ಕೋಪದಲ್ಲಿ 7 ಜನ ಕುಟುಂಬದವರನ್ನೇ ಕೊಂದ ಕ್ಯಾಬ್ ಡ್ರೈವರ್ ಶೇಖರ್

ಉದಯಕಾಲ ನ್ಯೂಸ್, ಬೆಂಗಳೂರು: ಬೆಂಗಳೂರಿನಲ್ಲಿ ಕೌಟುಂಬಿಕ ಕಲಹ ಇಡೀ ರಾಜ್ಯವನ್ನೇ ಬೆಚ್ಚಿಬೀಳಿಸುವಂತಹ ಭೀಕರ ಕೊಲೆಗಳ ಘಟನೆಗೆ ಸಾಕ್ಷಿಯಾಗಿದೆ. ಹೆಂಡತಿ ಮೇಲಿನ ಸಿಟ್ಟಿಗೆ ಪತಿಯೊಬ್ಬ ತನ್ನ ಪತ್ನಿ ಸೇರಿದಂತೆ ಒಂದೇ ಕುಟುಂಬದ ಬರೋಬ್ಬರಿ ಏಳು ಮಂದಿಯನ್ನು ನಿರ್ದಾಕ್ಷಿಣ್ಯವಾಗಿ ಹತ್ಯೆ ಮಾಡಿದ್ದಾನೆ. ರಾಜಧಾನಿಯ ಶ್ರೀರಾಂಪುರ ಹಾಗೂ ರಾಜಾಜಿನಗರ ವ್ಯಾಪ್ತಿಯಲ್ಲಿ ನಡೆದ ಈ ಸಾಮೂಹಿಕ ನರಮೇಧದ ಕೃತ್ಯವು ತೀವ್ರ ಸಂಚಲನ ಸೃಷ್ಟಿಸಿದೆ.

ಆರೋಪಿಯನ್ನು ಶ್ರೀರಾಂಪುರ ನಿವಾಸಿ, ಖಾಸಗಿ ಕ್ಯಾಬ್‌ ಚಾಲಕ ಶೇಖರ್ (ಇಂದುಶೇಖರ್) ಎಂದು ಗುರುತಿಸಲಾಗಿದೆ. ಇವನ ಪಾಪ ಕೃತ್ಯಕ್ಕೆ ಪತ್ನಿ ಸುನಿತಾ, ಅತ್ತೆ ರೂಪಾವತಿ, ಪತ್ನಿಯ ಇಬ್ಬರು ಅಣ್ಣಂದಿರಾದ ಶಿವಕುಮಾರ್, ಶಂಕರ್, ಇಬ್ಬರು ಅತ್ತಿಗೆಂದಿರಾದ ದಿವ್ಯ, ನಳಿನಿ ಹಾಗೂ ಶಂಕರ್ ಅವರ 7 ವರ್ಷದ ಮಗ ಪುನೀತ್ ಸೇರಿದಂತೆ ಒಟ್ಟು ಏಳು ಜನ ಬಲಿಯಾಗಿದ್ದಾರೆ.

ರುಬ್ಬುವ ಕಲ್ಲಿನಿಂದ ಜಜ್ಜಿ ಭೀಕರ ಕೊಲೆ, ನಂದಿ ಬೆಟ್ಟದಲ್ಲಿ ಶವಗಳ ಎಸೆತ

ಆರೋಪಿ ಶೇಖರ್‌ಗೆ ತನ್ನ ಹೆಂಡತಿ ಸದಾ ಜಗಳವಾಡುತ್ತಾಳೆಂಬ ತೀವ್ರ ಕೋಪವಿತ್ತು. ಅಷ್ಟೇ ಅಲ್ಲದೆ, ದಾಂಪತ್ಯ ಕಲಹದ ಸಂದರ್ಭದಲ್ಲಿ ಪತ್ನಿಯ ಕುಟುಂಬದವರು ಅವಳ ಪರ ನಿಂತು ಗಂಡನನ್ನು ವಿರೋಧಿಸಿದ್ದರು. ಇದರಿಂದ ಇಡೀ ಕುಟುಂಬವೇ ತನ್ನ ನೆಮ್ಮದಿಗೆ ಕಂಟಕವಾಗಿದೆ ಎಂದು ತೀವ್ರ ದ್ವೇಷ ಬೆಳೆಸಿಕೊಂಡಿದ್ದ ಈ ಕ್ರೂರಿ, ಅತ್ಯಂತ ನಿಖರವಾಗಿ ಸಂಚು ಹೂಡಿ ಒಂದೊಂದೇ ಕೊಲೆಗಳನ್ನು ಮಾಡಿದ್ದಾನೆ. ಮನೆಯಲ್ಲಿದ್ದ ರುಬ್ಬುವ ಕಲ್ಲನ್ನು ಬಳಸಿ ತಲೆಗೆ ಜಜ್ಜಿ ರಕ್ಕಸನಂತೆ ಎಲ್ಲರನ್ನೂ ಹತ್ಯೆಗೈದಿದ್ದಾನೆ.

ಕೊಲೆಗಳ ಬಳಿಕ ಯಾವುದೇ ಸಾಕ್ಷ್ಯ ಸಿಗದಂತೆ ಎಚ್ಚರಿಕೆ ವಹಿಸಿದ್ದ ಆತ, ಮೃತದೇಹಗಳನ್ನು ಗೋಣಿಚೀಲಗಳಲ್ಲಿ ಕಟ್ಟಿ, ತಾನು ಚಾಲನೆ ಮಾಡುತ್ತಿದ್ದ ಕ್ಯಾಬ್‌ ಕಾರಿನಲ್ಲೇ ಸಾಗಿಸಿ ನಂದಿ ಬೆಟ್ಟದ ತಪ್ಪಲು ಹಾಗೂ ವಿವಿಧ ನಿರ್ಜನ ಅರಣ್ಯ ಪ್ರದೇಶಗಳಲ್ಲಿ ಬೇರೆ ಬೇರೆ ಕಡೆ ಎಸೆದಿದ್ದಾನೆ. ಅಷ್ಟೇ ಅಲ್ಲದೆ, ಕೃತ್ಯದ ಬಳಿಕ ತಾನೇ ಖುದ್ದಾಗಿ ಶ್ರೀರಾಂಪುರ ಪೊಲೀಸ್ ಠಾಣೆಗೆ ತೆರಳಿ, ತನ್ನ ಹೆಂಡತಿ ಹಾಗೂ ಕುಟುಂಬದವರು 15 ದಿನಗಳಿಂದ ನಾಪತ್ತೆಯಾಗಿದ್ದಾರೆ ಎಂದು ನಾಪತ್ತೆ ದೂರು ದಾಖಲಿಸಿ ಪೊಲೀಸರ ಕಣ್ಣಿಗೆ ಮಣ್ಣೆರಚಲು ಯತ್ನಿಸಿದ್ದ.

13 ವರ್ಷದ ಬಾಲಕನಿಂದ ಬಯಲಾಯ್ತು ಕೊಲೆ ರಹಸ್ಯ

ತನಿಖೆ ವೇಳೆ ಪೊಲೀಸರು ಶೇಖರ್‌ನನ್ನು ವಶಕ್ಕೆ ಪಡೆದು ತೀವ್ರ ವಿಚಾರಣೆ ನಡೆಸಿದಾಗ ಅತಿ ಭಯಾನಕ ಸಂಗತಿಗಳು ಹೊರಬಂದಿವೆ. ಈ ಎಲ್ಲಾ ಕೃತ್ಯ ನಡೆಯುವ ಸಂದರ್ಭದಲ್ಲಿ ಹಂತಕನ ಜೊತೆಯೇ ಇದ್ದ 13 ವರ್ಷದ ಬಾಲಕನೊಬ್ಬ (ಸುನಿತಾಳ ಅಣ್ಣನ ಮಗ) ನೀಡಿದ ಸಾಕ್ಷ್ಯವು ಪೊಲೀಸರ ಬೆಚ್ಚಿಬೀಳುವಂತೆ ಮಾಡಿದೆ. ಹಂತಕ ಶೇಖರ್ ಶವಗಳನ್ನು ಕಾರಿನ ಡಿಕ್ಕಿಯಲ್ಲಿ ತುಂಬಿಕೊಂಡು ಹೋಗಿ ನಿರ್ಜನ ಪ್ರದೇಶದಲ್ಲಿ ಚೀಲಗಳನ್ನು ಎಸೆದು ಬರುವುದನ್ನು ಕಣ್ಣಾರೆ ಕಂಡಿರುವುದಾಗಿ ಆ ಬಾಲಕ ಬಿಚ್ಚಿಟ್ಟಿದ್ದಾನೆ. ತನ್ನ ತಂದೆ-ತಾಯಿ ಹಾಗೂ ಇತರೆ ಸಂಬಂಧಿಕರು ಬದುಕಿಲ್ಲ ಎಂಬುದು ಕೂಡ ಆರಂಭದಲ್ಲಿ ಆ ಕಂದಮ್ಮನಿಗೆ ತಿಳಿದಿರಲಿಲ್ಲ.

ಈ ಕೃತ್ಯದಲ್ಲಿ ಹಂತಕನಿಗೆ ಆತನ 17 ವರ್ಷದ ಅಪ್ರಾಪ್ತ ಮಗಳು ಕೂಡ ಸಾಥ್ ನೀಡಿರುವುದು ತನಿಖೆಯಿಂದ ತಿಳಿದುಬಂದಿದೆ. ಸದ್ಯ ಪ್ರಕರಣ ದಾಖಲಿಸಿಕೊಂಡಿರುವ ರಾಜಾಜಿನಗರ ಹಾಗೂ ಶ್ರೀರಾಂಪುರ ಪೊಲೀಸರು ಜಂಟಿಯಾಗಿ ತನಿಖೆ ಮುಂದುವರಿಸಿದ್ದಾರೆ. ಆರೋಪಿಯನ್ನು ಬಂಧಿಸಿ ತೀವ್ರ ವಿಚಾರಣೆ ನಡೆಸುತ್ತಿದ್ದು, ಆತ ಎಸೆದಿರುವ ಇನ್ನುಳಿದ ಮೃತದೇಹಗಳ ಪತ್ತೆಗಾಗಿ ನಂದಿ ಬೆಟ್ಟ ಹಾಗೂ ವಿವಿಧ ಅರಣ್ಯ ಪ್ರದೇಶಗಳಲ್ಲಿ ಶೋಧ ಕಾರ್ಯವನ್ನು ತೀವ್ರಗೊಳಿಸಲಾಗಿದೆ.
#BengaluruCrime #SrirampuraMurder #MassMurder #NandiHills #UdayakalaNews #KarnatakaPolice #CrimeNews #TamilNaduNews