ನಂದಿನಿ ನಂತರ ಮದರ್ ಡೇರಿ ಹಾಲಿನ ಬೆಲೆಯೇರಿಕೆ: ಲೀಟರ್‌ಗೆ 2ರಿಂದ 4 ರೂ. ಹೆಚ್ಚಳ

ಉದಯಕಾಲ ನ್ಯೂಸ್, ನವದೆಹಲಿ: ದೇಶದಲ್ಲಿ ದಿನನಿತ್ಯ ವಸ್ತುಗಳ ಬೆಲೆ ಏರಿಕೆಯ ಬಿಸಿ ಜನಸಾಮಾನ್ಯರಿಗೆ ತಟ್ಟುತ್ತಲೇ ಇದೆ. ಈಗಾಗಲೇ ವಿವಿಧ ಬ್ರಾಂಡ್‌ಗಳ ಹಾಲಿನ ದರಗಳು ಏರಿಕೆಯಾಗುತ್ತಿರುವ ಬೆನ್ನಲ್ಲೇ, ಇದೀಗ ದೇಶದ ಪ್ರಮುಖ ಹಾಲು ಪೂರೈಕೆದಾರರಲ್ಲಿ ಒಂದಾದ ‘ಮದರ್ ಡೇರಿ’ (Mother Dairy) ಕೂಡ ಹಾಲಿನ ಬೆಲೆಯನ್ನು ಹೆಚ್ಚಿಸಿದೆ. ದೆಹಲಿ ಮತ್ತು ರಾಷ್ಟ್ರೀಯ ರಾಜಧಾನಿ ವಲಯ ಸೇರಿದಂತೆ ವಿವಿಧೆಡೆ ಮದರ್ ಡೇರಿ ಹಾಲಿನ ವಿವಿಧ ಪ್ರಕಾರಗಳ ಬೆಲೆಯನ್ನು ಪ್ರತಿ ಲೀಟರ್‌ಗೆ 2 ರೂ.ಗಳಿಂದ 4 ರೂ.ವರೆಗೆ ಪರಿಷ್ಕರಿಸಿ ಅಧಿಕೃತ ಘೋಷಣೆ ಮಾಡಲಾಗಿದೆ. ಈ ಹೊಸ ದರವು ನಾಳೆಯಿಂದಲೇ ಅಂದರೆ ನವೆಂಬರ್ 12ರಿಂದ ಜಾರಿಗೆ ಬರಲಿದೆ ಎಂದು ಕಂಪನಿ ತಿಳಿಸಿದೆ.

ಏರಿಕೆಯ ಅನಿವಾರ್ಯತೆ: ಗ್ರಾಹಕರಿಂದ ರೈತರಿಗೆ ಸಂದಾಯ

ಹಾಲಿನ ದರ ಏರಿಕೆಗೆ ಪ್ರಮುಖ ಕಾರಣಗಳನ್ನು ನೀಡಿರುವ ಕಂಪನಿ ಮೂಲಗಳು, ರೈತರಿಂದ ಹಾಲನ್ನು ಖರೀದಿಸುವ ದರದಲ್ಲಿ ಗಣನೀಯವಾಗಿ ಹೆಚ್ಚಳವಾಗಿರುವುದೇ ಈ ತೀರ್ಮಾನಕ್ಕೆ ಮುಖ್ಯ ಕಾರಣ ಎಂದು ಸ್ಪಷ್ಟಪಡಿಸಿವೆ. ಉತ್ಪಾದನಾ ವೆಚ್ಚವು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಅದರ ಹೊರೆಯನ್ನು ಭಾಗಶಃ ಗ್ರಾಹಕರ ಮೇಲೆ ಹೇರುವುದು ಅನಿವಾರ್ಯವಾಗಿತ್ತು ಎಂದು ತಿಳಿಸಲಾಗಿದೆ. ಮದರ್ ಡೇರಿ ಸಂಸ್ಥೆಯು ತನ್ನ ಹಾಲು ಮಾರಾಟದಿಂದ ಬರುವ ಒಟ್ಟು ಆದಾಯದ ಶೇಕಡಾ 75ರಿಂದ 80ರಷ್ಟು ಹಣವನ್ನು ನೇರವಾಗಿ ಹೈನುಗಾರಿಕೆ ಮಾಡುವ ರೈತರಿಗೇ ನೀಡುತ್ತಿರುವುದು ಗಮನಾರ್ಹ ಸಂಗತಿ.

ದೆಹಲಿ-ಎನ್‌ಸಿಆರ್ ಮಾರುಕಟ್ಟೆಯಲ್ಲಿ ತನ್ನದೇ ಆದ ಬಲವಾದ ಜಾಲ, ಮಾರಾಟ ಮಳಿಗೆಗಳು ಹಾಗೂ ಇ-ಕಾಮರ್ಸ್ ವೇದಿಕೆಗಳ ಮೂಲಕ ಪ್ರತಿದಿನ ಬರೋಬ್ಬರಿ 35 ಲಕ್ಷ ಲೀಟರ್‌ಗೂ ಅಧಿಕ ಹಾಲನ್ನು ಮದರ್ ಡೇರಿ ಮಾರಾಟ ಮಾಡುತ್ತದೆ. ಒಟ್ಟಾರೆ ದೇಶಾದ್ಯಂತ ಪ್ರತಿದಿನ 50 ಲಕ್ಷ ಲೀಟರ್‌ಗಿಂತಲೂ ಹೆಚ್ಚು ಹಾಲು ಇದರ ಮೂಲಕ ಸರಬರಾಜಾಗುತ್ತದೆ. ಕಳೆದ ಮೇ 14ರಂದು ಹಾಗೂ ಅದಕ್ಕೂ ಮುನ್ನ 2025ರ ಏಪ್ರಿಲ್‌ನಲ್ಲಿ ದರ ಪರಿಷ್ಕರಣೆ ಮಾಡಿದ್ದ ಕಂಪನಿಯು, ಇದೀಗ ಮತ್ತೊಮ್ಮೆ ಬೆಲೆ ಏರಿಕೆ ಮಾಡಿರುವುದು ಮಧ್ಯಮ ವರ್ಗದ ಜನರಿಗೆ ಆರ್ಥಿಕ ಹೊರೆಯಾಗಲಿದೆ.

ಮದರ್ ಡೇರಿ ಪರಿಷ್ಕರಿಸಿರುವ ಹೊಸ ದರಗಳ ಪ್ರಕಾರ ವಿವಿಧ ಹಾಲಿನ ವಿಧಗಳ ಬೆಲೆ ಈ ಕೆಳಗಿನಂತಿದೆ

ಫುಲ್ ಕ್ರೀಮ್ ಹಾಲು: ಪ್ರತಿ ಲೀಟರ್‌ಗೆ 72 ರೂ. ಇದ್ದದ್ದು ಈಗ 76 ರೂ.ಗೆ ಏರಿಕೆಯಾಗಿದೆ (4 ರೂ. ಹೆಚ್ಚಳ)
ಟೋನ್ಡ್ ಹಾಲು (Toned Milk): ಪ್ರತಿ ಲೀಟರ್‌ಗೆ 58/60 ರೂ. ಇದ್ದದ್ದು ಈಗ 60 ರಿಂದ 62 ರೂ.ಗೆ ಹೆಚ್ಚಳವಾಗಿದೆ.
ಡಬಲ್ ಟೋನ್ಡ್ ಹಾಲು: ಪ್ರತಿ ಲೀಟರ್‌ಗೆ 54 ರೂ. ಇದ್ದದ್ದು ಈಗ 56 ರೂ.ಗೆ ಏರಿಕೆಯಾಗಿದೆ (2 ರೂ. ಹೆಚ್ಚಳ)

ಹಾಲು ಉತ್ಪನ್ನಗಳು ಹಾಗೂ ಅಡುಗೆ ಎಣ್ಣೆಗೆ ಬೇಡಿಕೆ ಹೆಚ್ಚಾದ ಹಿನ್ನೆಲೆಯಲ್ಲಿ, ಕಳೆದ ಹಣಕಾಸು ವರ್ಷದಲ್ಲಿ ಮದರ್ ಡೇರಿಯ ವಹಿವಾಟು ಶೇಕಡಾ 17ರಷ್ಟು ಬೆಳವಣಿಗೆ ಕಂಡು 20,300 ಕೋಟಿ ರೂ. ತಲುಪಿತ್ತು. 1974ರಲ್ಲಿ ಆರಂಭವಾದ ಈ ಸಂಸ್ಥೆಯು ನ್ಯಾಷನಲ್ ಡೇರಿ ಡೆವಲಪ್‌ಮೆಂಟ್ ಬೋರ್ಡ್‌ನ ಸಂಪೂರ್ಣ ಒಡೆತನದಲ್ಲಿದೆ. ಹಾಲಿನ ಜೊತೆಗೆ ‘ಧಾರಾ’ ಬ್ರಾಂಡ್ ಅಡಿಯಲ್ಲಿ ಖಾದ್ಯ ತೈಲ ಹಾಗೂ ‘ಸಫಲ್’ ಬ್ರಾಂಡ್ ಮೂಲಕ ಹಣ್ಣು-ತರಕಾರಿಗಳನ್ನು ಇದು ಮಾರುಕಟ್ಟೆಗೆ ಪೂರೈಸುತ್ತದೆ.
#MotherDairy #MilkPriceHike #DelhiNCR #Udayakala #DairyProducts #Inflation #NandiniMilk #ConsumerNews