ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒ ಕಮಾಲ್: ಡಾಲರ್ ಎದುರು ಭರ್ಜರಿ ಚೇತರಿಕೆ ಕಂಡ ರೂಪಾಯಿ ಮೌಲ್ಯ

ಉದಯಕಾಲ ನ್ಯೂಸ್, ಮುಂಬೈ: ದೇಶದ ಷೇರು ಮಾರುಕಟ್ಟೆಯಲ್ಲಿ ಸಾರ್ವಕಾಲಿಕ ಸಂಚಲನ ಮೂಡಿಸಿರುವ ರಿಲಯನ್ಸ್ ಇಂಡಸ್ಟ್ರೀಸ್ ಬೆಂಬಲಿತ ‘ಜಿಯೋ ಪ್ಲಾಟ್‌ಫಾರ್ಮ್ಸ್’ ಐಪಿಒ ಬುಧವಾರ ಅಧಿಕೃತವಾಗಿ ಸಾರ್ವಜನಿಕ ಚಂದಾದಾರಿಕೆಗೆ ಮುಕ್ತಗೊಂಡಿದೆ. ಬರೋಬ್ಬರಿ ₹30,213 ಕೋಟಿ ಮೊತ್ತದೊಂದಿಗೆ ದೇಶದ ಸಾರ್ವಕಾಲಿಕ ಅತಿ ದೊಡ್ಡ ಐಪಿಒಗಳಲ್ಲಿ ಒಂದಾಗಿರುವ ಈ ಆರಂಭಿಕ ಸಾರ್ವಜನಿಕ ಕೊಡುಗೆಯ ಭರ್ಜರಿ ಆಗಮನದಿಂದಾಗಿ, ವಿದೇಶಿ ಬಂಡವಾಳ ಹರಿವು ಹೆಚ್ಚಾಗಿ ಅಮೆರಿಕನ್ ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯವು ಗಮನಾರ್ಹ ಏರಿಕೆ ಕಂಡಿದೆ.

ರೂಪಾಯಿ ಮೌಲ್ಯ ಬಲಗೊಳ್ಳಲು ಪ್ರಮುಖ ಕಾರಣ

ಬುಧವಾರದ ಆರಂಭಿಕ ವಹಿವಾಟಿನಲ್ಲಿ ಅಮೆರಿಕನ್ ಡಾಲರ್ ಎದುರು ಭಾರತೀಯ ರೂಪಾಯಿ ಮೌಲ್ಯವು ಬರೋಬ್ಬರಿ 29 ಪೈಸೆ ಬಲಗೊಂಡು 94.62 ಕ್ಕೆ ತಲುಪಿದೆ. ಇಂಟರ್‌ಬ್ಯಾಂಕ್ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ 94.78ರಲ್ಲಿ ಆರಂಭವಾದ ರೂಪಾಯಿ, ಜಿಯೋ ಐಪಿಒದ ಅಬ್ಬರದಿಂದಾಗಿ ದಿನದ ವಹಿವಾಟಿನಲ್ಲಿ ಮತ್ತಷ್ಟು ಚೇತರಿಕೆ ಕಂಡಿತು. (ಸೋಮವಾರ ಮಾರುಕಟ್ಟೆ ಮುಕ್ತಾಯದ ವೇಳೆ ರೂಪಾಯಿ ಮೌಲ್ಯ 94.91 ಆಗಿತ್ತು, ಮಂಗಳವಾರ ದಸರಾ ಹಬ್ಬದ ನಿಮಿತ್ತ ಮಾರುಕಟ್ಟೆ ರಜೆ ಇತ್ತು).

ವಿದೇಶಿ ಸಾಂಸ್ಥಿಕ ಹೂಡಿಕೆದಾರರಿಂದ  ಡಾಲರ್ ಮಾರಾಟ

ಜಿಯೋ ಐಪಿಒದಲ್ಲಿ ಬಂಡವಾಳ ಹೂಡಿಕೆ ಮಾಡಲು ಮತ್ತು ಹಂಚಿಕೆಗೆ (Allotment) ಬೇಕಾದ ಬೃಹತ್ ಹಣವನ್ನು ಹೊಂದಿಸಲು ವಿದೇಶಿ ಹೂಡಿಕೆದಾರರು ಡಾಲರ್‌ಗಳನ್ನು ಮಾರಾಟ ಮಾಡಿ ರೂಪಾಯಿಗಳನ್ನು ಖರೀದಿಸುತ್ತಿದ್ದಾರೆ.
ಹೂಡಿಕೆದಾರರು ಹೆಚ್ಚಾಗಿ ‘ಸೆಲ್/ಬೈ ಸ್ವಾಪ್’ ತಂತ್ರಜ್ಞಾನ ಬಳಸುತ್ತಿದ್ದು, ಸ್ಪಾಟ್ ಮಾರುಕಟ್ಟೆಯಲ್ಲಿ ಡಾಲರ್ ಮಾರಿ ರೂಪಾಯಿ ಪಡೆದು, ಒಂದು ವಾರದೊಳಗೆ ಮರುಖರೀದಿಸುವ ಒಪ್ಪಂದ ಮಾಡಿಕೊಳ್ಳುತ್ತಿದ್ದಾರೆ. ಇದರಿಂದ ದೇಶೀಯ ಮಾರುಕಟ್ಟೆಯಲ್ಲಿ ತಾತ್ಕಾಲಿಕವಾಗಿ ಡಾಲರ್ ಪೂರೈಕೆ ಹೆಚ್ಚಾಗಿ, ರೂಪಾಯಿಗೆ ಬಲವಾದ ಬೆಂಬಲ ದೊರೆಯುತ್ತಿದೆ.

ಜಿಯೋ ಐಪಿಒ  ಈ ಐತಿಹಾಸಿಕ ಆರಂಭವು ಕೇವಲ ರಿಲಯನ್ಸ್ ಷೇರು ಮಾರುಕಟ್ಟೆಯನ್ನಷ್ಟೇ ಅಲ್ಲದೆ, ದೇಶದ ವಿದೇಶಿ ವಿನಿಮಯ ಮಾರುಕಟ್ಟೆಯ ಮೇಲೂ ಸಕಾರಾತ್ಮಕ ಪ್ರಭಾವ ಬೀರಿದ್ದು, ಮುಂಬರುವ ದಿನಗಳಲ್ಲಿ ವಿದೇಶಿ ನೇರ ಹೂಡಿಕೆ (FDI) ಮತ್ತಷ್ಟು ಹೆಚ್ಚಾಗುವ ನಿರೀಕ್ಷೆಯಿದೆ ಎಂದು ಮಾರುಕಟ್ಟೆ ತಜ್ಞರು ವಿಶ್ಲೇಷಿಸಿದ್ದಾರೆ.
#JioIPO #IndianRupee #RelianceIndustries #StockMarketIndia #UdayakalaNews #BusinessNews #ForexMarket