ನವೆಂಬರ್ 1ರಿಂದ ಹೊಸ ಟೆಲಿಕಾಂ ರೂಲ್ಸ್: ಪ್ರತಿ ಮೊಬೈಲ್‌ನಲ್ಲೂ ಫ್ರೀ ಕಾಲರ್ ನೇಮ್ ಡಿಸ್ಪ್ಲೇ ಸೇವೆ ಲಭ್ಯ!

ಉದಯಕಾಲ ನ್ಯೂಸ್, ಬೆಂಗಳೂರು/ನವದೆಹಲಿ: ಮೊಬೈಲ್ ಬಳಕೆದಾರರಿಗೆ ಕಾಡುತ್ತಿರುವ ನಕಲಿ ಕರೆಗಳು (Spam Calls) ಹಾಗೂ ಸೈಬರ್ ವಂಚನೆಗಳಿಗೆ ಬ್ರೇಕ್ ಹಾಕಲು ಕೇಂದ್ರ ಸರ್ಕಾರವು ಅತ್ಯಂತ ಮಹತ್ವದ ಮತ್ತು ಐತಿಹಾಸಿಕ ತೀರ್ಮಾನವೊಂದನ್ನು ಕೈಗೊಂಡಿದೆ. ಮುಂಬರುವ ನವೆಂಬರ್ 1, 2026 ರಿಂದ ಅಂದರೆ ನಮ್ಮ ಹೆಮ್ಮೆಯ ಕರ್ನಾಟಕ ರಾಜ್ಯೋತ್ಸವ ದಿನದಿಂದ ಜಾರಿಗೆ ಬರುವಂತೆ ದೇಶದ ಎಲ್ಲಾ ಟೆಲಿಕಾಂ ಆಪರೇಟರ್‌ಗಳು ಕಡ್ಡಾಯವಾಗಿ ‘ಕಾಲಿಂಗ್ ನೇಮ್ ಪ್ರೆಸೆಂಟೇಶನ್’ (CNAP – Calling Name Presentation) ಸೇವೆಯನ್ನು ಜಾರಿಗೊಳಿಸಬೇಕು ಎಂದು ದೂರಸಂಪರ್ಕ ಇಲಾಖೆ ಕಟ್ಟುನಿಟ್ಟಿನ ಆದೇಶ ಹೊರಡಿಸಿದೆ.

ಈ ಹೊಸ ವ್ಯವಸ್ಥೆಯಿಂದಾಗಿ, ಇನ್ನು ಮುಂದೆ ನಿಮ್ಮ ಮೊಬೈಲ್‌ಗೆ ಯಾವುದೇ ಅಪರಿಚಿತ ಸಂಖ್ಯೆಯಿಂದ ಇನ್ಕಮಿಂಗ್ ಕಾಲ್ ಬಂದರೆ, ಕೇವಲ ಫೋನ್ ನಂಬರ್ ಮಾತ್ರವಲ್ಲದೆ ಆ ಕರೆ ಮಾಡುತ್ತಿರುವ **ವ್ಯಕ್ತಿಯ ಅಸಲಿ ಹೆಸರೂ ಸಹ ನೇರವಾಗಿ ಮೊಬೈಲ್ ಸ್ಕ್ರೀನ್ ಮೇಲೆ ಮೂಡಲಿದೆ.

ಟ್ರೂಕಾಲರ್ ಬೇಕಾಗಿಲ್ಲ!
ಪ್ರಸ್ತುತ ಅಪರಿಚಿತ ನಂಬರ್‌ಗಳಿಂದ ಕರೆ ಬಂದಾಗ ಆ ವ್ಯಕ್ತಿ ಯಾರು ಎಂದು ತಿಳಿಯಲು ಜನರು ‘ಟ್ರೂಕಾಲರ್’ (Truecaller) ಅಥವಾ ಈ ರೀತಿಯ ಥರ್ಡ್ ಪಾರ್ಟಿ ಆಪ್‌ಗಳನ್ನು ಅವಲಂಬಿಸಬೇಕಿದೆ. ಆದರೆ, ನವೆಂಬರ್ 1ರಿಂದ ಜಾರಿಗೆ ಬರುವ ಈ ಹೊಸ ನಿಯಮದ ಮೂಲಕ ಈ ಸೇವೆ ಯಾವುದೇ ಥರ್ಡ್ ಪಾರ್ಟಿ ಆಪ್ ಇಲ್ಲದೆ, ನೇರವಾಗಿ ಟೆಲಿಕಾಂ ನೆಟ್‌ವರ್ಕ್ ಮೂಲಕ ಪ್ರತಿ ಮೊಬೈಲ್‌ನಲ್ಲೂ ಸ್ವಯಂಚಾಲಿತವಾಗಿ ಲಭ್ಯವಾಗಲಿದೆ. ವಿಶೇಷವೆಂದರೆ, ಗ್ರಾಹಕರು ಇದರ ಬಳಕೆಗೆ ಯಾವುದೇ ಪ್ರತ್ಯೇಕ ಅರ್ಜಿ ಸಲ್ಲಿಸುವ ಅಥವಾ ಶುಲ್ಕ ಪಾವತಿಸುವ ಅಗತ್ಯವಿರುವುದಿಲ್ಲ. ಸದ್ಯ ಟೆಲಿಕಾಂ ಕಂಪನಿಗಳು 4G ಮತ್ತು ಅದಕ್ಕಿಂತ ಹೆಚ್ಚಿನ ತಂತ್ರಜ್ಞಾನದ ವೈರ್‌ಲೆಸ್ ನೆಟ್‌ವರ್ಕ್‌ಗಳಲ್ಲಿ ಇದರ ಯಶಸ್ವಿ ಪ್ರಯೋಗಗಳನ್ನು ನಡೆಸಿವೆ.

ಈ ಹೊಸ ವ್ಯವಸ್ಥೆ ಕೆಲಸ ಮಾಡುವುದು ಹೇಗೆ?

ಈ ಹಿಂದೆ ಮೊಬೈಲ್ ಸ್ಕ್ರೀನ್ ಮೇಲೆ ಕೇವಲ ಫೋನ್ ನಂಬರ್ ಮಾತ್ರ ತೋರಿಸುವ ‘ಕಾಲಿಂಗ್ ಲೈನ್ ಐಡೆಂಟಿಫಿಕೇಶನ್’ (CLI) ವ್ಯವಸ್ಥೆ ಇತ್ತು. ಆದರೆ ಹೊಸ ಸಿಎನ್‌ಎಪಿ (CNAP) ನಿಯಮದ ಪ್ರಕಾರ ಇದು ಎರಡು ಪ್ರಮುಖ ಹಂತಗಳಲ್ಲಿ ಕಾರ್ಯನಿರ್ವಹಿಸುತ್ತದೆ:

ನಿಮ್ಮ ಮೊಬೈಲ್‌ನಲ್ಲಿ ಆ ನಂಬರ್ ಮೊದಲೇ ಸೇವ್ ಆಗಿದ್ದರೆ, ನೀವು ಯಾವ ಹೆಸರಿನಲ್ಲಿ ಸೇವ್ ಮಾಡಿದ್ದೀರೋ ಅದೇ ಹೆಸರು ಸ್ಕ್ರೀನ್ ಮೇಲೆ ಕಾಣಿಸುತ್ತದೆ.
ಒಂದು ವೇಳೆ ನಂಬರ್ ನಿಮ್ಮ ಫೋನ್‌ನಲ್ಲಿ ಸೇವ್ ಆಗಿಲ್ಲದಿದ್ದರೂ, ಆ ವ್ಯಕ್ತಿಯು ಸಿಮ್ ಕಾರ್ಡ್ ಖರೀದಿಸುವಾಗ ಟೆಲಿಕಾಂ ಆಪರೇಟರ್‌ಗಳ ಅಧಿಕೃತ ಡೇಟಾಬೇಸ್‌ನಲ್ಲಿ ನೋಂದಾಯಿಸಿರುವ ಅಸಲಿ ಹೆಸರು ಮೊಬೈಲ್ ಸ್ಕ್ರೀನ್ ಮೇಲೆ ಪ್ರದರ್ಶನಗೊಳ್ಳುತ್ತದೆ.ಇದು ವಿದೇಶಿ ನಂಬರ್‌ಗಳಿಂದ ಬರುವ ಕರೆಗಳಾಗಿದ್ದರೆ, ಸ್ಕ್ರೀನ್ ಮೇಲೆ ಕೇವಲ “International Call” ಎಂದು ಮಾತ್ರ ಬರೆಯಲಾಗಿರುತ್ತದೆ.

ಗ್ರಾಹಕರ ಗೌಪ್ಯತೆ ಮತ್ತು ಭದ್ರತೆಗೆ ಮೊದಲ ಆದ್ಯತೆ

ದೂರಸಂಪರ್ಕ ನಿಯಮಗಳು 2026 ರ ರೂಲ್ 48(1) ರ ಅಡಿಯಲ್ಲಿ ಈ ಹೊಸ ಚೌಕಟ್ಟನ್ನು ರೂಪಿಸಲಾಗಿದೆ. ಗ್ರಾಹಕರ ವೈಯಕ್ತಿಕ ಗೌಪ್ಯತೆಯನ್ನು (Privacy) ಕಾಯ್ದುಕೊಳ್ಳಲು ಕಂಪನಿಗಳು ‘ಸೆಕ್ಯುರಿಟಿ-ಬೈ-ಡಿಸೈನ್’ ವಿಧಾನವನ್ನು ಕಡ್ಡಾಯವಾಗಿ ಅಳವಡಿಸಿಕೊಳ್ಳಬೇಕು. ಅಂದರೆ, ಇನ್ಕಮಿಂಗ್ ಕಾಲ್ ಕಟ್ ಆದ ತಕ್ಷಣ, ಸರ್ವರ್‌ನಿಂದ ಪಡೆದುಕೊಂಡ ಹೆಸರಿನ ಮಾಹಿತಿಯು ಆಪರೇಟರ್ ಸಿಸ್ಟಮ್‌ನಲ್ಲಿ ಯಾವುದೇ ಕಾರಣಕ್ಕೂ ಸ್ಟೋರ್ ಆಗಿ ಉಳಿಯುವುದಿಲ್ಲ.

ಹಾಗೆಯೇ, ವ್ಯಾಪಾರಸ್ಥರು ಮತ್ತು ದೊಡ್ಡ ಕಾರ್ಪೊರೇಟ್ ಗ್ರಾಹಕರಿಗೆ ಇದರಲ್ಲಿ ವಿಶೇಷ ವಿನಾಯಿತಿ ನೀಡಲಾಗಿದೆ. ಕಂಪನಿಗಳು ಸಿಮ್ ಖರೀದಿಸಿದ ವ್ಯಕ್ತಿಯ ಹೆಸರಿನ ಬದಲಾಗಿ ತಮ್ಮದೇ ಬ್ರಾಂಡ್ ಹೆಸರನ್ನು ಪ್ರದರ್ಶಿಸಲು ಬಯಸಿದರೆ, ಆ ಹೆಸರು ಜಿಎಸ್‌ಟಿ (GST) ಪೋರ್ಟಲ್‌ನಲ್ಲಿ ನೋಂದಾಯಿತ ಟ್ರೇಡ್ ನೇಮ್ ಆಗಿರಬೇಕು ಅಥವಾ ಟ್ರೇಡ್ ಮಾರ್ಕ್ಸ್ ರಿಜಿಸ್ಟ್ರಿಯಲ್ಲಿ ನೋಂದಾಯಿತ ಟ್ರೇಡ್ ಮಾರ್ಕ್ ಆಗಿರುವುದು ಕಡ್ಡಾಯಗೊಳಿಸಲಾಗಿದೆ. ಸರ್ಕಾರದ ಈ ಮಾಸ್ಟರ್ ಪ್ಲಾನ್‌ನಿಂದಾಗಿ ನಕಲಿ ಐಡಿ ಅಥವಾ ಬೇರೆಯವರ ಹೆಸರಿನ ಸಿಮ್ ಬಳಸಿ ಜನರನ್ನು ವಂಚಿಸುವ ಸೈಬರ್ ಕಳ್ಳರ ಜಾಲಕ್ಕೆ ಬ್ರೇಕ್ ಬೀಳಲಿದೆ.
#CNAPService #TelecomNews #UdayakalaNews #KannadaRajyotsava #CyberSecurity #TruecallerAlternative #DepartmentOfTelecommunications #MobileUsers #TechNewsKannada #SpamCallBlock