ಭದ್ರತಾ ಚರ್ಚೆಯಲ್ಲೇ ರಷ್ಯಾ ಮೇಲೆ ಉಕ್ರೇನ್‌ನಿಂದ 1,200 ಡ್ರೋನ್ ದಾಳಿ, ಏಳು ಸಾವು

ಕೀವ್‌ (ಉಕ್ರೇನ್‌) : ಅಮೆರಿಕ ಮತ್ತು ರಷ್ಯಾ ನಡುವೆ ಯುದ್ಧ ಕೊನೆಗೊಳಿಸುವ ಕುರಿತ ಮಾತುಕತೆಗಳು ಹಾಗೂ ಶೀತಲ ಸಮರದ ನಂತರದ ಯುರೋಪಿಯನ್ ಭದ್ರತಾ ವ್ಯವಸ್ಥೆಗಳ ಬಗ್ಗೆ ಚರ್ಚೆಗಳು ನಡೆಯುತ್ತಿರುವ ಬೆನ್ನಲ್ಲೇ, ಉಕ್ರೇನ್ ರಷ್ಯಾ ನೆಲೆಗಳ ಮೇಲೆ ಬೃಹತ್ ವೈಮಾನಿಕ ದಾಳಿ ನಡೆಸಿದೆ. ಮಾಸ್ಕೋ ವಿರುದ್ಧ ಕಳೆದ ಕೆಲವು ವರ್ಷಗಳಲ್ಲಿ ನಡೆದ ಅತ್ಯಂತ ದೊಡ್ಡ ವಾಯು ದಾಳಿ ಇದಾಗಿದ್ದು, ರಾತ್ರಿ ಪೂರ್ತಿ 1,200ಕ್ಕೂ ಹೆಚ್ಚು ಡ್ರೋನ್‌ಗಳನ್ನು ಬಳಸಿ ಉಕ್ರೇನ್ ಭೀಕರ ದಾಳಿ ನಡೆಸಿದೆ. ಈ ಬೆಳವಣಿಗೆಯು ಜಾಗತಿಕ ರಾಜಕಾರಣದಲ್ಲಿ ತೀವ್ರ ಸಂಚಲನ ಮೂಡಿಸಿದೆ.

ಯುರೋಪಿಯನ್ ಭದ್ರತಾ ವ್ಯವಸ್ಥೆ ಚರ್ಚೆ ಮತ್ತು ನ್ಯಾಟೋ ಭವಿಷ್ಯದ ಆತಂಕ

ಯುದ್ಧವನ್ನು ಕೊನೆಗೊಳಿಸುವ ನಿಟ್ಟಿನಲ್ಲಿ ಅಬುಧಾಬಿಯಲ್ಲಿ ರಷ್ಯಾ ಮತ್ತು ಉಕ್ರೇನ್ ನಿಯೋಗಗಳೊಂದಿಗೆ ಅಮೆರಿಕದ ಪ್ರತಿನಿಧಿಗಳಾದ ಸ್ಟೀವ್ ವಿಟ್‌ಕಾಫ್ ಮತ್ತು ಜ್ಯಾರೆಡ್ ಕುಶ್ನರ್ ಎರಡು ದಿನಗಳ ಮಹತ್ವದ ಮಾತುಕತೆ ನಡೆಸಿದ್ದಾರೆ. ಮಾತುಕತೆ ಬಳಿಕ ಅಮೆರಿಕದ ಪ್ರತಿನಿಧಿಗಳು ಕ್ರೆಮ್ಲಿನ್‌ನಲ್ಲಿ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಹಾಗೂ ಡಬ್ಲಿನ್‌ನಲ್ಲಿ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಅವರನ್ನು ಭೇಟಿ ಮಾಡಿ ಮಾಹಿತಿ ನೀಡಿದ್ದಾರೆ.

ಆದರೆ, ಈ ಮಾತುಕತೆಗಳಲ್ಲಿ ಶೀತಲ ಸಮರದ ನಂತರ ರೂಪಿಸಲಾದ ವಿಶಾಲ ಯುರೋಪಿಯನ್ ಭದ್ರತಾ ವ್ಯವಸ್ಥೆಗಳ ಬಗ್ಗೆಯೂ ಚರ್ಚಿಸುತ್ತಿರುವುದು ಯುರೋಪಿಯನ್ ನಾಯಕರಲ್ಲಿ ತೀವ್ರ ಆತಂಕಕ್ಕೆ ಕಾರಣವಾಗಿದೆ. ಮಾಸ್ಕೋ ಬಹಳ ಹಿಂದಿನಿಂದಲೂ ಬಯಸಿದ್ದ ಈ ಬದಲಾವಣೆಯು ನ್ಯಾಟೋ (NATO) ಸಂಘಟನೆಯ ಭವಿಷ್ಯದ ಪಾತ್ರದ ಬಗ್ಗೆಯೂ ಗಂಭೀರ ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ರಷ್ಯಾ ಯುರೋಪಿಯನ್ ಭದ್ರತಾ ವ್ಯವಸ್ಥೆಯ ಬಗ್ಗೆ ಚರ್ಚಿಸಲು ಬಯಸುತ್ತದೆ, ಆದರೆ ನ್ಯಾಟೋ ಇರುವಾಗ ನಮಗೆ ಅದರ ಅಗತ್ಯವಿಲ್ಲ ಎಂದು ಜರ್ಮನ್ ಚಾನ್ಸೆಲರ್ ಫ್ರೆಡ್ರಿಕ್ ಮೆರ್ಜ್ ಸ್ಪಷ್ಟಪಡಿಸಿದ್ದಾರೆ.

ಡ್ರೋನ್‌ಗಳ ಸುರಿಮಳೆ: ತೈಲ ಸಂಸ್ಕರಣಾಗಾರ ಧ್ವಂಸ

ಶಾಂತಿ ಪ್ರಯತ್ನಗಳ ನಡುವೆಯೇ ಉಕ್ರೇನ್ ರಷ್ಯಾ ಮೇಲೆ ಮುಗಿಬಿದ್ದಿದೆ. ರಷ್ಯಾದ ರಕ್ಷಣಾ ಸಚಿವಾಲಯದ ಪ್ರಕಾರ, ಗುರುವಾರ ತಡರಾತ್ರಿಯಿಂದ ಶುಕ್ರವಾರದವರೆಗೆ ವಾಯು ರಕ್ಷಣಾ ಪಡೆಗಳು ಬಲಪ್ರಯೋಗಿಸಿ ಉಕ್ರೇನ್‌ನ 1,198 ದೀರ್ಘ ಶ್ರೇಣಿಯ ಡ್ರೋನ್‌ಗಳನ್ನು ಹೊಡೆದುರುಳಿಸಿವೆ. ಆದರೂ, ರಷ್ಯಾದ ಮೂರು ಪ್ರದೇಶಗಳ ಮೇಲಿನ ದಾಳಿಯಲ್ಲಿ 12 ವರ್ಷದ ಬಾಲಕ ಸೇರಿದಂತೆ 7 ಜನರು ಸಾವನ್ನಪ್ಪಿದ್ದು, 17 ಜನ ಗಾಯಗೊಂಡಿದ್ದಾರೆ. ವೋಲ್ಗೊಗ್ರಾಡ್‌ನಲ್ಲಿರುವ ಬೃಹತ್ ತೈಲ ಸಂಸ್ಕರಣಾಗಾರಕ್ಕೆ ಡ್ರೋನ್ ಡಿಕ್ಕಿಹೊಡೆದು ಭಾರಿ ಬೆಂಕಿ ಹೊತ್ತಿಕೊಂಡಿದೆ.

ಉಕ್ರೇನ್ ನಿರಂತರವಾಗಿ ರಷ್ಯಾದ ತೈಲ ಸಂಸ್ಕರಣಾಗಾರಗಳನ್ನು ಗುರಿಯಾಗಿಸುತ್ತಿದ್ದು, ರಷ್ಯಾದ ಒಟ್ಟು ತೈಲ ಸಂಸ್ಕರಣಾ ಸಾಮರ್ಥ್ಯದ ಅರ್ಧಕ್ಕಿಂತ ಹೆಚ್ಚಿನ ಭಾಗವನ್ನು ನಿಷ್ಕ್ರಿಯಗೊಳಿಸಿರುವುದಾಗಿ ಹೇಳಿಕೊಂಡಿದೆ. ಮತ್ತೊಂದೆಡೆ, ರಷ್ಯಾ ರಾತ್ರೋರಾತ್ರಿ ಉಕ್ರೇನ್ ಮೇಲೆ 117 ಡ್ರೋನ್‌ಗಳಿಂದ ದಾಳಿ ನಡೆಸಿದ್ದು, 17 ವರ್ಷದ ಯುವಕ ಸೇರಿದಂತೆ ಕನಿಷ್ಠ ಇಬ್ಬರು ಮೃತಪಟ್ಟಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ. ಈ ಯುದ್ಧವು ಮತ್ತಷ್ಟು ಉಲ್ಬಣಗೊಳ್ಳುವ ಸೂಚನೆ ನೀಡಿದೆ.
#RussiaUkraineWar #DroneAttack #USMediation #EuropeanSecurity #NATO #UdayakalaNews #GlobalPolitics #Volgograd