ದ್ರಾವಿಡ್ ಶತಕ ದಾಖಲೆ ಸರಿಗಟ್ಟಿದ ರೂಟ್

ವೆಲ್ಲಿಂಗ್ಟನ್: ಪ್ರವಾಸಿ ಇಂಗ್ಲೆಂಡ್ ಮತ್ತು ನ್ಯೂಜಿಲೆಂಡ್ ನಡುವೆ ೩ ಪಂದ್ಯಗಳ ಟೆಸ್ಟ್ ಸರಣಿ ನಡೆಯುತ್ತಿದೆ. ಸರಣಿಯ ಎರಡನೇ ಪಂದ್ಯದಲ್ಲಿ ಆಂಗ್ಲ ಬ್ಯಾಟರ್ ಜೋ ರೂಟ್ ಶತಕ ಸಿಡಿಸಿ ರಾಹುಲ್ ದ್ರಾವಿಡ್ ದಾಖಲೆಯನ್ನು ಸರಿಗಟ್ಟಿದ್ದಾರೆ.

ಈ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ್ದ ಇಂಗ್ಲೆಂಡ್ ೨೮೦ ರನ್ ಗಳಿಸಿತು. ತಂಡದ ಪರ ಹ್ಯಾರಿ ಬ್ರೂಕ್ ಮತ್ತು ಓಲಿ ಪೋಪ್ ಭರ್ಜರಿ ಬ್ಯಾಟಿಂಗ್ ಮಾಡಿದರು.

ಬ್ರೂಕ್ ಶತಕ ಸಮೇತ ೧೨೩ ರನ್ ಕಲೆಹಾಕಿದರೇ, ಪೋಪ್ ೬೬ ರನ್ಗಳೊಂದಿಗೆ ಅರ್ಧಶತಕ ಸಿಡಿಸಿ ತಂಡದ ಸ್ಕೋರ್ಗೆ ಕೊಡುಗೆ ನೀಡಿದರು. ಇದಕ್ಕುತ್ತರವಾಗಿ ನ್ಯೂಜಿಲೆಂಡ್ ೧೨೫ ರನ್‌ಗಳಿಗೆ ಸರ್ವಪತನ ಕಂಡಿತು.

೧೫೫ ರನ್‌ಗಳ ಮುನ್ನಡೆಯೊಂದಿಗೆ ಎರಡನೇ ಇನ್ನಿಂಗ್ಸ್ ಆರಂಭಿಸಿದ ಆಂಗ್ಲರು ಬೃಹತ್ ಮೊತ್ತ ಪೇರಿಸಿದರು.

ಬೆನ್ ಡಕೆಟ್ (೯೨), ಜಾಕೋಬ್ ಬೆಥೆಲ್ (೯೬), ಹ್ಯಾರಿ ಬ್ರೂಕ್ (೫೫), ಸ್ಟೋಕ್ಸ್ (೪೯), ರೂಟ್ (೧೦೬) ಬ್ಯಾಟಿಂಗ್ ನೆರವಿನಿಂದ ೬ ವಿಕೆಟ್ ನಷ್ಟಕ್ಕೆ ೪೨೭ ರನ್ ಕಲೆ ಹಾಕಿ ಡಿಕ್ಲೇರ್ ಮಾಡಿಕೊಂಡಿತು.

೫೮೨ ರನ್‌ಗಳ ಬೃಹತ್ ಗುರಿಯನ್ನು ಬೆನ್ನಟ್ಟಿದ ನ್ಯೂಜಿಲೆಂಡ್, ಟಾಮ್ ಬ್ಲಂಡೆಲ್ (೧೧೫), ನಥನ್ ಸ್ಮಿತ್ (೪೨) ನೆರವಿನಿಂದ ೨೫೯ ರನ್ ಗಳಿಸಲಷ್ಟೇ ಶಕ್ತವಾಯಿತು.

ಇಂಗ್ಲೆಂಡ್ ೩೨೩ ರನ್‌ಗಳೊಂದಿಗೆ ೧೬ ವರ್ಷಗಳ ಬಳಿಕ ನ್ಯೂಜಿಲೆಂಡಲ್ಲಿ ಟೆಸ್ಟ್ ಸರಣಿ ಗೆದ್ದುಕೊಂಡಿತು. ಇದರಲ್ಲಿ ಎರಡನೇ ಇನ್ನಿಂಗ್ಸಲ್ಲಿ ಶತಕ ಸಿಡಿಸುವ ಮೂಲಕ ಜೋ ರೂಟ್ ದಾಖಲೆ ಬರೆದಿದ್ದಾರೆ.

ಜೋ ರೂಟ್ ೩೬ನೇ ಶತಕ; ಎರಡನೇ ಇನ್ನಿಂಗ್ಸಲ್ಲಿ ೭೩ ರನ್‌ಗಳೊಂದಿಗೆ ಮೂರನೇ ದಿನದಾಟ ಆರಂಭಿಸಿದ ಜೋ ರೂಟ್ ಶತಕ ಬಾರಿಸಿ ತಮ್ಮ ಟೆಸ್ಟ್ ವೃತ್ತಿಜೀವನದ ೩೬ನೇ ಶತಕವನ್ನು ಪೂರ್ಣಗೊಳಿಸಿದರು.

ಈವೆರಗೆ ೧೫೧ ಟೆಸ್ಟ್ ಪಂದ್ಯಗಳನ್ನು ಆಡಿರುವ ಅವರು ೨೭೬ ಇನ್ನಿಂಗ್ಸ್ಗಳಲ್ಲಿ ೫೦.೯೩ರ ಸರಾಸರಿಯಲ್ಲಿ ೧೨,೮೮೬ರನ್ ಗಳಿಸಿದ್ದಾರೆ. ೩೬ನೇ ಶತಕ ಜೊತೆಗೆ ರೂಟ್ ಅವರು ದ್ರಾವಿಡ್ ದಾಖಲೆಯನ್ನು ಸರಿಗಟ್ಟಿದ್ದಾರೆ.

ರಾಹುಲ್ ದ್ರಾವಿಡ್ ತಮ್ಮ ಕ್ರಿಕೆಟ್ ವೃತ್ತಿಜೀವನದಲ್ಲಿ ೧೬೪ ಟೆಸ್ಟ್ ಪಂದ್ಯಗಳನ್ನು ಆಡಿದ್ದು, ೨೮೬ ಇನ್ನಿಂಗ್ಸ್‌ಗಳಲ್ಲಿ ೫೨.೩೧ರ ಸರಾಸರಿಯಲ್ಲಿ ೧೩,೨೮೮ ರನ್ ಗಳಿಸಿದ್ದಾರೆ. ಇದರಲ್ಲಿ ೩೬ ಶತಕ ಮತ್ತು ೬೩ ಅರ್ಧ ಶತಕಗಳು ಸೇರಿವೆ.