ಲಕ್ಷಾಂತರ ರೂಪಾಯಿ ಬೆಲೆಯ ಚಿಯಾ ಬೆಳೆ ನಾಶಪಡಿಸಿದ ದುರುಳರು!

ಉದಯಕಾಲ ನ್ಯೂಸ್, ಬೀದರ್: ತೀವ್ರ ಬರಗಾಲ ಹಾಗೂ ನೀರಿನ ಅಭಾವದ ನಡುವೆಯೂ ರೈತರೊಬ್ಬರು ಅತೀವ ಶ್ರಮದಿಂದ ಬೆಳೆದಿದ್ದ ಲಕ್ಷಾಂತರ ರೂಪಾಯಿ ಮೌಲ್ಯದ ಚಿಯಾ (Chia Seeds) ಬೆಳೆಯನ್ನು ಕಿಡಿಗೇಡಿಗಳು ಕೀಟನಾಶಕ ಸಿಂಪಡಿಸಿ ರಾತ್ರೋರಾತ್ರಿ ನಾಶಪಡಿಸಿರುವ ಅಮಾನವೀಯ ಘಟನೆ ಬೀದರ್ ಜಿಲ್ಲೆಯ ಹುಮನಾಬಾದ್ ತಾಲೂಕಿನ ದುಬಲಗುಂಡಿ ಗ್ರಾಮದಲ್ಲಿ ವರದಿಯಾಗಿದೆ. ಬೆಳೆದ ಫಸಲು ಕಣ್ಣೆದುರೇ ಒಣಗಿ ಹೋಗುವುದನ್ನು ಕಂಡು ರೈತ ಕಂಗಾಲಾಗಿದ್ದು, ಕಣ್ಣೀರಿಡುತ್ತಿದ್ದಾರೆ.

ಲಕ್ಷಾಂತರ ರೂ. ವೆಚ್ಚ: ಅಪಾರ ನಿರೀಕ್ಷೆಯಲ್ಲಿದ್ದ ರೈತನಿಗೆ ಆಘಾತ

ದುಬಲಗುಂಡಿ ಗ್ರಾಮದ ಸರ್ವೆ ನಂಬರ್ 27ರಲ್ಲಿರುವ ಸುಶೀಲಾಬಾಯಿ ಎಂಬುವರಿಗೆ ಸೇರಿದ ಜಮೀನನ್ನು ರೈತ ಹನುಮಂತರಾವ್ ರೇವಪ್ಪ ಅವರು ಲೀಸ್‌ಗೆ ಪಡೆದುಕೊಂಡಿದ್ದರು. ಮಳೆಯಿಲ್ಲದೆ ಕಂಗೆಟ್ಟಿದ್ದ ಈ ಪ್ರದೇಶದಲ್ಲಿ ಕೊಳವೆಬಾವಿ ನೀರನ್ನು ನಂಬಿ, ಸಾಕಷ್ಟು ಹಣ ವ್ಯಯಿಸಿ ಮೂರು ಎಕರೆ ಜಮೀನಿನಲ್ಲಿ ಅತ್ಯುತ್ತಮವಾಗಿ ಚಿಯಾ ಬೆಳೆ ಬೆಳೆದಿದ್ದರು. ಕೈಗೆ ಬರುವ ಹಂತದಲ್ಲಿದ್ದ ಈ ಫಸಲಿನ ಮೇಲೆ ರೈತ ಅಪಾರ ನಿರೀಕ್ಷೆಯನ್ನಿಟ್ಟುಕೊಂಡಿದ್ದರು. ಆದರೆ, ದುಷ್ಕರ್ಮಿಗಳ ವಿಕೃತಿಯಿಂದಾಗಿ ಇಡೀ ಬೆಳೆ ಸಂಪೂರ್ಣವಾಗಿ ನಾಶವಾಗಿದ್ದು, ರೈತನಿಗೆ ಲಕ್ಷಾಂತರ ರೂಪಾಯಿಯ ಆರ್ಥಿಕ ನಷ್ಟವುಂಟಾಗಿದೆ.

ಕೀಟನಾಶಕ ಸಿಂಪಡಿಸಿ ವಿಕೃತಿ ಮೆರೆದ ದುಷ್ಕರ್ಮಿಗಳು

ಹನುಮಂತರಾವ್ ಅವರು ಕಷ್ಟಪಟ್ಟು ಬೆಳೆದಿದ್ದ ಬೆಳೆಯನ್ನು ಕಂಡು ಅಸೂಯೆಪಟ್ಟಿರಬಹುದಾದ ಕಿಡಿಗೇಡಿಗಳು, ರಾತ್ರೋರಾತ್ರಿ ಜಮೀನಿಗೆ ನುಗ್ಗಿದ್ದಾರೆ. ಯಾವುದೇ ಮುನ್ಸೂಚನೆ ಇಲ್ಲದೆ ಬೆಳೆಗೆ ತೀವ್ರ ವಿಷಕಾರಿ ಕೀಟನಾಶಕವನ್ನು ಸಿಂಪಡಿಸಿದ್ದಾರೆ. ಇದರ ಪರಿಣಾಮವಾಗಿ ಮೂರು ಎಕರೆ ಪ್ರದೇಶದಲ್ಲಿದ್ದ ಹಚ್ಚಹಸಿರಿನ ಚಿಯಾ ಬೆಳೆ ಒಂದೇ ರಾತ್ರಿಯಲ್ಲಿ ಸಂಪೂರ್ಣವಾಗಿ ಒಣಗಿ ಬೋಗಟೆಯಾಗಿದೆ. ಬೆಳೆ ನಷ್ಟದಿಂದ ದಿಕ್ಕು ತೋಚದಂತಾಗಿರುವ ರೈತ ಹನುಮಂತರಾವ್, ತಮ್ಮ ಕಷ್ಟಕ್ಕೆ ಸ್ಪಂದಿಸಿ ತಪ್ಪಿತಸ್ಥ ಕಿಡಿಗೇಡಿಗಳನ್ನು ಕೂಡಲೇ ಪತ್ತೆ ಹಚ್ಚಿ ಕಠಿಣ ಕಾನೂನು ಕ್ರಮ ಕೈಗೊಳ್ಳುವಂತೆ ಹಾಗೂ ಸರ್ಕಾರದಿಂದ ಸೂಕ್ತ ಪರಿಹಾರ ಒದಗಿಸುವಂತೆ ಸಂಬಂಧಪಟ್ಟ ಪೊಲೀಸ್ ಹಾಗೂ ಕೃಷಿ ಇಲಾಖೆಯ ಅಧಿಕಾರಿಗಳಿಗೆ ಮನವಿ ಮಾಡಿದ್ದಾರೆ.

#Bidar #ChiaCropDestroyed #Humnabad #KarnatakaFarmer #UdayakalaNews #AgricultureNews