5.20 ಲಕ್ಷ ಸೈಬರ್ ವಂಚನೆ ಹಣ ವರ್ಗಾಯಿಸಿ ಯುವಕನಿಗೆ ವಂಚಿಸಿದ ಗೆಳೆಯ

ಉದಯಕಾಲ ನ್ಯೂಸ್‌, ಮಂಗಳೂರು: ಸ್ನೇಹಿತನ ನಂಬಿಕೆಯನ್ನು ಸಂಪೂರ್ಣವಾಗಿ ದುರುಪಯೋಗಪಡಿಸಿಕೊಂಡು, ಸೈಬರ್ ವಂಚನೆಯ ಲಕ್ಷಾಂತರ ರೂಪಾಯಿ ಹಣವನ್ನು ಆತನ ಬ್ಯಾಂಕ್ ಖಾತೆಗೆ ವರ್ಗಾಯಿಸಿ, ಬಳಿಕ ಅದನ್ನು ನಗದು ರೂಪದಲ್ಲಿ ಪಡೆದು ಯುವಕನೊಬ್ಬನನ್ನು ಗಂಭೀರ ಸೈಬರ್ ಅಪರಾಧ ಪ್ರಕರಣದಲ್ಲಿ ಸಿಲುಕಿಸಿರುವ ವಂಚನೆ ಪ್ರಕರಣ ಮಂಗಳೂರಿನಲ್ಲಿ ಬೆಳಕಿಗೆ ಬಂದಿದೆ. ಈ ಕುರಿತು ಮಂಗಳೂರು ನಗರದ ಸಿಇಎನ್ (CEN) ಅಪರಾಧ ಪೊಲೀಸ್ ಠಾಣೆಯಲ್ಲಿ ಅಧಿಕೃತವಾಗಿ ಪ್ರಕರಣ ದಾಖಲಾಗಿದೆ ಎಂದು ಪೊಲೀಸರ ಪ್ರಕಟಣೆ ತಿಳಿಸಿದೆ.

ಬೈಕಂಪಾಡಿ ಇಂಡಸ್ಟ್ರಿಯಲ್ ಏರಿಯಾದ ಅಂಗಾರಗುಂಡಿ ನಿವಾಸಿ ಅಸ್ವೀರ್ (34) ಎಂಬಾತನೇ ಈ ಕೃತ್ಯ ಎಸಗಿರುವ ಆರೋಪಿಯಾಗಿದ್ದು, ಆತನ ಸ್ನೇಹಿತ ಮಹಮ್ಮದ್ ಝುಬೇರ್ ಅಲಿ (33) ಎಂಬುವವರು ದೂರು ನೀಡಿದ್ದಾರೆ.

ಸ್ನೇಹದ ಹೆಸರಲ್ಲಿ ಮೋಸ, ನಗದು ಡ್ರಾ

ಘಟನೆಯ ಹಿನ್ನೆಲೆ ಕುರಿತು ದೂರಿನಲ್ಲಿ ಮಾಹಿತಿ ನೀಡಲಾಗಿದ್ದು, 2025ರ ಮಾರ್ಚ್ ತಿಂಗಳ ಎರಡನೇ ವಾರದಲ್ಲಿ ಆರೋಪಿ ಅಸ್ವೀರ್, ದೂರುದಾರ ಮಹಮ್ಮದ್ ಝುಬೇರ್ ಅಲಿ ಹಿಂದೆ ಕೆಲಸ ಮಾಡುತ್ತಿದ್ದ ‘ಎಂ.ಎಂ ಕಮ್ಯೂನಿಕೇಶನ್’ ಮೊಬೈಲ್ ಶಾಪ್‌ಗೆ ಭೇಟಿ ನೀಡಿದ್ದನು. ಆ ಸಂದರ್ಭದಲ್ಲಿ, ನನ್ನ ಬ್ಯಾಂಕ್ ಖಾತೆ ಬ್ಲಾಕ್ ಆಗಿದೆ, ನನಗೆ ವಿದೇಶದಿಂದ ಹಣ ಬರಬೇಕಿದೆ. ಹೀಗಾಗಿ ನಿನ್ನ ಬ್ಯಾಂಕ್ ಖಾತೆಗೆ ಆ ಹಣವನ್ನು ವರ್ಗಾಯಿಸುತ್ತೇನೆ, ನೀನು ಅದನ್ನು ಬ್ಯಾಂಕ್‌ನಿಂದ ನಗದು ರೂಪದಲ್ಲಿ ತೆಗೆದುಕೊಡು ಎಂದು ಆರೋಪಿ ಅಸ್ವೀರ್ ವಿನಂತಿಸಿಕೊಂಡಿದ್ದನು.

ಮೊದಲಿಗೆ ಈ ವ್ಯವಹಾರಕ್ಕೆ ಝುಬೇರ್ ಅಲಿ ಹಿಂದೇಟು ಹಾಕಿ ನಿರಾಕರಿಸಿದ್ದರೂ, ಅಸ್ವೀರ್ ಪದೇ ಪದೆ ಒತ್ತಾಯ ಮಾಡಿ ಕಾಡಿದ್ದರಿಂದ ಸ್ನೇಹಿತನೆಂಬ ನಂಬಿಕೆಯ ಮೇಲೆ ಝುಬೇರ್ ಇದಕ್ಕೆ ಒಪ್ಪಿಕೊಂಡಿದ್ದರು. ಅದರಂತೆ, 2025ರ ಮಾರ್ಚ್ 10ರಂದು ಝುಬೇರ್ ಅಲಿ ಅವರ ಕೆನರಾ ಬ್ಯಾಂಕ್ ಖಾತೆಗೆ ಆರ್‌ಟಿಜಿಎಸ್ (RTGS) ಮೂಲಕ ಬರೋಬ್ಬರಿ 5,20,000 ರೂ. ಜಮೆಯಾಗಿತ್ತು. ಹಣ ಜಮೆಯಾದ ತಕ್ಷಣವೇ ಅಸ್ವೀರ್ ಸ್ಕ್ರೀನ್‌ಶಾಟ್ ಕಳುಹಿಸಿ ವಾಟ್ಸ್​ಆ್ಯಪ್ ಮೂಲಕ ಕರೆ ಮಾಡಿ ಹಣವನ್ನು ಡ್ರಾ ಮಾಡಿಕೊಡುವಂತೆ ತುರ್ತಾಗಿ ತಿಳಿಸಿದ್ದನು.

ಅದೇ ದಿನ ಮಧ್ಯಾಹ್ನ 3 ಗಂಟೆಯ ಸುಮಾರಿಗೆ ಇಬ್ಬರೂ ಬೈಕಂಪಾಡಿ ಇಂಡಸ್ಟ್ರಿಯಲ್ ಏರಿಯಾದ ಕೆನರಾ ಬ್ಯಾಂಕ್ ಶಾಖೆಗೆ ತೆರಳಿದ್ದರು. ಈ ವೇಳೆ ಅಸ್ವೀರ್ ಬ್ಯಾಂಕಿನ ಒಳಗೆ ಬಾರದೆ ಹೊರಗೆ ಕಾರಿನಲ್ಲೇ ಕುಳಿತಿದ್ದ. ಝುಬೇರ್ ಬ್ಯಾಂಕ್ ಒಳಗೆ ಹೋಗಿ ಚೆಕ್ ಮೂಲಕ 5,10,000 ರೂ. ನಗದು ಡ್ರಾ ಮಾಡಿ ತಂದು ನೇರವಾಗಿ ಅಸ್ವೀರ್ ಕೈಗೆ ಒಪ್ಪಿಸಿದ್ದ.

ಪೊಲೀಸ್ ಠಾಣೆಗಳಲ್ಲಿ ದೂರು – ಬಯಲಾಯ್ತು ವಂಚನೆ

ಎಲ್ಲವೂ ಸರಾಗವಾಗಿ ನಡೆಯಿತು ಎಂದುಕೊಂಡಿದ್ದ ದೂರುದಾರ ಝುಬೇರ್ ಅಲಿ ಅವರಿಗೆ ಕೆಲಕಾಲದ ಬಳಿಕ ಆಘಾತ ಕಾದಿತ್ತು. ಇತ್ತೀಚೆಗೆ ತಮ್ಮ ಬ್ಯಾಂಕ್ ಖಾತೆಯ ಮೇಲೆ ಆನ್‌ಲೈನ್ ಮೂಲಕ ದೂರುಗಳು ದಾಖಲಾಗಿರುವ ಬಗ್ಗೆ ಮಾಹಿತಿ ತಿಳಿದು ಬಂದ ಹಿನ್ನೆಲೆಯಲ್ಲಿ, ಅವರು ಬ್ಯಾಂಕ್‌ಗೆ ತೆರಳಿ ವಿಚಾರಣೆ ನಡೆಸಿದಾಗ ಅಸಲಿ ಸತ್ಯ ಹೊರಬಂತು.

ಆರೋಪಿ ಅಸ್ವೀರ್, ಸೈಬರ್ ವಂಚನೆಯ ಮೂಲಕ ಗಳಿಸಿದ ಅಕ್ರಮ ಹಣವನ್ನು ತನ್ನ ಖಾತೆಗೆ ಬದಲಾಗಿ ಝುಬೇರ್ ಬ್ಯಾಂಕ್ ಖಾತೆಗೆ ವರ್ಗಾಯಿಸಿ, ಬಳಿಕ ಚೆಕ್ ಮೂಲಕ ನಗದು ರೂಪದಲ್ಲಿ ಪಡೆದು ವ್ಯವಸ್ಥಿತವಾಗಿ ವಂಚಿಸಿರುವುದು ಇದರಿಂದ ಸಾಬೀತಾಯಿತು. ಈ ಅಕ್ರಮ ಆರ್ಥಿಕ ವಹಿವಾಟಿನ ಕಾರಣದಿಂದಾಗಿ ನಿರಪರಾಧಿಯಾದ ಝುಬೇರ್ ಅವರ ಬ್ಯಾಂಕ್ ಖಾತೆಯ ವಿರುದ್ಧ ಇದೀಗ ದೇಶದ ವಿವಿಧ ರಾಜ್ಯಗಳ ಪೊಲೀಸ್ ಠಾಣೆಗಳಲ್ಲಿ ಸೈಬರ್ ಕ್ರೈಂ ದೂರುಗಳು ದಾಖಲಾಗಿವೆ.

ತನ್ನ ಸ್ನೇಹವನ್ನು ದುರುಪಯೋಗಪಡಿಸಿಕೊಂಡು, ಸೈಬರ್ ವಂಚನೆ ಜಾಲದಲ್ಲಿ ಸಿಲುಕಿಸಿರುವ ಅಸ್ವೀರ್ ವಿರುದ್ಧ ಕೂಡಲೇ ಕಾನೂನು ಕ್ರಮ ಜರುಗಿಸುವಂತೆ ಮಹಮ್ಮದ್ ಝುಬೇರ್ ಅಲಿ ಮಂಗಳೂರು ಸಿಇಎನ್ ಠಾಣೆಗೆ ದೂರು ನೀಡಿದ್ದು, ಪೊಲೀಸರು ಈ ಬಗ್ಗೆ ತೀವ್ರ ತನಿಖೆ ಮುಂದುವರಿಸಿದ್ದಾರೆ.
#CyberFraud #MangaloreNews #CENPolice #BankFraud #FriendshipBetrayal #CrimeNews #UdayakalaNews