ಅಶ್ಲೀಲ ವೀಡಿಯೊದಲ್ಲಿ ಮುಖ ತೋರಿಸದೇ ಇದ್ದರೂ ಪ್ರಜ್ವಲ್ ಸಿಕ್ಕಿಬಿದ್ದಿದ್ದು ಈ ಟರ್ಕಿ ತಂತ್ರಜ್ಞಾನದಿಂದ!

ಬೆಂಗಳೂರು: ಮನೆಗೆಲಸದ ಮಹಿಳೆ ಮೇಲೆ ಅತ್ಯಾಚಾರ ಎಸಗಿ ಜೀವನ ಪರ್ಯಂತ ಜೈಲು ಶಿಕ್ಷೆಗೆ ಗುರಿಯಾಗಿರುವ  ಮಾಜಿ ಸಂಸದ ಪ್ರಜ್ವಲ್ ರೇವಣ್ಣನ ಪೆನ್​ ಡ್ರೈವ್​ ನಲ್ಲಿದ್ದ ಅಶ್ಲೀಲ ವಿಡಿಯೋ ಆತನದ್ದೇ ಎನ್ನುವುದನ್ನು ಕಂಡು ಹಿಡಿಯಲು ಎಸ್​ಐಟಿ ಅಧಿಕಾರಿಗಳು ಹರಸಾಹಸ ಪಟ್ಟು ಸಾಬೀತು ಪಡಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಕಳೆದ 2024ರಲ್ಲಿ ಭಾರೀ ವೈರಲ್ ಆಗಿದ್ದ ಅಶ್ಲೀಲ ವಿಡಿಯೋಗಳಲ್ಲಿರುವುದು ಪ್ರಜ್ವಲ್​ ರೇ ಎಂದು ಖಚಿತಪಡಿಸಿಕೊಳ್ಳಲು ಟರ್ಕಿಯಲ್ಲಿ ಜಾರಿಯಲ್ಲಿರುವ ಅನಾಟೋಮಿಕಲ್ ಕಾಂಪಾರೀಷನ್ ಆಫ್ ಜನಿಟಲ್ ಫೀಚರ್ಸ್’

(Anatomical Comparison of Genital Features) ಎಂಬ ತಂತ್ರಜ್ಞಾನದ ಮೊರೆ ಹೋಗಲಾಗಿತ್ತು. ಆ ತಂತ್ರಜ್ಞಾನ ಏನು, ಅದರಿಂದ ಆರೋಪಿಯ ಗುರುತು ಪತ್ತೆ ಮಾಡಲಾಗಿದೆ. ಇದು ಭಾರತದಲ್ಲಿ ನಡೆದ ಮೊದಲ ಪ್ರಯೋಗವಾಗಿದೆ.

2024ರ ಲೋಕಸಭಾ ಚುನಾವಣೆಯ ಸಂದರ್ಭದಲ್ಲಿ, ಹಾಸನದಲ್ಲಿ ಪ್ರಜ್ವಲ್ ರೇವಣ್ಣಗೆ ಸಂಬಂಧಿಸಿದ ಎನ್ನಲಾದ ಅಶ್ಲೀಲ ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದವು.  ಈ ವಿಡಿಯೋಗಳಲ್ಲಿ ಎಲ್ಲೂ ಪ್ರಜ್ವಲ್ ರೇವಣ್ಣ ಮುಖ ಕಂಡಿಲ್ಲ. ಆದರೆ, ಕೆಲವು ಫೋಟೋಗಳಲ್ಲಿ ಮಾತ್ರ ಕಂಡಿತ್ತು. ಹೀಗಾಗಿ ವಿಡಿಯೋನಲ್ಲಿರುವುದು ಪ್ರಜ್ವಲ್ ಅಲ್ಲ ಎಂದು ಕೆಲವರು ವಾದ ಮಾಡಿದ್ದರೆ, ಇನ್ನು ಕೆಲವರು ಇದು ಪ್ರಜ್ವಲ್ ರೇವಣ್ಣ, ಅವರ ಧ್ವನಿ ಸಹ ಇದೆ ಎಂದು ವಾದಿಸಿದ್ದರು.

ಹೀಗಾಗಿ ಈ ಪ್ರಕರಣದ ತನಿಖೆಗಾಗಿ ರಾಜ್ಯ ಸರ್ಕಾರ ಎಸ್‌ಐಟಿಯನ್ನು ರಚಿಸಿತು. ಈ ತಂಡವು ವಿಡಿಯೋದಲ್ಲಿರುವ ವ್ಯಕ್ತಿಯ ಗುರುತನ್ನು ಖಚಿತಪಡಿಸಲು, ಎಸ್‌ಐಟಿಯು ಈ ಟರ್ಕಿ ದೇಶದ ತಂತ್ರಜ್ಞಾನವನ್ನು ಬಳಸಿದೆ ಎಂದು ತಿಳಿದುಬಂದಿದೆ.

ಟರ್ಕಿ ತಂತ್ರಜ್ಞಾನ ಬಳಕೆ:

ಪ್ರಜ್ವಲ್​ ರೇವಣ್ಣ ವೈರಲ್​ ಆದ ವಿಡಿಯೋ ಪ್ರಕರಣದ ತನಿಖೆಯಲ್ಲಿ ಭಾರತದಲ್ಲಿ ಮೊದಲ ಬಾರಿಗೆ ಟರ್ಕಿಯಲ್ಲಿ ಬಳಕೆಯಾಗುವ ‘ಅನಾಟೋಮಿಕಲ್ ಕಾಂಪಾರೀಷನ್ ಆಫ್ ಜನಿಟಲ್ ಫೀಚರ್ಸ್’ ಎಂಬ ಅತ್ಯಾಧುನಿಕ ತಂತ್ರಜ್ಞಾನವನ್ನು ವಿಶೇಷ ತನಿಖಾ ತಂಡ (ಎಸ್‌ಐಟಿ) ಬಳಸಿದೆ. ಈ ತಂತ್ರಜ್ಞಾನದ ಮೂಲಕ ವಿಡಿಯೋದಲ್ಲಿರುವ ವ್ಯಕ್ತಿಯ ಗುರುತನ್ನು ಖಚಿತಪಡಿಸಲಾಗಿದೆ, ಇದು ತನಿಖೆಯಲ್ಲಿ ಪ್ರಮುಖ ಅಂಶವಾಗಿದೆ ಎಂದು ಹೇಳಲಾಗಿದೆ.

ಕಾರ್ಯವಿಧಾನ ಹೇಗಿತ್ತು:

‘ಅನಾಟೋಮಿಕಲ್ ಕಾಂಪಾರೀಷನ್ ಆಫ್ ಜನಿಟಲ್ ಫೀಚರ್ಸ್’ ಎಂಬ ತಂತ್ರಜ್ಞಾನವು ವ್ಯಕ್ತಿಯ ಜನನೇಂದ್ರಿಯದ ಭೌತಿಕ ಲಕ್ಷಣಗಳನ್ನು ಆಧರಿಸಿ ಗುರುತನ್ನು ಪತ್ತೆಹಚ್ಚುವ ವಿಧಾನವಾಗಿದೆ. ಈ ತಂತ್ರಜ್ಞಾನವು ಫಿಂಗರ್‌ಪ್ರಿಂಟ್ ಗುರುತಿನ ರೀತಿಯಲ್ಲಿ ಕಾರ್ಯನಿರ್ವಹಿಸುತ್ತದೆ. ಆದರೆ ಇದು ಖಾಸಗಿ ಅಂಗಗಳ ರಚನೆಯನ್ನು ವಿಶ್ಲೇಷಿಸುತ್ತದೆ.

ಒಬ್ಬ ವ್ಯಕ್ತಿಯ ಜನನೇಂದ್ರಿಯದ ರಚನೆಯು ಇನ್ನೊಬ್ಬರಿಗಿಂತ ಭಿನ್ನವಾಗಿರುತ್ತದೆ. ಇದು ಈ ತಂತ್ರಜ್ಞಾನದ ವಿಶಿಷ್ಟತೆಯಾಗಿದೆ. ಈ ವಿಧಾನವನ್ನು ಟರ್ಕಿಯಲ್ಲಿ ಕೆಲವು ಕಾನೂನು ತನಿಖೆಗಳಲ್ಲಿ ಯಶಸ್ವಿಯಾಗಿ ಬಳಸಲಾಗಿದ್ದು, ಭಾರತದಲ್ಲಿ ಈಗ ಮೊದಲ ಬಾರಿಗೆ ಎಸ್‌ಐಟಿಯಿಂದ ಅಳವಡಿಸಲಾಗಿದೆ.

ಹೈ-ರೆಸಲ್ಯೂಶನ್:

ತನಿಖೆಯ ಸಂದರ್ಭದಲ್ಲಿ ವಿಡಿಯೋದಿಂದ ಸ್ಕ್ರೀನ್‌ಶಾಟ್‌ಗಳನ್ನು ತೆಗೆದುಕೊಂಡು ಅವುಗಳನ್ನು ಹೈ-ರೆಸಲ್ಯೂಶನ್ ಚಿತ್ರಗಳಾಗಿ ಪರಿವರ್ತಿಸಲಾಗುತ್ತದೆ. ನಂತರ, ಆರೋಪಿಯ ಖಾಸಗಿ ಅಂಗ, ಸೊಂಟ ಮತ್ತು ಕೈಯ ಫೋಟೋಗಳನ್ನು ಮೆಡಿಕಲ್ ಪ್ರಕ್ರಿಯೆಯ ಪ್ರಕಾರ ತೆಗೆದುಕೊಳ್ಳಲಾಗುತ್ತದೆ.

ಈ ಫೋಟೋಗಳನ್ನು ಚರ್ಮವೈದ್ಯರು (ಡರ್ಮಟಾಲಜಿಸ್ಟ್‌ಗಳು) ಮತ್ತು ಮೂತ್ರಶಾಸ್ತ್ರಜ್ಞರು (ಯೂರಾಲಜಿಸ್ಟ್‌ಗಳು) ಪರಿಶೀಲಿಸುತ್ತಾರೆ. ವಿಡಿಯೋದಿಂದ ಪಡೆದ ಚಿತ್ರವನ್ನು ಆರೋಪಿಯ ಫೋಟೋದೊಂದಿಗೆ ಹೋಲಿಕೆ ಮಾಡಲಾಗುತ್ತದೆ. ಒಂದು ಭಾಗವಾದರೂ ಹೊಂದಿಕೆಯಾದರೆ, ವಿಡಿಯೋದಲ್ಲಿರುವ ವ್ಯಕ್ತಿಯ ಗುರುತನ್ನು ಖಚಿತಪಡಿಸಲು ಸಾಕ್ಷಿಯಾಗಿ ಪರಿಗಣಿಸಲಾಗುತ್ತದೆ.