ಜಿಎಸ್‌ಟಿ ದರ ಪರಿಷ್ಕರಣೆ, ದಂಡದ ಬದಲು ನಿಗದಿತ ಶುಲ್ಕಕ್ಕೆ ಅವಕಾಶ: ವಿವೇಕ್ ಚತುರ್ವೇದಿ

ಉದಯಕಾಲ ನ್ಯೂಸ್, ಬೆಂಗಳೂರು: ಸರಕು ಮತ್ತು ಸೇವಾ ತೆರಿಗೆ (GST) ವ್ಯವಸ್ಥೆಯಲ್ಲಿ ಇತ್ತೀಚೆಗೆ ದರ ಪರಿಷ್ಕರಣೆ ಮಾಡಲಾಗಿದ್ದು, ತೆರಿಗೆದಾರರಿಗೆ ಅನುಕೂಲವಾಗುವಂತೆ ಕಠಿಣ ದಂಡದ ಬದಲಾಗಿ ನಿಗದಿತ ಶುಲ್ಕದ (Fee) ರೂಪದಲ್ಲೇ ಪಾವತಿಸಲು ಅವಕಾಶ ಕಲ್ಪಿಸಲಾಗಿದೆ. ಉದ್ಯಮ ಹಾಗೂ ವ್ಯಾಪಾರ ವಲಯದವರು ಈ ಹೊಸ ಬದಲಾವಣೆಗಳ ಸದುಪಯೋಗ ಪಡೆದುಕೊಳ್ಳಬೇಕು ಎಂದು ಕೇಂದ್ರೀಯ ಪರೋಕ್ಷ ತೆರಿಗೆಗಳು ಮತ್ತು ಕಸ್ಟಮ್ಸ್ ಮಂಡಳಿಯ (CBIC) ಮುಖ್ಯಸ್ಥವಿವೇಕ್ ಚತುರ್ವೇದಿ ತಿಳಿಸಿದ್ದಾರೆ. ಕ್ವೀನ್ಸ್ ರಸ್ತೆಯಲ್ಲಿರುವ ಕೇಂದ್ರೀಯ ಆದಾಯ ತೆರಿಗೆ ಬೆಂಗಳೂರು ದಕ್ಷಿಣ ವಲಯ ವಿಭಾಗದ ವತಿಯಿಂದ ಜಿಎಸ್‌ಟಿ ಕುರಿತು ಹಮ್ಮಿಕೊಳ್ಳಲಾಗಿದ್ದ ವಿಶೇಷ ಸಂವಾದ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.

ತೆರಿಗೆದಾರರ ಹಿತದೃಷ್ಟಿಯಿಂದ ಜಿಎಸ್‌ಟಿ ಸುಧಾರಣೆ

ದೇಶದಲ್ಲಿ ಜಿಎಸ್‌ಟಿ ಜಾರಿಗೆ ಬಂದ ಬಳಿಕ ಉದ್ಯಮ ವಲಯಕ್ಕೆ ಯಾವುದೇ ರೀತಿಯ ಕ್ಲಿಷ್ಟಕರ ಸನ್ನಿವೇಶಗಳು ಎದುರಾಗದಂತೆ ಹಂತ ಹಂತವಾಗಿ ಸುಧಾರಣೆಗಳನ್ನು ತರಲಾಗುತ್ತಿದೆ. ತೆರಿಗೆ ಕಟ್ಟುವವರ ಹಿತಾಸಕ್ತಿಯನ್ನು ಗಮನದಲ್ಲಿಟ್ಟುಕೊಂಡು ಜಿಎಸ್‌ಟಿ ದರಗಳನ್ನು ಪರಿಷ್ಕರಿಸಲಾಗಿದ್ದು, ಇದರ ಪ್ರಯೋಜನಗಳು ನೇರವಾಗಿ ತಳಮಟ್ಟದ ಉದ್ಯಮಗಳಿಗೆ ತಲುಪಬೇಕು ಎಂದು ವಿವೇಕ್ ಚತುರ್ವೇದಿ ಹೇಳಿದರು.

ಬೆಂಗಳೂರು ಸ್ಟಾರ್ಟ್‌ಅಪ್ ಹಬ್‌ ವಲಯಕ್ಕೆ ವಿಶೇಷ ಒತ್ತು

ಭಾರತದಲ್ಲಿ ಬೆಂಗಳೂರು ನಗರವು ಪ್ರಮುಖ ಸ್ಟಾರ್ಟ್‌ಅಪ್ ಹಬ್‌ ಆಗಿ (Startup Hub) ವೇಗವಾಗಿ ಬೆಳೆಯುತ್ತಿದ್ದು, ಇದು ನವೋದ್ಯಮಗಳಿಗೆ ಹಾಗೂ ಮಾರುಕಟ್ಟೆಯ ಬೆಳವಣಿಗೆಗೆ ಅತ್ಯಂತ ಅನುಕೂಲಕರ ವಾತಾವರಣ ಕಲ್ಪಿಸಿದೆ. ವಿಶೇಷವಾಗಿ ಪೀಣ್ಯ ಮತ್ತು ಬಿಡದಿ ಕೈಗಾರಿಕಾ ಪ್ರದೇಶಗಳಲ್ಲಿ ಲಕ್ಷಾಂತರ ಉದ್ಯಮಗಳು ಕಾರ್ಯನಿರ್ವಹಿಸುತ್ತಿದ್ದು, ಜಿಎಸ್‌ಟಿ ಪರಿಷ್ಕರಣೆ ಹಾಗೂ ಸರಳೀಕರಣದ ಪ್ರಯೋಜನಗಳನ್ನು ಇಲ್ಲಿನ ಕೈಗಾರಿಕೆಗಳು ಪಡೆದುಕೊಳ್ಳಬೇಕು ಎಂದು ಕರೆ ನೀಡಿದರು. ಜಿಎಸ್‌ಟಿ ಸಂಬಂಧಿತ ಲಕ್ಷಾಂತರ ಪ್ರಕರಣಗಳನ್ನು ತ್ವರಿತವಾಗಿ ಹಾಗೂ ಸೌಹಾರ್ದಯುತವಾಗಿ ಪರಿಹರಿಸಲು ಇಲಾಖೆಯಿಂದ ಮಹತ್ವದ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ ಎಂದರು.

ಜಿಎಸ್‌ಟಿ ಜಾಗೃತಿ ಅತ್ಯವಶ್ಯಕ

ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಸಿಬಿಐಸಿ (CBIC) ಸದಸ್ಯ ಸಂಜಯ್ ಮಂಗಳ್, ದೇಶದ ಆರ್ಥಿಕ ಪ್ರಗತಿಗೆ ತೆರಿಗೆಯ ಕುರಿತು ಉದ್ಯಮಿಗಳಲ್ಲಿ ಹೆಚ್ಚಿನ ಅರಿವು ಮೂಡಿಸುವುದು ಅತಿ ಅವಶ್ಯಕ ಎಂದರು. ಜಿಎಸ್‌ಟಿ ಸಂಬಂಧ ವ್ಯಾಪಾರಸ್ಥರಿಗೆ ಎದುರಾಗುವ ಯಾವುದೇ ಬಗೆಯ ತಾಂತ್ರಿಕ ಅಥವಾ ಆಡಳಿತಾತ್ಮಕ ಸಮಸ್ಯೆಗಳನ್ನು ಬಗೆಹರಿಸಲು ಕಚೇರಿಯಿಂದ ಮುಕ್ತ ಸಹಕಾರ ನೀಡಲಾಗುವುದು ಎಂದು ತಿಳಿಸಿದರು.

ಈ ಸಂವಾದ ಕಾರ್ಯಕ್ರಮದಲ್ಲಿ ಕೇಂದ್ರ ಆದಾಯ ತೆರಿಗೆ ಮುಖ್ಯ ಆಯುಕ್ತೆ ಕಾಜಲ್ ಸಿಂಗ್, ಕರ್ನಾಟಕ ವಾಣಿಜ್ಯ ತೆರಿಗೆಗಳ ಆಯುಕ್ತ ವಿಪುಲ್ ಬನ್ಸಾರಿ ಸೇರಿದಂತೆ ವಿವಿಧ ಕೈಗಾರಿಕಾ ಸಂಘಟನೆಗಳ ಪ್ರಮುಖರು, ಕಾಸಿಯಾ (KASSIA), ಪೀಣ್ಯ ಕೈಗಾರಿಕಾ ಸಂಘದ ಪದಾಧಿಕಾರಿಗಳು ಹಾಗೂ ಹತ್ತಾರು ಉದ್ಯಮದಾರರು ಪಾಲ್ಗೊಂಡು ತೆರಿಗೆ ಸುಧಾರಣೆಗಳ ಕುರಿತು ಚರ್ಚೆ ನಡೆಸಿದರು.
#GSTUpdates #CBIC #VivekChaturvedi #BangaloreBusiness #PeenyaIndustries #TaxReforms #UdayakalaNews #GSTCouncil #KarnatakaCommerce