ಜೆನ್ ಝೀಗಳು ಹಿಂದುತ್ವದೊಂದಿಗೆ ಗುರುತಿಸಿಕೊಳ್ಳುವರೇ?: ಯುವ ಮತದಾರರನ್ನು ಸೆಳೆಯಲು ಮುಂದಾದ ಬಿಜೆಪಿ!

ಉದಯಕಾಲ ನ್ಯೂಸ್, ನವದೆಹಲಿ: ಇಂದಿನ ಡಿಜಿಟಲ್ ಯುಗದ ಯುವಪೀಳಿಗೆ ಅಂದರೆ ‘ಜೆನ್ ಝೀ’ (Gen Z) ಯುವಕರು ರಾಜಕೀಯ ಹಾಗೂ ಧರ್ಮದ ಬಗ್ಗೆ ಏನು ಯೋಚಿಸುತ್ತಿದ್ದಾರೆ? ಅವರು ಹಿಂದುತ್ವದ ವಿಚಾರಧಾರೆಯೊಂದಿಗೆ ತಮ್ಮನ್ನು ಗುರುತಿಸಿಕೊಳ್ಳುತ್ತಾರೆಯೇ? ಎಂಬ ಗಂಭೀರ ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳಲು ಭಾರತೀಯ ಜನತಾ ಪಕ್ಷ (BJP) ಕಸರತ್ತು ಆರಂಭಿಸಿದೆ.

ದೇಶದ ಹೊಸ ತಲೆಮಾರಿನ ಯುವಕರ ನಾಡಿಮಿಡಿತ ಅರಿಯಲು ಹಾಗೂ ಅವರೊಂದಿಗೆ ಪರಿಣಾಮಕಾರಿಯಾಗಿ ಸಂವಹನ ನಡೆಸಲು ಬಿಜೆಪಿ ಹೈಕಮಾಂಡ್ ವಿಶೇಷ ರಣತಂತ್ರ ರೂಪಿಸಿದೆ. ಕೇಂದ್ರ ಯುವ ವ್ಯವಹಾರಗಳ ಸಚಿವ ಮನ್ಸುಖ್ ಮಾಂಡವಿಯಾ ಅವರ ಮಾರ್ಗದರ್ಶನದಲ್ಲಿ 80 ಸದಸ್ಯರ ಉನ್ನತ ಮಟ್ಟದ ಆಂತರಿಕ ಕಾರ್ಯಪಡೆಯನ್ನು (Internal Working Group) ರಚಿಸಲಾಗಿದ್ದು, ಈ ತಂಡವು ಆರು ಪ್ರತ್ಯೇಕ ಗುಂಪುಗಳಾಗಿ ವಿಂಗಡಗೊಂಡು ವರದಿ ಸಿದ್ಧಪಡಿಸುತ್ತಿದೆ. ಕಳೆದ ಕೆಲವು ತಿಂಗಳುಗಳಲ್ಲಿ ಈ ಸಮಿತಿಯು ಮೂರು ಪ್ರಮುಖ ಸಭೆಗಳನ್ನು ನಡೆಸಿ ಸಮಾಲೋಚನೆ ನಡೆಸಿದೆ.

ಸಮಿತಿಯಲ್ಲಿ ಸದಸ್ಯರ ಪಟ್ಟಿ

ಪಕ್ಷದ ಪ್ರಮುಖರ ನೇತೃತ್ವದಲ್ಲಿ ರಚಿಸಲಾಗಿರುವ ಈ ವಿಶೇಷ ಸಮಿತಿಯಲ್ಲಿ ಗೋರಖ್‌ಪುರ ಸಂಸದ ಹಾಗೂ ನಟ ರವಿ ಕಿಶನ್, ನವದೆಹಲಿ ಸಂಸದೆ ಬನ್ಸೂರಿ ಸ್ವರಾಜ್, ಬೆಂಗಳೂರು ದಕ್ಷಿಣದ ಯುವ ಸಂಸದ ತೇಜಸ್ವಿ ಸೂರ್ಯ, ವಡೋದರಾ ಸಂಸದ ಹೇಮಾಂಗ್ ಜೋಶಿ ಹಾಗೂ ಬಿಜೆಪಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಸ್ಮೃತಿ ಇರಾನಿ ಸೇರಿದಂತೆ ಹಲವು ಪ್ರಮುಖ ನಾಯಕರು ಭಾಗವಹಿಸಿ ಮಹತ್ವದ ಸಲಹೆಗಳನ್ನು ನೀಡಿದ್ದಾರೆ.

ಸಭೆಯಲ್ಲಿ ಚರ್ಚೆಯಾದ ಪ್ರಮುಖಾಂಶಗಳು ಹಾಗೂ ಸಲಹೆಗಳು

ಸಭೆಯಲ್ಲಿ ಯುವಕರು ಹಿಂದುತ್ವದ ಜೊತೆ ಹೇಗೆ ಗುರುತಿಸಿಕೊಳ್ಳುತ್ತಾರೆ ಎಂಬ ಬಗ್ಗೆ ಚರ್ಚೆ ನಡೆದಿದೆ. ಈ ಕುರಿತು ಅಭಿಪ್ರಾಯ ಹಂಚಿಕೊಂಡ ಸಂಸದ ರವಿ ಕಿಶನ್, “ಇಂದಿನ ಯುವಕರು ಹುಟ್ಟಿನಿಂದಲೇ ಹಿಂದೂಗಳಾಗಿರುವುದರಿಂದ, ಆ ವಿಚಾರವನ್ನು ಪದೇ ಪದೇ ಒತ್ತಿಹೇಳುವ ಅಥವಾ ಪ್ರತ್ಯೇಕವಾಗಿ ಸಾಬೀತುಪಡಿಸುವ ಅಗತ್ಯವಿಲ್ಲ. ಬದಲಾಗಿ ಅವರ ಮುಂದೆ ನಮ್ಮ ಆಧ್ಯಾತ್ಮಿಕ ಶಕ್ತಿ, ಮೌಲ್ಯಗಳು ಮತ್ತು ಭಾರತೀಯ ಸಂಸ್ಕಾರಗಳನ್ನು ಸರಿಯಾದ ರೀತಿಯಲ್ಲಿ ಪರಿಚಯಿಸುವುದು ಸೂಕ್ತ” ಎಂದು ಅಭಿಪ್ರಾಯಪಟ್ಟಿದ್ದಾರೆ.
ಸಂವಹನ ಮಾಡುವಾಗ ಕೇವಲ ಪಾಶ್ಚಿಮಾತ್ಯ ಶೈಲಿಯ ‘ಜೆನ್ ಝೀ’ ಎನ್ನುವ ಪದಕ್ಕಿಂತ ‘ಯುವ’ ಅಥವಾ ‘ಯೂತ್’ ನಂತಹ ಸ್ವದೇಶಿ ಹಾಗೂ ಆಪ್ತವಾದ ಭಾರತೀಯ ಶಬ್ದಗಳನ್ನು ಬಳಸಬೇಕು ಎಂದು ಸಭೆಯಲ್ಲಿ ನಿರ್ಧರಿಸಲಾಗಿದೆ.
ಯುವ ಮತದಾರರನ್ನು ಆಕರ್ಷಿಸಲು ಡಿಜಿಟಲ್ ಮಾಧ್ಯಮ, ರೀಲ್ಸ್, ಶಾರ್ಟ್ಸ್‌ ಹಾಗೂ ಆಧುನಿಕ ಟ್ರೆಂಡ್‌ಗಳಿಗೆ ತಕ್ಕಂತೆ ಪಕ್ಷದ ಪ್ರಚಾರ ಶೈಲಿಯನ್ನು ಬದಲಿಸಿಕೊಳ್ಳಲು ತೀರ್ಮಾನಿಸಲಾಗಿದೆ. ವಿಶೇಷವಾಗಿ ರಾಜಕೀಯ ಪಕ್ಷಗಳೊಂದಿಗೆ ನೇರವಾಗಿ ಗುರುತಿಸಿಕೊಳ್ಳದ ತಟಸ್ಥ ಯುವಕರು ಹಾಗೂ ಯುವ ಮಹಿಳೆಯರ ಮೇಲೆ ಹೆಚ್ಚಿನ ಗಮನಹರಿಸಲು ಸಮಿತಿ ಯೋಜಿಸಿದೆ.

ಯುವ ಸಮುದಾಯದ ಬದಲಾಗುತ್ತಿರುವ ಮನಸ್ಥಿತಿಯನ್ನು ಅರ್ಥಮಾಡಿಕೊಂಡು, ಮುಂಬರುವ ದಿನಗಳಲ್ಲಿ ವಿರೋಧ ಪಕ್ಷಗಳ ತಂತ್ರಗಾರಿಕೆಯನ್ನು ಎದುರಿಸಲು ಮತ್ತು ಯುವ ಮತದಾರರ ವಿಶ್ವಾಸ ಗಳಿಸಲು ಬಿಜೆಪಿ ಈ ‘ಯುವಾ ಸಂವಾದ’ದ ಮೂಲಕ ಮಾಸ್ಟರ್‌ಪ್ಲಾನ್ ಸಿದ್ಧಪಡಿಸುತ್ತಿದೆ.
#GenZ #BJPYouthWing #MansukhMandaviya #TejasviSurya #BansuriSwaraj #Hindutva #UdayakalaNews #IndianPolitics #BJPStrategy #YouthOutreach