾರೆ.
