ಸಿಜೆಪಿ,ಕಾಂಗ್ರೆಸ್ ಪ್ರತಿಭಟನೆಗಳ ಅಬ್ಬರ: ವ್ಯಾಪಾರ ವಲಯಕ್ಕೆ 3,000 ಕೋಟಿ ರೂ. ನಷ್ಟ!

ಉದಯಕಾಲ ನ್ಯೂಸ್, ನವದೆಹಲಿ: ಹಬ್ಬದ ಸಡಗರದ ಈ ಮಹತ್ವದ ತಿಂಗಳಲ್ಲಿ ದೆಹಲಿಯಲ್ಲಿ ನಡೆಯುತ್ತಿರುವ ಸರಣಿ ಪ್ರತಿಭಟನೆಗಳು ಮತ್ತು ನಿರ್ಬಂಧಗಳಿಂದ ರಾಷ್ಟ್ರ ರಾಜಧಾನಿಯ ವಾಣಿಜ್ಯ ಮಾರುಕಟ್ಟೆಗಳು ತತ್ತರಿಸಿವೆ. ಅಕ್ಟೋಬರ್‌ನಲ್ಲಿ ಉಂಟಾದ ನಿರಂತರ ಪ್ರತಿಭಟನೆಗಳಿಂದ ದೆಹಲಿಯ ವ್ಯಾಪಾರ ವಹಿವಾಟಿಗೆ ಭಾರಿ ಹೊಡೆತ ಬಿದ್ದಿದ್ದು, ಇದುವರೆಗೆ ಬರೋಬ್ಬರಿ 3,000 ಕೋಟಿ ರೂಪಾಯಿಗಳಿಗೂ ಅಧಿಕ ನಷ್ಟ ಸಂಭವಿಸಿದೆ ಎಂದು ‘ಚೇಂಬರ್ ಆಫ್ ಟ್ರೇಡ್ ಅಂಡ್ ಇಂಡಸ್ಟ್ರಿ’ (CTI) ಕಳವಳ ವ್ಯಕ್ತಪಡಿಸಿದೆ.

ಅಕ್ಟೋಬರ್ 10ರಂದು ನಡೆದ ಬೃಹತ್ ಪ್ರತಿಭಟನೆಯೊಂದರಿಂದಲೇ ಸುಮಾರು 2,000 ಕೋಟಿ ರೂ. ವಹಿವಾಟು ಸ್ತಬ್ಧವಾಗಿತ್ತು. ತದನಂತರ ಅಕ್ಟೋಬರ್ 13 ರಿಂದ 16ರ ವರೆಗೆ ವಿವಿಧ ನಿರ್ಬಂಧಗಳು ಜಾರಿಯಲ್ಲಿದ್ದ ಕಾರಣ ಮತ್ತಷ್ಟು 1,000 ಕೋಟಿ ರೂ. ನಷ್ಟ ಉಂಟಾಗಿದೆ ಎಂದು CTI ಸ್ಪಷ್ಟಪಡಿಸಿದೆ.

ನಷ್ಟ 10,000 ಕೋಟಿ ರೂ. ದಾಟುವ ಆತಂಕ
ನವರಾತ್ರಿ, ರಾಮಲೀಲೆ ಹಾಗೂ ಮುಂಬರುವ ದೀಪಾವಳಿ ಹಬ್ಬದ ಈ ಸೀಸನ್ ವ್ಯಾಪಾರಿಗಳಿಗೆ ವರ್ಷದ ಅತ್ಯಂತ ಲಾಭದಾಯಕ ಕಾಲವಾಗಿದೆ. ಆದರೆ, ಇದೇ ಸಮಯದಲ್ಲಿ ನಿರಂತರ ಪ್ರತಿಭಟನೆಗಳು ಮುಂದುವರಿದರೆ ಹಬ್ಬದ ವಹಿವಾಟು ಸಂಪೂರ್ಣ ನೆಲಕಚ್ಚಲಿದ್ದು, ಒಟ್ಟು ನಷ್ಟ 10,000 ಕೋಟಿ ರೂಪಾಯಿಗಳನ್ನು ದಾಟುವ ಆತಂಕವಿದೆ ಎಂದು CTI ಅಧ್ಯಕ್ಷ ಬೃಜೇಶ್ ಗೋಯಲ್ ಎಚ್ಚರಿಸಿದ್ದಾರೆ.

ರಾಷ್ಟ್ರ ರಾಜಧಾನಿಯ 700ಕ್ಕೂ ಹೆಚ್ಚು ಪ್ರಮುಖ ಮಾರುಕಟ್ಟೆಗಳು ಈ ಅಶಾಂತಿಯಿಂದ ತೊಂದರೆಗೆ ಸಿಲುಕಿವೆ. ಸಗಟು ವ್ಯಾಪಾರ, ಸಾರಿಗೆ, ಹೋಟೆಲ್, ರೆಸ್ಟೋರೆಂಟ್ ಹಾಗೂ ಇತರೆ ಸೇವಾ ವಲಯಗಳು ಕೋಟ್ಯಂತರ ರೂ. ನಷ್ಟ ಅನುಭವಿಸಿವೆ. ಪ್ರತಿಭಟನೆಗಳ ಬಿಸಿ ಹಾಗೂ ಸಂಚಾರ ನಿರ್ಬಂಧದ ಕಾರಣದಿಂದಾಗಿ ಹೊರರಾಜ್ಯಗಳಿಂದ ದೆಹಲಿಗೆ ಬರುತ್ತಿದ್ದ ಮೂರರಿಂದ ನಾಲ್ಕು ಲಕ್ಷ ಸಗಟು ಖರೀದಿದಾರರು ಮಾರುಕಟ್ಟೆಗಳತ್ತ ತಲೆಹಾಕಿಲ್ಲ ಎಂಬುದು ವ್ಯಾಪಾರಿಗಳ ದೊಡ್ಡ ಆರೋಪವಾಗಿದೆ.

ನ್ಯಾಯಾಲಯದ ಮೆಟ್ಟಿಲೇರಿದ ವ್ಯಾಪಾರಿಗಳು

ಹಬ್ಬದ ಮಾರುಕಟ್ಟೆಯನ್ನು ನಂಬಿ ಲಕ್ಷಾಂತರ ರೂಪಾಯಿ ಹೂಡಿಕೆ ಮಾಡಿರುವ ವರ್ತಕರು, ಪ್ರತಿಭಟನೆಗಳ ಹೆಸರಿನಲ್ಲಿ ವ್ಯಾಪಾರಕ್ಕೆ ಕನ್ನ ಹಾಕುತ್ತಿರುವುದನ್ನು ವಿರೋಧಿಸಿ ಈಗಾಗಲೇ ಸುಪ್ರೀಂ ಕೋರ್ಟ್ ಹಾಗೂ ಹೈಕೋರ್ಟ್ ಮೊರೆ ಹೋಗಿದ್ದಾರೆ. ಪ್ರತಿಭಟನೆಗಳು ಸಾರ್ವಜನಿಕರ ಹಾಗೂ ವ್ಯಾಪಾರಿಗಳ ಬದುಕನ್ನು ಅಸ್ತವ್ಯಸ್ತಗೊಳಿಸುತ್ತಿದ್ದು, ಇದಕ್ಕೆ ಕಟ್ಟುನಿಟ್ಟಿನ ಕಡಿವಾಣ ಹಾಕುವಂತೆ ನ್ಯಾಯಾಲಯದಲ್ಲೂ ಅರ್ಜಿಗಳು ದಾಖಲಾಗಿವೆ.

CTI ಪ್ರಮುಖ ಬೇಡಿಕೆಗಳು

1. ದೀಪಾವಳಿ ಹಬ್ಬ ಮುಗಿಯುವವರೆಗೆ ಮಧ್ಯ ಹಾಗೂ ನವದೆಹಲಿಯ ಪ್ರಮುಖ ವಾಣಿಜ್ಯ ಪ್ರದೇಶಗಳಲ್ಲಿ ಯಾವುದೇ ಪ್ರತಿಭಟನೆಗಳಿಗೆ ಅವಕಾಶ ನೀಡಬಾರದು.
2. ಪ್ರತಿಭಟನೆಗಳ ನಡೆಸಲು ನಗರದ ಹೊರವಲಯದಲ್ಲಿ ನಿರ್ದಿಷ್ಟ ಹಾಗೂ ಶಾಶ್ವತ ಸ್ಥಳವನ್ನು ಮಾತ್ರ ನಿಗದಿಪಡಿಸಬೇಕು.
3. ಈಗಾಗಲೇ ನಷ್ಟದ ಸುಳಿಗೆ ಸಿಲುಕಿರುವ ವ್ಯಾಪಾರಿಗಳಿಗೆ ಸರ್ಕಾರ ಸೂಕ್ತ ಪರಿಹಾರ ಪ್ಯಾಕೇಜ್ ಘೋಷಿಸಬೇಕು.
4.ಸಂಕಷ್ಟದಲ್ಲಿರುವ ವರ್ತಕರಿಗೆ ಜಿಎಸ್‌ಟಿ (GST), ವಿದ್ಯುತ್ ಹಾಗೂ ನೀರಿನ ಬಿಲ್‌ಗಳಲ್ಲಿ ವಿಶೇಷ ರಿಯಾಯಿತಿ ಕಲ್ಪಿಸಬೇಕು.
5. ಮಾರುಕಟ್ಟೆಗಳನ್ನು ಬಲವಂತವಾಗಿ ಮುಚ್ಚುವಂತೆ ಒತ್ತಡ ಹೇರುವವರ ವಿರುದ್ಧ ಕಠಿಣ ಕ್ರಮ ಕೈಗೊಂಡು ವ್ಯಾಪಾರಿಗಳಿಗೆ ಸೂಕ್ತ ರಕ್ಷಣೆ ನೀಡಬೇಕು.

ಹಬ್ಬದ ಈ ವಿಶೇಷ ಸಂದರ್ಭದಲ್ಲೂ ವ್ಯಾಪಾರ ವಲಯ ದಿವಾಳಿಯಾಗುವ ಹಂತಕ್ಕೆ ತಲುಪಿದ್ದು, ಸರ್ಕಾರ ಹಾಗೂ ಆಡಳಿತ ವ್ಯವಸ್ಥೆ ತಕ್ಷಣವೇ ಮಧ್ಯಪ್ರವೇಶಿಸಿ ಶಾಂತಿ ಮತ್ತು ವಾಣಿಜ್ಯ ಚಟುವಟಿಕೆಗಳಿಗೆ ಅನುಕೂಲ ಮಾಡಿಕೊಡಬೇಕು ಎಂದು ವರ್ತಕರು ಬಲವಾಗಿ ಆಗ್ರಹಿಸಿದ್ದಾರೆ.
#UdayakalaNews #DelhiTraders #CTI #BusinessLoss #DelhiProtests #DiwaliShopping #TradeLoss #BrijeshGoyal #DelhiNews #EconomyNews