ಎಸ್‌ಬಿಐ ಮೇಲೆ ಸೈಬರ್‌ ದಾಳಿ: 3,897 ಗ್ರಾಹಕರ ವೈಯಕ್ತಿಕ ಡೇಟಾ ಡಾರ್ಕ್‌ವೆಬ್‌ನಲ್ಲಿ ಸೋರಿಕೆ!

ಉದಯಕಾಲ ನ್ಯೂಸ್, ನವದೆಹಲಿ: ದೇಶದ ಅತಿ ದೊಡ್ಡ ಸಾರ್ವಜನಿಕ ವಲಯದ ಬ್ಯಾಂಕ್ ಆಗಿರುವ ಭಾರತೀಯ ಸ್ಟೇಟ್‌ ಬ್ಯಾಂಕ್‌ಗೆ ಸೈಬರ್ ಕಳ್ಳರು ಕನ್ನ ಹಾಕಿದ್ದಾರೆ. ಎಸ್‌ಬಿಐ ಗ್ರಾಹಕರ ವೈಯಕ್ತಿಕ ದತ್ತಾಂಶಗಳು ಹ್ಯಾಕರ್‌ಗಳ ಪಾಲಾಗಿದ್ದು, ಬರೋಬ್ಬರಿ 3,897 ಗ್ರಾಹಕರ ಪ್ರಮುಖ ದಾಖಲೆಗಳು ಮತ್ತು ಮಾಹಿತಿಗಳು‘ಡಾರ್ಕ್‌ ವೆಬ್‌’ (Dark Web) ನಲ್ಲಿ ಬಹಿರಂಗಗೊಂಡಿರುವುದಾಗಿ ಸ್ವತಃ ಬ್ಯಾಂಕ್‌ ಅಧಿಕೃತವಾಗಿ ದೃಢಪಡಿಸಿದೆ.

ಸೋರಿಕೆಯಾದ ರಹಸ್ಯ ಮಾಹಿತಿ!
ಷೇರು ವಿನಿಮಯ ಕೇಂದ್ರಗಳಿಗೆ ಬ್ಯಾಂಕ್ ನೀಡಿರುವ ಅಧಿಕೃತ ಮಾಹಿತಿಯ ಪ್ರಕಾರ, ಆರಂಭಿಕ ಹಂತದಲ್ಲಿ ಸುಮಾರು 3.75 ಲಕ್ಷ ದಾಖಲೆಗಳ ಪರಿಶೀಲನೆ ನಡೆಸಲಾಗಿದೆ. ಈ ಪೈಕಿ ಒಟ್ಟು 3,897 ಗ್ರಾಹಕರ ವೈಯಕ್ತಿಕ ಗುರುತಿನ ಸೂಕ್ಷ್ಮ ಮಾಹಿತಿ ಹಾಗೂ ದಾಖಲೆಗಳು ಸೋರಿಕೆಯಾಗಿರುವುದು ಖಚಿತಪಟ್ಟಿದೆ.

* ಗ್ರಾಹಕರ ಪೂರ್ಣ ಹೆಸರು ಹಾಗೂ ವಾಸಸ್ಥಳದ ವಿಳಾಸ
* ನೋಂದಾಯಿತ ಮೊಬೈಲ್ ನಂಬರ್‌ಗಳು ಹಾಗೂ ಇಮೇಲ್ ಐಡಿಗಳು
* ಲಿಂಗ ಮತ್ತು ಜನ್ಮ ದಿನಾಂಕ (DOB)
* ಬ್ಯಾಂಕ್ ಬ್ರ್ಯಾಂಚ್ ಕೋಡ್‌ಗಳು
* ಸಾಲ (Loan) ಪಡೆಯಲು ಸಲ್ಲಿಸಿರುವ ಪ್ರಮುಖ ದಾಖಲೆಗಳು ಹಾಗೂ ಖಾತೆಗಳಿಗೆ ಸಂಬಂಧಿಸಿದ ಕಡತಗಳು

ಮುಂಚಿತವಾಗಿಯೇ ಬಂದಿತ್ತು ಸೈಬರ್ ಅಲರ್ಟ್‌

ಎಸ್‌ಬಿಐ ಮೂಲಗಳ ಪ್ರಕಾರ, ಕಳೆದ ಅಕ್ಟೋಬರ್ 16ರಂದೇ ಗ್ರಾಹಕರ ಡೇಟಾ ಸಂಭಾವ್ಯ ಸೋರಿಕೆಯಾಗುವ ಅಪಾಯದ ಕುರಿತು ‘ಥ್ರೆಟ್ ಇಂಟೆಲಿಜೆನ್ಸ್’ ಸೇವಾ ಪೂರೈಕೆದಾರರು, ರಕ್ಷಣಾ ಸೈಬರ್ ಏಜೆನ್ಸಿ ಹಾಗೂ ಭಾರತೀಯ ಕಂಪ್ಯೂಟರ್ ತುರ್ತು ಪ್ರತಿಕ್ರಿಯೆ ತಂಡದಿಂದ ಎಚ್ಚರಿಕೆಯ ಸಂದೇಶಗಳು ಬಂದಿದ್ದವು.

ಎಚ್ಚರಿಕೆ ಸಿಕ್ಕ ತಕ್ಷಣವೇ ಎಚ್ಚೆತ್ತುಕೊಂಡ ಬ್ಯಾಂಕ್‌ನ ತಾಂತ್ರಿಕ ಸಿಬ್ಬಂದಿ, ಕೂಡಲೇ ಸೈಬರ್ ಘಟನೆ ನಿರ್ವಹಣಾ ವ್ಯವಸ್ಥೆ ಹಾಗೂ ಕಾವಲು ನಿಯಮಾವಳಿಗಳನ್ನು ಬಿಗಿಗೊಳಿಸುವ ಮೂಲಕ ಹೆಚ್ಚಿನ ಹಾನಿಯಾಗದಂತೆ ತಡೆಗಟ್ಟುವಲ್ಲಿ ಯಶಸ್ವಿಯಾಗಿದ್ದಾರೆ ಎಂದು ತಿಳಿದುಬಂದಿದೆ.

ಬ್ಯಾಂಕ್ ಹೇಳುವುದೇನು? ಮುಂದಿನ ಕ್ರಮವೇನು?

ಡೇಟಾ ಸೋರಿಕೆಯ ಮೂಲ ಯಾವುದು ಮತ್ತು ಇದರ ವ್ಯಾಪ್ತಿ ಎಷ್ಟು ಎಂಬುದನ್ನು ನಿಖರವಾಗಿ ಪತ್ತೆಹಚ್ಚಲು ತಜ್ಞರ ತಂಡವು ಉನ್ನತ ಮಟ್ಟದ ತನಿಖೆ ಮುಂದುವರಿಸಿದೆ. ಗ್ರಾಹಕರ ಸುರಕ್ಷತೆ ಮತ್ತು ಬ್ಯಾಂಕಿನ ಗೌಪ್ಯತೆಗೆ ಯಾವುದೇ ಧಕ್ಕೆಯಾಗದಂತೆ ಅಗತ್ಯವಿರುವ ಎಲ್ಲಾ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದ್ದು, ಗ್ರಾಹಕರು ಆತಂಕಪಡುವ ಅಗತ್ಯವಿಲ್ಲ ಎಂದು ಬ್ಯಾಂಕ್ ಭರವಸೆ ನೀಡಿದೆ. ಆದಾಗ್ಯೂ, ಸೈಬರ್ ವಂಚನೆಗಳು ಹೆಚ್ಚುತ್ತಿರುವ ಈ ಕಾಲಘಟ್ಟದಲ್ಲಿ ಬ್ಯಾಂಕ್ ಗ್ರಾಹಕರು ತಮ್ಮ ಒಟಿಪಿ (OTP) ಅಥವಾ ವೈಯಕ್ತಿಕ ಬ್ಯಾಂಕಿಂಗ್ ವಿವರಗಳನ್ನು ಯಾರೊಂದಿಗೂ ಹಂಚಿಕೊಳ್ಳದಂತೆ ಎಚ್ಚರಿಕೆ ವಹಿಸುವುದು ಅತ್ಯಗತ್ಯವಾಗಿದೆ.
#SBICyberAttack #DataLeak #DarkWeb #UdayakalaNews #BankingNews #CyberSecurity #SBIUpdates