ರಾಕ್ ಸ್ಟಾರ್ ಅನಿರುದ್ಧ್ – ಐಪಿಎಲ್ ಸುಂದರಿ ಕಾವ್ಯಾ ಮಾರನ್ ವಿವಾಹ: ನವೆಂಬರ್ 21ಕ್ಕೆ ಅದ್ಧೂರಿ ಆರಕ್ಷತೆ!

ಉದಯಕಾಲ ನ್ಯೂಸ್,ಚೆನ್ನೈ: ದಕ್ಷಿಣ ಭಾರತದ ಚಿತ್ರರಂಗ ಹಾಗೂ ಕ್ರಿಕೆಟ್ ವಲಯದಲ್ಲಿ ಕಳೆದ ಕೆಲವು ತಿಂಗಳುಗಳಿಂದ ಹರಿದಾಡುತ್ತಿದ್ದ ಗಾಸಿಪ್‌ಗಳಿಗೆ ಕೊನೆಗೂ ಅಧಿಕೃತ ಮುದ್ರೆ ಬಿದ್ದಿದೆ. ಸನ್ ಗ್ರೂಪ್ ಮುಖ್ಯಸ್ಥ ಕಲಾನಿಧಿ ಮಾರನ್ ಪುತ್ರಿ, ಸನ್‌ರೈಸರ್ಸ್ ಹೈದರಾಬಾದ್ (SRH) ತಂಡದ ಸಹ-ಮಾಲಕಿ ಕಾವ್ಯಾ ಮಾರನ್ ಹಾಗೂ ಟಾಲಿವುಡ್/ಕಾಲಿವುಡ್‌ನ ಖ್ಯಾತ ಸಂಗೀತ ನಿರ್ದೇಶಕ ‘ರಾಕ್ ಸ್ಟಾರ್’ ಅನಿರುದ್ಧ್ ರವಿಚಂದರ್ ಅವರ ವಿವಾಹ ಮಹೋತ್ಸವವು ಅತ್ಯಂತ ಅದ್ಧೂರಿಯಾಗಿ ನೆರವೇರಲು ಸಿದ್ಧತೆಗಳು ನಡೆದಿವೆ.

ನವೆಂಬರ್ 11ರಂದು ವಿದೇಶದ ರಮಣೀಯ ತಾಣವಾದ ಗ್ರೀಸ್‌ನಲ್ಲಿ ಈ ಜೋಡಿಯ ವಿವಾಹ ಮಹೋತ್ಸವವು ಕೆಲವೇ ಕೆಲವು ಆಪ್ತರು ಹಾಗೂ ಕುಟುಂಬದವರ ಸಮ್ಮುಖದಲ್ಲಿ ಗುಟ್ಟಾಗಿ ಜರುಗಲಿದೆ ಎನ್ನಲಾಗಿದ್ದು, ತದನಂತರ ನವೆಂಬರ್ 21ರಂದು ಚೆನ್ನೈನ ಪ್ರತಿಷ್ಠಿತ ಹೋಟೆಲ್‌ನಲ್ಲಿ ಚಿತ್ರರಂಗ ಹಾಗೂ ರಾಜಕೀಯ ಗಣ್ಯರಿಗಾಗಿ ಬೃಹತ್ ಹಾಗೂ ಅದ್ಧೂರಿ ಆರತಕ್ಷತೆ (Wedding Reception) ಕಾರ್ಯಕ್ರಮ ಆಯೋಜಿಸಲಾಗಿದೆ.

ತೆಲಂಗಾಣ ಸಿಎಂ ಭೇಟಿ ನೀಡಿ ಆಹ್ವಾನ ನೀಡಿದ ಮಾರನ್ ದಂಪತಿ

ಮದುವೆ ಹಾಗೂ ಆರತಕ್ಷತೆ ಸುದ್ದಿಯನ್ನು ಸ್ವತಃ ತೆಲಂಗಾಣ ಮುಖ್ಯಮಂತ್ರಿಗಳ ಕಚೇರಿಯೇ ಖಚಿತಪಡಿಸಿದೆ. ಸನ್ ಗ್ರೂಪ್ ಚೇರ್‌ಮನ್ ಕಲಾನಿಧಿ ಮಾರನ್ ಹಾಗೂ ಕಾವೇರಿ ಮಾರನ್ ದಂಪತಿಯು ಹೈದರಾಬಾದ್‌ನ ಜುಬಿಲಿ ಹಿಲ್ಸ್‌ನಲ್ಲಿರುವ ನಿವಾಸದಲ್ಲಿ ತೆಲಂಗಾಣ ಮುಖ್ಯಮಂತ್ರಿ ಎ. ರೇವಂತ್ ರೆಡ್ಡಿ ಅವರನ್ನು ನೇರವಾಗಿ ಭೇಟಿಯಾಗಿ, ತಮ್ಮ ಮಗಳ ವಿವಾಹದ ಆರತಕ್ಷತೆಗೆ ಖುದ್ದಾಗಿ ಆಹ್ವಾನಿಸಿದ್ದಾರೆ. ಸಿಎಂ ಕಚೇರಿಯ ಅಧಿಕೃತ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ಈ ಫೋಟೋಗಳು ವೈರಲ್ ಆಗುತ್ತಿದ್ದಂತೆ ಅಭಿಮಾನಿಗಳ ಕಾತುರ ಹೆಚ್ಚಾಗಿದೆ.

ಊಹಾಪೋಹಗಳಿಗೆ ಅಧಿಕೃತ ವಿರಾಮ

ಕಳೆದ 2025ರಿಂದಲೂ ಅನಿರುದ್ಧ್ ಮತ್ತು ಕಾವ್ಯಾ ಮಾರನ್ ಪರಸ್ಪರ ಪ್ರೀತಿಸುತ್ತಿದ್ದಾರೆ ಮತ್ತು ಶೀಘ್ರದಲ್ಲೇ ಹಸೆಮಣೆ ಏರಲಿದ್ದಾರೆ ಎಂಬ ವಾದಗಳು ಕೇಳಿಬರುತ್ತಿದ್ದವು. ವಿದೇಶಗಳಲ್ಲಿ ಒಟ್ಟಿಗೆ ಡಿನ್ನರ್ ಡೇಟ್‌ನಲ್ಲಿ ಕಾಣಿಸಿಕೊಂಡಿದ್ದು ಭಾರೀ ಚರ್ಚೆಗೆ ಗ್ರಾಸವಾಗಿತ್ತು. ಆರಂಭದಲ್ಲಿ ಈ ಬಗ್ಗೆ ಪ್ರತಿಕ್ರಿಯಿಸಿದ್ದ ಅನಿರುದ್ಧ್, “ಮದುವೆಯಾ? ಹಹಹ… ಸುಮ್ಮನಿರಿ ಗೈಸ್, ಇಂತಹ ವೃಥಾ ವಾರ್ತೆಗಳನ್ನು ಹಬ್ಬಿಸಬೇಡಿ” ಎಂದು ನಗುಳುತ್ತಾ ತಳ್ಳಿಹಾಕಿದ್ದರು. ಆದರೆ, ಈ ವರ್ಷದ ಜೂನ್‌ನಲ್ಲಿ ಅನಿರುದ್ಧ್ ಅವರ ಚಿಕ್ಕಪ್ಪ ಹಾಗೂ ಹಿರಿಯ ನಟ ವೈ.ಜಿ. ಮಹೇಂದ್ರನ್ ಸಂದರ್ಶನವೊಂದರಲ್ಲಿ, “ಕಾವ್ಯಾ ಮಾರನ್ ಸಾಮಾನ್ಯ ಹೆಣ್ಣಲ್ಲ, ತನ್ನ ತಂದೆಯಂತೆ ಬ್ಯುಸಿನೆಸ್ ಸಾಮ್ರಾಜ್ಯವನ್ನು ಸಮರ್ಥವಾಗಿ ನಡೆಸಬಲ್ಲ ಸಮರ್ಥೆ, ಅವರಿಬ್ಬರ ಜೋಡಿ ಚೆನ್ನಾಗಿದೆ” ಎಂದು ಹೇಳುವ ಮೂಲಕ ಈ ಮದುವೆ ನಡೆಯುವುದನ್ನು ಪರೋಕ್ಷವಾಗಿ ಖಚಿತಪಡಿಸಿದ್ದರು.

ಮ್ಯಾಚಿಂಗ್ ಜೋಡಿಗೆ ಹರಿದುಬರುತ್ತಿರುವ ಶುಭ ಹಾರೈಕೆಗಳು

33 ವರ್ಷ ವಯಸ್ಸಿನ ಕಾವ್ಯಾ ಮಾರನ್ ಕ್ರಿಕೆಟ್ ಮೈದಾನದಲ್ಲಿ ತಮ್ಮ ಕ್ಯೂಟ್ ರಿಯಾಕ್ಷನ್‌ಗಳ ಮೂಲಕವೇ ಕೋಟ್ಯಂತರ ಅಭಿಮಾನಿಗಳನ್ನು ಹೊಂದಿದ್ದರೆ, 35 ವರ್ಷದ ಅನಿರುದ್ಧ್ ರವಿಚಂದರ್ ತಮ್ಮ ಸೂಪರ್‌ಹಿಟ್ ಸಂಗೀತದ ಮೂಲಕ ಜಗತ್ತಿನಾದ್ಯಂತ ಯುವಜನತೆಯನ್ನು ಕುಣಿಸುತ್ತಿದ್ದಾರೆ. ಸ್ಟೇಟಸ್ ಹಾಗೂ ವಯಸ್ಸಿನ ದೃಷ್ಟಿಯಿಂದಲೂ ಈ ಜೋಡಿ ಸಖತ್ ಮ್ಯಾಚ್ ಆಗುತ್ತದೆ ಎಂದು ಅಭಿಮಾನಿಗಳು ಅಭಿಪ್ರಾಯಪಟ್ಟಿದ್ದಾರೆ. ಒಟ್ಟಿನಲ್ಲಿ ಕ್ರಿಕೆಟ್ ಮತ್ತು ಮನರಂಜನಾ ಲೋಕದ ದಿಗ್ಗಜರ ಕುಟುಂಬಗಳು ಒಂದಾಗುತ್ತಿರುವುದು ಸದ್ಯದ ಹಾಟ್ ಟಾಪಿಕ್ ಆಗಿದೆ.
#KavyaMaran #AnirudhRavichander #AnirudhKavyaWedding #SunrisersHyderabad #SRH #Kollywood #Tollywood #UdayakalaNews #CelebrityWedding #KalanithiMaran #RevanthReddy