ಕಾರು ಪಾರ್ಕಿಂಗ್ ಮತ್ತು ವೇದಿಕೆ ನಿರ್ಮಾಣಕ್ಕೆ ಜಗಳ; ಗುಂಡು ಹಾರಿಸಿ ಮೂವರ ಭೀಕರ ಹತ್ಯೆ!

ಉದಯಕಾಲ ನ್ಯೂಸ್, ಲಕ್ನೋ (ಉತ್ತರ ಪ್ರದೇಶ): ಕಾರು ಪಾರ್ಕಿಂಗ್ ಹಾಗೂ ವೇದಿಕೆ ನಿರ್ಮಾಣದ ವಿಚಾರವಾಗಿ ಎರಡು ಅಕ್ಕಪಕ್ಕದ ಕುಟುಂಬಗಳ ನಡುವೆ ಉಂಟಾದ ಸಣ್ಣ ಜಗಳವು ವಿಕೋಪಕ್ಕೆ ತಿರುಗಿ, ವ್ಯಕ್ತಿಯೊಬ್ಬ ಮನಬಂದಂತೆ ಗುಂಡು ಹಾರಿಸಿ ತಂದೆ, ಮಗ ಹಾಗೂ ಮತ್ತೊಬ್ಬರನ್ನೊಳಗೊಂಡಂತೆ ಮೂವರನ್ನು ಬರ್ಬರವಾಗಿ ಹತ್ಯೆ ಮಾಡಿರುವ ದಾರುಣ ಘಟನೆ ಲಕ್ನೋದ ಸಾದತ್‌ಗಂಜ್ ಠಾಣಾ ವ್ಯಾಪ್ತಿಯ ನೌಬಸ್ತಾ ಪ್ರದೇಶದಲ್ಲಿ ವರದಿಯಾಗಿದೆ.

ಮೃತರನ್ನು ಶಿವ ತಿವಾರಿ (ಮಾಜಿ ಆರ್‌ಎಸ್‌ಎಸ್ ಜಿಲ್ಲಾ ಸಹ-ಪ್ರಭಾರಿ ಹಾಗೂ ವಿದ್ಯುತ್ ಇಲಾಖೆಯಿಂದ ನಿವೃತ್ತರು), ಅವರ ಸಹೋದರ ಶಂಭು (ಶಿವೇಂದ್ರ) ತಿವಾರಿ ಮತ್ತು ಶಿವ ತಿವಾರಿಯ ಮಗ ಸುಯಾಶ್ ತಿವಾರಿ ಎಂದು ಗುರುತಿಸಲಾಗಿದೆ. ಈ ಭೀಕರ ಕೃತ್ಯ ಎಸಗಿರುವ ಆರೋಪಿಯನ್ನು ರಿಷಭ್ ಶುಕ್ಲಾ ಎಂದು ಹೆಸರಿಸಲಾಗಿದ್ದು, ಈತ ಮರ್ಚೆಂಟ್ ನೇವಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದನೆಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಘಟನೆ ಹತ್ಯೆಗೆ ತಿರುಗಲು ಕಾರಣ!

ಸಾದತ್‌ಗಂಜ್‌ನ ನೌಬಸ್ತಾ ಪ್ರದೇಶದಲ್ಲಿ ವೇದಿಕೆ ನಿರ್ಮಾಣ ಮತ್ತು ವಾಹನ ನಿಲುಗಡೆಗೆ ಸಂಬಂಧಿಸಿದಂತೆ ನೆರೆಹೊರೆಯವರಾದ ರಿಷಭ್ ಶುಕ್ಲಾ ಮತ್ತು ಶಿವ ತಿವಾರಿ ಕುಟುಂಬದ ನಡುವೆ ಬಹಳ ಹಿಂದಿನಿಂದಲೂ ಜಗಳವಿತ್ತು. ವೇದಿಕೆ ನಿರ್ಮಾಣದ ಕುರಿತು ಇವರ ನಡುವೆ ಆಗಾಗ್ಗೆ ಸಂಘರ್ಷ ನಡೆಯುತ್ತಿತ್ತು. ಘಟನೆಯ ದಿನದಂದು ಇದೇ ವಿಚಾರವಾಗಿ ಮಾತಿಗೆ ಮಾತು ಬೆಳೆದು ಜಗಳ ತೀವ್ರಗೊಂಡಿದೆ. ಆಕ್ರೋಶಗೊಂಡ ಆರೋಪಿ ರಿಷಭ್ ಶುಕ್ಲಾ ಏಕಾಏಕಿ ಮನೆಯಿಂದ ಪಿಸ್ತೂಲ್ ತಂದು ಮನಬಂದಂತೆ ಗುಂಡು ಹಾರಿಸಲು ಪ್ರಾರಂಭಿಸಿದ್ದಾನೆ. ಈ ದಾಳಿಯ ಸಂದರ್ಭದಲ್ಲಿ ಸ್ಥಳದಲ್ಲಿ ಕಾಲ್ತುಳಿತದ ವಾತಾವರಣವೂ ನಿರ್ಮಾಣವಾಯಿತು.

ಗುಂಡೇಟಿನಿಂದ ತೀವ್ರವಾಗಿ ಗಾಯಗೊಂಡು ರಕ್ತದ ಮಡುವಿನಲ್ಲಿ ಕುಸಿದುಬಿದ್ದ ಶಿವ ತಿವಾರಿ ಮತ್ತು ಅವರ ಸಹೋದರ ಶಂಭು ತಿವಾರಿ ಸ್ಥಳದಲ್ಲೇ ಸಾವನ್ನಪ್ಪಿದ್ದಾರೆ. ಗಂಭೀರವಾಗಿ ಗಾಯಗೊಂಡು ಒದ್ದಾಡುತ್ತಿದ್ದ ಶಿವನ ಮಗ ಸುಯಾಶ್ ತಿವಾರಿಯನ್ನು ಕೂಡಲೇ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದಿದ್ದಾನೆ.

ಪೊಲೀಸರ ಮಿಂಚಿನ ಕಾರ್ಯಾಚರಣೆ, ಆರೋಪಿ ಬಂಧನ

ಘಟನೆಯ ಸುದ್ದಿ ತಿಳಿದ ತಕ್ಷಣ ಜೆಸಿಪಿ ಕ್ರೈಮ್ ಬಬ್ಲು ಕುಮಾರ್ ಮತ್ತು ಡಿಸಿಪಿ ಪಶ್ಚಿಮ ಜಿತೇಂದ್ರ ಶ್ರೀವಾಸ್ತವ್ ಅವರು ಸಿಬ್ಬಂದಿಯೊಂದಿಗೆ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಅಲ್ಲದೆ, ಕ್ಷಿಪ್ರ ಕಾರ್ಯಾಚರಣೆ ನಡೆಸಿ ಪ್ರಮುಖ ಆರೋಪಿ ರಿಷಭ್ ಶುಕ್ಲಾನನ್ನು ಪೊಲೀಸರು ಬಂಧಿಸಿದ್ದು, ಕೃತ್ಯಕ್ಕೆ ಬಳಸಿದ ಆಯುಧವನ್ನು ವಶಪಡಿಸಿಕೊಂಡಿದ್ದಾರೆ. ಮುಂಜಾಗ್ರತಾ ಕ್ರಮವಾಗಿ ಆ ಪ್ರದೇಶದಲ್ಲಿ ಹೆಚ್ಚುವರಿ ಪೊಲೀಸರನ್ನು ನಿಯೋಜಿಸಲಾಗಿದ್ದು, ಪ್ರಸ್ತುತ ಸ್ಥಳದಲ್ಲಿ ಶಾಂತಿ ಮತ್ತು ಸುವ್ಯವಸ್ಥೆಯನ್ನು ಕಾಯ್ದುಕೊಳ್ಳಲಾಗಿದೆ. ಘಟನೆಯ ಪ್ರತಿಯೊಂದು ಅಂಶದ ಕುರಿತು ಕೂಲಂಕಷವಾಗಿ ತನಿಖೆ ಮುಂದುವರಿದಿದೆ ಎಂದು ಪಶ್ಚಿಮ ಡಿಸಿಪಿ ಜಿತೇಂದ್ರ ಕುಮಾರ್ ಶ್ರೀವಾಸ್ತವ್ ತಿಳಿಸಿದ್ದಾರೆ.
#LucknowCrime #CarParkingDispute #Saadatganj #UttarPradeshNews #UdayakalaNews #Naubasta #TripleMurder #PoliceArrest #CrimeReportKarnataka