2028ರ ವೇಳೆಗೆ ಭಾರತೀಯ ಬ್ರಾಂಡ್‌ ಸ್ಮಾರ್ಟ್‌ಫೋನ್‌ಗಳು ಲಭ್ಯ: ಸಚಿವ ಅಶ್ವಿನಿ ವೈಷ್ಣವ್ ವಿಶ್ವಾಸ!

ಉದಯಕಾಲ ನ್ಯೂಸ್, ನವದೆಹಲಿ: ಜಾಗತಿಕ ತಂತ್ರಜ್ಞಾನ ದಿಗ್ಗಜರಾದ ಆಪಲ್ (Apple) ಮತ್ತು ಸ್ಯಾಮ್‌ಸಂಗ್ (Samsung) ಕಂಪನಿಗಳ ಮಾದರಿಯಲ್ಲೇ, ಭಾರತವೂ ತನ್ನದೇ ಆದ ವಿನ್ಯಾಸ ಹಾಗೂ ಬ್ರಾಂಡ್ ಹೊಂದಿರುವ ಸ್ಮಾರ್ಟ್‌ಫೋನ್‌ಗಳನ್ನು 2028ರ ವೇಳೆಗೆ ಮಾರುಕಟ್ಟೆಗೆ ಪರಿಚಯಿಸಲಿದೆ ಎಂದು ಕೇಂದ್ರ ಐಟಿ ಸಚಿವ ಅಶ್ವಿನಿ ವೈಷ್ಣವ್ಭರವಸೆ ವ್ಯಕ್ತಪಡಿಸಿದ್ದಾರೆ.

ಭಾರತೀಯ ಬ್ರಾಂಡ್ ಹಾಗೂ ವಿನ್ಯಾಸಕ್ಕೆ ಒತ್ತು

ದೆಹಲಿಯಲ್ಲಿ ಮಾತನಾಡಿದ ಸಚಿವರು, ಮುಂಬರುವ ದಿನಗಳ ಬಗ್ಗೆ ಪ್ರಮುಖ ಮುನ್ಸೂಚನೆ ನೀಡಿದ್ದಾರೆ. ಇದು 2026ರ ಅಕ್ಟೋಬರ್. ಇದನ್ನು ಗಮನದಲ್ಲಿಟ್ಟುಕೊಳ್ಳಿ. 2028ರ ಅಕ್ಟೋಬರ್ 23ರ ವೇಳೆಗೆ, ನಿಮ್ಮ ಬಳಿ ಭಾರತದಲ್ಲಿ ವಿನ್ಯಾಸಗೊಂಡ, ಭಾರತದಲ್ಲಿ ತಯಾರಾದ ಮತ್ತು ಭಾರತೀಯ ಬ್ರಾಂಡ್‌ನ ಮೊಬೈಲ್ ಫೋನ್‌ಗಳು ಇರುತ್ತವೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಪಿಸಿಬಿ ವಿನ್ಯಾಸದಲ್ಲಿ ಭಾರತೀಯರ ಸಾಧನೆ

ಮೂರು ವರ್ಷಗಳ ಹಿಂದೆ ಭಾರತೀಯ ವಿನ್ಯಾಸಕರಿಗೆ ಮೊಬೈಲ್ ಫೋನ್‌ನ ಮದರ್‌ಬೋರ್ಡ್ ಆದ ಪಿಸಿಬಿಯನ್ನು (PCB) ವಿನ್ಯಾಸಗೊಳಿಸುವ ಸವಾಲು ಹಾಕಲಾಗಿತ್ತು. ಈ ಸವಾಲನ್ನು ಸ್ವೀಕರಿಸಿ ಎರಡು ಕಂಪನಿಗಳು ಅತ್ಯುತ್ತಮವಾಗಿ ಪಿಸಿಬಿ ವಿನ್ಯಾಸಗೊಳಿಸಿದ್ದು, ಇದರಲ್ಲಿ ಒಂದು ಕಂಪನಿಯ ವಿನ್ಯಾಸವನ್ನು ಅಮೆರಿಕದ ಅತಿದೊಡ್ಡ ಟೆಲಿಕಾಂ ಸೇವಾ ಪೂರೈಕೆದಾರ ಸಂಸ್ಥೆ ಆಯ್ಕೆ ಮಾಡಿಕೊಂಡಿದೆ. ಅಮೆರಿಕದಲ್ಲಿ ‘5ಜಿ-ಪ್ಲಸ್’ (5G-plus) ಮೊಬೈಲ್ ಫೋನ್ ಅನ್ನು ವಿನ್ಯಾಸಗೊಳಿಸಿ ತಲುಪಿಸಲಾಗಿದ್ದು, ಈ ಫೋನ್ ಈಗಾಗಲೇ ತಯಾರಾಗಿ ಗ್ರಾಹಕರ ಕೈ ಸೇರಿದೆ ಎಂದು ಸಚಿವರು ತಿಳಿಸಿದ್ದಾರೆ.

ಬೌದ್ಧಿಕ ಆಸ್ತಿ (IP) ದೇಶದಲ್ಲೇ ಉಳಿಕೆ

ಈಗ ಬೆಳೆಸಿಕೊಂಡಿರುವ ಸಾಮರ್ಥ್ಯವನ್ನು ಬಳಸಿಕೊಂಡು, ಭಾರತೀಯ ಬ್ರಾಂಡ್, ಭಾರತೀಯ ವಿನ್ಯಾಸ ಮತ್ತು ಭಾರತೀಯ ಬೌದ್ಧಿಕ ಆಸ್ತಿಯನ್ನು (IP) ದೇಶದಲ್ಲೇ ಉಳಿಸಿಕೊಳ್ಳಲಾಗುವುದು. ಅಲ್ಲದೆ, ಈ ಮೊಬೈಲ್ ಫೋನ್ ಮುಂದಿನ ದಿನಗಳಲ್ಲಿ ಅತಿ ಹೆಚ್ಚು ಮಾರಾಟವಾಗುವ ಫೋನ್‌ಗಳಲ್ಲಿ ಒಂದಾಗಲಿದೆ ಎಂದು ಸಚಿವರು ಆಶಯ ವ್ಯಕ್ತಪಡಿಸಿದರು.

‘ಮೇಕ್ ಇನ್ ಇಂಡಿಯಾ’ ಯಶಸ್ಸು

ಹಿಂದಿನ ಕಾಲಘಟ್ಟದ ನೀತಿ-ನಿಯಮಗಳು ಹಾಗೂ ಹಳೆಯ ಮನಸ್ಥಿತಿಯಿಂದ ಉತ್ಪಾದನಾ ವಲಯವು ಹಿನ್ನಡೆ ಕಂಡಿತ್ತು. ಆದರೆ, 2014ರ ನಂತರ ಪ್ರಧಾನಿ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ ಜಾರಿಗೆ ಬಂದ ‘ಮೇಕ್ ಇನ್ ಇಂಡಿಯಾ’ (Make in India) ಪರಿಕಲ್ಪನೆಯು ಭಾರತದ ಉತ್ಪಾದನಾ ರಂಗಕ್ಕೆ ಹೊಸ ಶಕ್ತಿ ತುಂಬಿದೆ ಎಂದು ಅಶ್ವಿನಿ ವೈಷ್ಣವ್ ತಿಳಿಸಿದ್ದಾರೆ.
#AshwiniVaishnaw #MakeInIndia #IndianSmartphones #UdayakalaNews #TechNews #MobileManufacturing #5GPlus #IndiaTech #AppleVsSamsung