ಪರಮಾಣು ಯೋಜನೆ ಮಾಹಿತಿಗೆ 188 ಕೋಟಿ ರೂ. ಬಹುಮಾನ ಘೋಷಿಸಿದ ಅಮೆರಿಕ

ಉದಯಕಾಲ ನ್ಯೂಸ್, ನವದೆಹಲಿ: ಇರಾನ್‌ನ ರಹಸ್ಯ ಪರಮಾಣು ಯೋಜನೆ ಹಾಗೂ ಅದಕ್ಕೆ ಸಂಬಂಧಿಸಿದ ಮಹತ್ವದ ಸುಳಿವುಗಳನ್ನು ನೀಡುವವರಿಗೆ ಅಮೆರಿಕ ಸರ್ಕಾರವು ಬರೋಬ್ಬರಿ 20 ಮಿಲಿಯನ್ ಡಾಲರ್ ಅಂದರೆ ಭಾರತೀಯ ರೂಪಾಯಿಗಳಲ್ಲಿ ಸುಮಾರು 188 ಕೋಟಿ ರೂ.ಗೂ ಅಧಿಕ ಭರ್ಜರಿ ನಗದು ಬಹುಮಾನ ಘೋಷಿಸಿದೆ. ಇದರೊಂದಿಗೆ ಮಾಹಿತಿ ನೀಡುವ ವ್ಯಕ್ತಿಗಳಿಗೆ ಸಂಪೂರ್ಣ ರಕ್ಷಣೆ ನೀಡಿ, ಸುರಕ್ಷಿತ ಸ್ಥಳಕ್ಕೆ ಸ್ಥಳಾಂತರಿಸುವ ವಿಶೇಷ ಭರವಸೆಯನ್ನೂ ಅಮೆರಿಕ ನೀಡಿದೆ.

ಅಮೆರಿಕದ ಸ್ಟೇಟ್ ಡಿಪಾರ್ಟ್‌ಮೆಂಟ್‌ನ ‘ರಿವಾರ್ಡ್ಸ್ ಫಾರ್ ಜಸ್ಟಿಸ್’ (ನ್ಯಾಯಕ್ಕಾಗಿ ಬಹುಮಾನ) ಕಾರ್ಯಕ್ರಮದ ಮೂಲಕ ಈ ಮಹತ್ವದ ಘೋಷಣೆ ಹೊರಡಿಸಲಾಗಿದೆ.

ಪರಮಾಣು ಸೌಲಭ್ಯಗಳು ಹಾಗೂ ವಿಜ್ಞಾನಿಗಳ ಚಲನವಲನಗಳ ಮಾಹಿತಿಗೆ ಕೋರಿಕೆ

ಅಮೆರಿಕದ ಸೆಂಟ್ರಲ್ ಕಮಾಂಡ್ ಹಾಗೂ ವಿದೇಶಾಂಗ ಇಲಾಖೆಯ ಮಾಹಿತಿಯ ಪ್ರಕಾರ, ಇರಾನ್‌ನ ಪರಮಾಣು ಸೌಲಭ್ಯಗಳು, ಅತ್ಯಾಧುನಿಕ ಉಪಕರಣಗಳು, ಪರಮಾಣು ವಿಜ್ಞಾನಿಗಳು ಸೇರಿದಂತೆ ಅದಕ್ಕೆ ಸಂಬಂಧಿಸಿದ ಪ್ರಮುಖ ಸಿಬ್ಬಂದಿ ಹಾಗೂ ಇವರ ಚಲನವಲನಗಳ ಕುರಿತು ನಿಖರವಾದ ಗುಪ್ತಚರ ಮಾಹಿತಿಯನ್ನು ಅಮೆರಿಕ ಅಪೇಕ್ಷಿಸಿದೆ.

ಇರಾನ್‌ನ ಪರಮಾಣು ಕಾರ್ಯಕ್ರಮದ ಜಾಲ, ಪ್ರಮುಖ ಯೋಜನೆಗಳು ಮತ್ತು ವೈಜ್ಞಾನಿಕ ಸಮುದಾಯದ ಚಟುವಟಿಕೆಗಳ ಬಗ್ಗೆ ಯಾವುದೇ ವ್ಯಕ್ತಿ ಅಧಿಕೃತ ಅಥವಾ ನಿಖರ ಸುಳಿವು ನೀಡಿದರೆ, ಅವರಿಗೆ ರಿವಾರ್ಡ್ಸ್ ಫಾರ್ ಜಸ್ಟಿಸ್ ಸಂಸ್ಥೆಯಿಂದ 20 ಮಿಲಿಯನ್ ಡಾಲರ್ ಬಹುಮಾನದ ಹಣವನ್ನು ನೇರವಾಗಿ ತಲುಪಿಸಲಾಗುವುದು ಎಂದು ಸ್ಪಷ್ಟಪಡಿಸಲಾಗಿದೆ. ಅಲ್ಲದೆ, ಮಾಹಿತಿ ನೀಡಿದವರ ಜೀವಕ್ಕೆ ಅಪಾಯವಿರುವ ಹಿನ್ನೆಲೆಯಲ್ಲಿ ಅವರನ್ನು ಮತ್ತು ಅವರ ಕುಟುಂಬವನ್ನು ಬೇರೆಡೆಗೆ ಸುರಕ್ಷಿತವಾಗಿ ಸ್ಥಳಾಂತರಿಸುವ ಜವಾಬ್ದಾರಿಯನ್ನೂ ಅಮೆರಿಕ ಸರ್ಕಾರವೇ ವಹಿಸಿಕೊಳ್ಳಲಿದೆ.

ಯುರೇನಿಯಂ ಸಂಸ್ಕರಣೆ ಆತಂಕ; ಅಮೆರಿಕ-ಇರಾನ್ ಉದ್ವಿಗ್ನತೆ

ಅಂತಾರಾಷ್ಟ್ರೀಯ ಪರಮಾಣು ಶಕ್ತಿ ಸಂಸ್ಥೆಯ ಸುರಕ್ಷತಾ ಮಾನದಂಡಗಳನ್ನು ಹಾಗೂ ನಿಯಮಗಳನ್ನು ಪಾಲಿಸುವಲ್ಲಿ ಇರಾನ್ ನಿರಂತರವಾಗಿ ಅಸಹಕಾರ ತೋರುತ್ತಿದೆ ಎಂದು ಅಮೆರಿಕದ ವಿದೇಶಾಂಗ ಇಲಾಖೆ ತೀವ್ರ ಕಳವಳ ವ್ಯಕ್ತಪಡಿಸಿದೆ. ಇದರಿಂದಾಗಿ ಇರಾನ್‌ನ ಸೆಂಟ್ರಿಫ್ಯೂಜ್‌ಗಳ ಮೇಲೆ ನಿಗಾ ಇರಿಸುವ ಸಂಸ್ಥೆಯ ಸಾಮರ್ಥ್ಯವು ತೀವ್ರವಾಗಿ ಸೀಮಿತಗೊಂಡಿದೆ.

ಇರಾನ್ ಈಗಾಗಲೇ ಯುರೇನಿಯಂ ಅನ್ನು ಶೇಕಡಾ 60ರಷ್ಟು ಹೆಚ್ಚಿನ ಮಟ್ಟದಲ್ಲಿ ಸಂಸ್ಕರಿಸುತ್ತಿದ್ದು, ಪರಮಾಣು ಶಸ್ತ್ರಾಸ್ತ್ರಗಳ ತಯಾರಿಕೆಗೆ ಕಡ್ಡಾಯವಾಗಿ ಬೇಕಾಗುವ ಶೇ. 90ರಷ್ಟು ಶುದ್ಧತೆಯ ಮಟ್ಟವನ್ನು ತಲುಪಲು ಇರಾನ್ ಕೇವಲ ಒಂದು ಸಣ್ಣ ತಾಂತ್ರಿಕ ಹಂತದಿಂದ ಮಾತ್ರ ದೂರದಲ್ಲಿದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ. ಪರಮಾಣು ಅಸ್ತ್ರಗಳನ್ನು ಅಧಿಕೃತವಾಗಿ ಹೊಂದಿರದ ರಾಷ್ಟ್ರಗಳ ಪೈಕಿ ಇಷ್ಟೊಂದು ದೊಡ್ಡ ಪ್ರಮಾಣದಲ್ಲಿ ಯುರೇನಿಯಂ ಸಂಸ್ಕರಿಸುತ್ತಿರುವ ಏಕೈಕ ದೇಶ ಇರಾನ್ ಆಗಿದೆ. ಈ ಹಿನ್ನೆಲೆಯಲ್ಲಿ ಮುನ್ನೆಚ್ಚರಿಕಾ ಕ್ರಮವಾಗಿ ಅಮೆರಿಕ ಈ ಕಠಿಣ ಹಾಗೂ ನಿರ್ಣಾಯಕ ಹೆಜ್ಜೆ ಇಟ್ಟಿದೆ.

ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್‌ನ ಪರಮಾಣು ಸಾಮರ್ಥ್ಯಗಳು ನಾಶವಾಗಿವೆ ಎಂದು ಹೇಳುತ್ತಿದ್ದರೂ, ಮತ್ತೊಂದೆಡೆ ಈ ಬೃಹತ್ ಬಹುಮಾನ ಘೋಷಣೆಯಾಗಿರುವುದು ಜಾಗತಿಕ ರಾಜಕಾರಣದಲ್ಲಿ ತೀವ್ರ ಸಂಚಲನ ಮೂಡಿಸಿದೆ.

#USANews #IranNuclearProgram #RewardsForJustice #CENTCOM #DonaldTrump #GlobalNews #UdayakalaNews #NuclearThreat