ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನ ಸೇವಾ ಶುಲ್ಕ ಹೆಚ್ಚಳ: ರಥೋತ್ಸವ ಹಾಗೂ ಮಹಾಭಿಷೇಕಕ್ಕೆ ಹೊಸ ದರ!

ಉದಯಕಾಲ ನ್ಯೂಸ್, ಸುಬ್ರಹ್ಮಣ್ಯ (ದಕ್ಷಿಣ ಕನ್ನಡ): ದಕ್ಷಿಣ ಭಾರತದ ಪ್ರಸಿದ್ಧ ನಾಗಾರಾಧನಾ ಕ್ಷೇತ್ರವಾದ ದಕ್ಷಿಣ ಕನ್ನಡ ಜಿಲ್ಲೆಯ ಕಡಬ ತಾಲೂಕಿನ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದಲ್ಲಿ ಪ್ರಮುಖ ಧಾರ್ಮಿಕ ಸೇವೆಗಳ ದರವನ್ನು ಪರಿಷ್ಕರಿಸಿ ಕರ್ನಾಟಕ ಸರ್ಕಾರದ ಹಿಂದೂ ಧಾರ್ಮಿಕ ಸಂಸ್ಥೆಗಳು ಮತ್ತು ಧರ್ಮಾದಾಯ ದತ್ತಿಗಳ ಇಲಾಖೆ ಅಧಿಕೃತ ಆದೇಶ ಹೊರಡಿಸಿದೆ.

ದೇವಸ್ಥಾನದಲ್ಲಿ ನಡೆಯುವ ಬೆಳ್ಳಿ ರಥೋತ್ಸವ ಹಾಗೂ ಪಂಚಾಮೃತ ಮಹಾಭಿಷೇಕ ಸೇವೆಗಳಿಗೆ ಸಂಬಂಧಿಸಿದಂತೆ ಈ ದರ ಬದಲಾವಣೆ ಮಾಡಲಾಗಿದೆ. ದೇವಸ್ಥಾನದ ಕಾರ್ಯನಿರ್ವಾಹಕ ಅಧಿಕಾರಿಗಳು ಮೇ 20, 2026ರಂದು ಸಲ್ಲಿಸಿದ್ದ ಪ್ರಸ್ತಾವನೆಯನ್ನು ಪರಿಶೀಲಿಸಿದ ಧಾರ್ಮಿಕ ದತ್ತಿ ಇಲಾಖೆಯ ಆಯುಕ್ತರ ಕಚೇರಿಯು ಈ ಪರಿಷ್ಕರಣೆಗೆ ಅನುಮೋದನೆ ನೀಡಿದೆ. ಮುಂದಿನ ಮೂರು ವರ್ಷಗಳ ಅವಧಿಗೆ ಅನ್ವಯವಾಗುವಂತೆ ಈ ಪರಿಷ್ಕೃತ ಸೇವಾದರವನ್ನು ಜಾರಿಗೊಳಿಸಲಾಗಿದೆ.

ಯಾವ ಸೇವೆಗೆ ಎಷ್ಟು ದರ?

ಪರಿಷ್ಕೃತ ಆದೇಶದ ಪ್ರಕಾರ ದೇವಸ್ಥಾನದ ಎರಡು ಪ್ರಮುಖ ಸೇವೆಗಳಿಗೆ ಭಕ್ತರು ಪಾವತಿಸಬೇಕಾದ ಮೊತ್ತ ಹಾಗೂ ಅದರ ವೆಚ್ಚದ ವಿವರ ಹೀಗಿದೆ

ಬೆಳ್ಳಿ ರಥೋತ್ಸವ
ಈ ಸೇವೆಗೆ ಒಟ್ಟು 12,000 ರೂ. ನಿಗದಿಪಡಿಸಲಾಗಿದೆ. ಇದರಲ್ಲಿ ದೇವಸ್ಥಾನದ ನಿಧಿಗೆ 3,000 ರೂ. ಹಾಗೂ ಪದಾರ್ಥ ಮತ್ತು ಸಾಮಗ್ರಿ ವೆಚ್ಚಕ್ಕಾಗಿ 9,000 ರೂ. ಹಂಚಿಕೆ ಮಾಡಲಾಗಿದೆ.

ಪಂಚಾಮೃತ ಮಹಾಭಿಷೇಕ
ಈ ಸೇವೆಗೆ ಒಟ್ಟು 11,000 ರೂ. ನಿಗದಿಪಡಿಸಲಾಗಿದ್ದು, ದೇವಸ್ಥಾನದ ನಿಧಿಗೆ 1,000 ರೂ. ಹಾಗೂ ಪದಾರ್ಥ ಮತ್ತು ಸಾಮಗ್ರಿ ವೆಚ್ಚಕ್ಕಾಗಿ 10,000 ರೂ. ಮೀಸಲಿಡಲಾಗಿದೆ.

ಸೇವೆಗಳ ನಿರ್ವಹಣೆಗೆ ಅಗತ್ಯವಿರುವ ಪದಾರ್ಥಗಳು ಮತ್ತು ಸಾಮಗ್ರಿಗಳ ವೆಚ್ಚವನ್ನು ಪ್ರತ್ಯೇಕವಾಗಿ ಗುರುತಿಸಿರುವುದು ಪರಿಷ್ಕೃತ ದರಪಟ್ಟಿಯ ವಿಶೇಷತೆಯಾಗಿದೆ. ದೇವಸ್ಥಾನದ ಪ್ರಸ್ತಾವನೆಗೆ ಇಲಾಖೆಯು ಅನುಮೋದನೆ ನೀಡಿದ್ದು, ಆದೇಶದ ಪ್ರತಿಯನ್ನು ದಕ್ಷಿಣ ಕನ್ನಡ ಜಿಲ್ಲಾಧಿಕಾರಿಗಳು, ದೇವಸ್ಥಾನದ ಕಾರ್ಯನಿರ್ವಾಹಕ ಅಧಿಕಾರಿಗಳು ಹಾಗೂ ಸಂಬಂಧಪಟ್ಟ ಅಧಿಕಾರಿಗಳಿಗೆ ರವಾನಿಸಲಾಗಿದೆ.

ರಾಜ್ಯದ ಪ್ರಮುಖ ಧಾರ್ಮಿಕ ಕ್ಷೇತ್ರಗಳಲ್ಲಿ ಒಂದಾಗಿರುವ ಕುಕ್ಕೆ ಸುಬ್ರಹ್ಮಣ್ಯಕ್ಕೆ ಪ್ರತಿನಿತ್ಯ ಸಾವಿರಾರು ಭಕ್ತರು ಆಗಮಿಸುತ್ತಿದ್ದು, ವಿವಿಧ ಧಾರ್ಮಿಕ ಸೇವೆಗಳಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಇದೀಗ ಪ್ರಮುಖ ಎರಡು ಸೇವೆಗಳ ದರ ಪರಿಷ್ಕರಣೆಗೆ ಸರ್ಕಾರದ ಅಧಿಕೃತ ಅನುಮೋದನೆ ದೊರೆತಿರುವುದರಿಂದ ಭಕ್ತರು ಪರಿಷ್ಕೃತ ದರಪಟ್ಟಿಯಂತೆ ಸೇವೆಗಳನ್ನು ಪಡೆಯಬೇಕಾಗಿದೆ.
#KukkeSubrahmanya #TempleSevaRates #DakshinaKannada #MuzraiDepartment #UdayakalaNews #KarnatakaTemples #SubrahmanyaSwamy