ವಿದ್ಯಾರ್ಥಿಗಳ ಹೋರಾಟಕ್ಕೆ ಮಣಿದ ಕೆಇಎ: PGCET ಮೊದಲ ಸುತ್ತಿನ ನಾಲ್ಕೂ ‘ಚಾಯ್ಸ್’ ದಾಖಲಿಸಲು ಮತ್ತೆ ಅವಕಾಶ!

ಉದಯಕಾಲ ನ್ಯೂಸ್, ಬೆಂಗಳೂರು: ರಾಜ್ಯದ ಸ್ನಾತಕೋತ್ತರ ವೃತ್ತಿಪರ ಕೋರ್ಸ್‌ಗಳಾದ MBA, MCA, ME, M.Tech ಹಾಗೂ M.Arch ಪ್ರವೇಶಾತಿಯ ಮೊದಲ ಸುತ್ತಿನ ಸೀಟು ಹಂಚಿಕೆಯಲ್ಲಿ ಸೀಟು ಪಡೆದಿರುವ ಅಭ್ಯರ್ಥಿಗಳಿಗೆ ಎಲ್ಲಾ 4 ಚಾಯ್ಸ್‌ಗಳನ್ನು (Choices) ದಾಖಲಿಸಲು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (KEA) ಮತ್ತೆ ಅವಕಾಶ ನೀಡಿದೆ. ವಿದ್ಯಾರ್ಥಿಗಳು ಹಾಗೂ ABVP ಸಂಘಟನೆ ನಡೆಸಿದ ಸತತ ಪ್ರತಿಭಟನೆಯ ಫಲವಾಗಿ ಕೆಇಎ ಈ ಪ್ರಮುಖ ನಿರ್ಧಾರ ತಳೆದಿದೆ.
ಈ ಕುರಿತು ಕೆಇಎ ಕಾರ್ಯನಿರ್ವಾಹಕ ನಿರ್ದೇಶಕ ಹೆಚ್. ಪ್ರಸನ್ನ ಅವರು ಮಾಧ್ಯಮ ಪ್ರಕಟಣೆ ಬಿಡುಗಡೆ ಮಾಡಿದ್ದು, ಅಕ್ಟೋಬರ್ 13ರ ಬೆಳಿಗ್ಗೆ 10 ಗಂಟೆಯವರೆಗೆ ಅಭ್ಯರ್ಥಿಗಳು ಚಾಯ್ಸ್ ನಮೂದಿಸಲು ಸಮಯಾವಕಾಶ ಕಲ್ಪಿಸಲಾಗಿದೆ.

ಪ್ರವೇಶ ಪ್ರಕ್ರಿಯೆಯ ಪ್ರಮುಖ ದಿನಾಂಕಗಳು
* ಆಯ್ಕೆ ದಾಖಲಿಸಲು ಕೊನೆಯ ದಿನ: ಅಕ್ಟೋಬರ್ 13, ಬೆಳಿಗ್ಗೆ 10:00 ಗಂಟೆಯವರೆಗೆ.
* ಆಪ್ಷನ್ ರೀ-ಅರೇಂಜ್ (Re-Arrange) ಮಾಡಲು ಅವಕಾಶ: ಅಕ್ಟೋಬರ್ 13ರ ಮಧ್ಯಾಹ್ನ 2:00 ಗಂಟೆಯಿಂದ ಅಕ್ಟೋಬರ್ 15ರ ಬೆಳಿಗ್ಗೆ 10:00 ಗಂಟೆಯವರೆಗೆ.

ಆಯ್ಕೆಗಳ ವಿವರ – ಯಾವುದನ್ನು ಆಯ್ಕೆ ಮಾಡಬೇಕು?
ಆಯ್ಕೆ – 1 (Choice-1): ಹಂಚಿಕೆಯಾಗಿರುವ ಸೀಟಿನಿಂದ ಅಭ್ಯರ್ಥಿಗೆ ಸಂಪೂರ್ಣ ತೃಪ್ತಿಯಿದ್ದರೆ, ಕಾಲೇಜಿಗೆ ನಿಗದಿತ ಶುಲ್ಕ ಪಾವತಿಸಿ ತಕ್ಷಣವೇ ಪ್ರವೇಶ (Admission) ಪಡೆಯಬೇಕು.
ಆಯ್ಕೆ – 2 (Choice-2): ಸಿಕ್ಕಿರುವ ಸೀಟನ್ನು ಕಾಯ್ದಿರಿಸಿಕೊಂಡು (Hold), ಮುಂದಿನ ಸುತ್ತಿನಲ್ಲಿ ಇದಕ್ಕಿಂತ ಉತ್ತಮ ಕಾಲೇಜು ಅಥವಾ ಸೀಟಿಗೆ ಅಪ್‌ಗ್ರೇಡ್ (Upgrade) ಆಗಲು ಬಯಸುವವರು ಇದನ್ನು ಆಯ್ಕೆ ಮಾಡಬಹುದು. (ಈಗಾಗಲೇ ಕಾಲೇಜಿನಲ್ಲಿ ಪ್ರವೇಶ ಪಡೆದವರು ಹಾಗೂ ಸೀಟು ಖಾತರಿ ಚೀಟಿ ಡೌನ್‌ಲೋಡ್ ಮಾಡಿಕೊಂಡವರಿಗೂ ಚಾಯ್ಸ್-2 ಆಯ್ಕೆ ಮಾಡಿ ಉತ್ತಮ ಸೀಟಿಗೆ ಅಪ್‌ಗ್ರೇಡ್ ಆಗಲು ಅವಕಾಶ ನೀಡಲಾಗಿದೆ).
ಆಯ್ಕೆ – 3 (Choice-3): ಪ್ರಸ್ತುತ ಹಂಚಿಕೆಯಾಗಿರುವ ಸೀಟು ಬೇಡವೆಂದು, ಅದನ್ನು ಬಿಟ್ಟುಕೊಟ್ಟು ಮುಂದಿನ ಕೌನ್ಸೆಲಿಂಗ್ ಸುತ್ತಿನಲ್ಲಿ ಹೊಸ ಸೀಟಿಗಾಗಿ ಭಾಗವಹಿಸಲು ಬಯಸುವವರು.
ಆಯ್ಕೆ – 4 (Choice-4): ಸಿಕ್ಕಿರುವ ಸೀಟು ಬೇಡ ಹಾಗೂ ಇಡೀ ಕೌನ್ಸೆಲಿಂಗ್ ಪ್ರಕ್ರಿಯೆಯಿಂದ ಸಂಪೂರ್ಣವಾಗಿ ಹೊರನಡೆಯಲು ಬಯಸುವವರು.

ಸುಪ್ರೀಂಕೋರ್ಟ್‌ನಲ್ಲಿ ಅರ್ಜಿ ಸಲ್ಲಿಕೆ
PGCET ಪ್ರವೇಶಾತಿಗಾಗಿ ಇನ್ನೂ ಎರಡು ಸುತ್ತಿನ ಕೌನ್ಸೆಲಿಂಗ್ ನಡೆಸಲು ಅವಕಾಶ ನೀಡಬೇಕು ಹಾಗೂ ಯುಜಿ (UG) ಮತ್ತು ಪಿಜಿ (PG) ಕೋರ್ಸ್‌ಗಳ ಪ್ರವೇಶಕ್ಕೆ ಪ್ರತ್ಯೇಕ ವೇಳಾಪಟ್ಟಿ ನೀಡುವಂತೆ AICTEಗೆ ನಿರ್ದೇಶಿಸಬೇಕು ಎಂದು ಕೋರಿ ಸುಪ್ರೀಂಕೋರ್ಟ್‌ಗೆ ಅರ್ಜಿ ಸಲ್ಲಿಸಲಾಗಿದೆ. ನ್ಯಾಯಾಲಯದ ಮುಂದಿನ ತೀರ್ಮಾನ ಬರುವವರೆಗೆ ನಾಲ್ಕೂ ಚಾಯ್ಸ್‌ಗಳನ್ನು ದಾಖಲಿಸಲು ಕೆಇಎ ಅವಕಾಶ ಮಾಡಿಕೊಟ್ಟಿದೆ.
ದ್ವಿತೀಯ ಸುತ್ತಿನ ಸೀಟು ಹಂಚಿಕೆ ಪ್ರಕ್ರಿಯೆ ಆರಂಭಿಸಬೇಕು ಮತ್ತು ಚಾಯ್ಸ್ ಎಂಟ್ರಿಗೆ ಅವಕಾಶ ನೀಡಬೇಕೆಂದು ವಿದ್ಯಾರ್ಥಿಗಳು ಹಾಗೂ ಎಬಿವಿಪಿ ಸಂಘಟನೆ ತೀವ್ರ ಹೋರಾಟ ನಡೆಸಿದ್ದವು. ವಿದ್ಯಾರ್ಥಿಗಳ ಭವಿಷ್ಯದ ಹಿತದೃಷ್ಟಿಯಿಂದ ಕೆಇಎ ಈಗ ಈ ಸಡಿಲಿಕೆ ಘೋಷಿಸಿದೆ.
#Udayakala #KarnatakaPGCET #KEA #KEAPGCET #PGCET2026 #BangaloreNews #KannadaNews #EducationNews #ABVPProtest #MBA #MCA #MTech #KarnatakaEducation