ಹೆಣ್ಣು ಉಳಿದರೆ ನಾಡು ಉಳಿದೀತು…!

ಪ್ರಕೃತಿ ಸಮತೋಲನ ಕಾಯ್ದುಕೊಳ್ಳಲು ಗಂಡು ಸಂತತಿಗಿಂತ ಹೆಣ್ಣು ಸಂತತಿಯ ಪ್ರಮಾಣವನ್ನು ಹೆಚ್ಚು ಸೃಷ್ಟಿಸಿರುತ್ತದೆ. ಏಕೆಂದರೆ ವಂಶಾಭಿವೃದ್ದಿ ಹೊಣೆ ಹೆಣ್ಣು ಜೀವದ ಮೇಲಿರುತ್ತದೆ. ಇದು ಎಲ್ಲ ಪ್ರಾಣಿ ಸಂತತಿಗೂ ಅನ್ವಯವಾಗುತ್ತದೆ. ಆರು ವರ್ಷದೊಳಗಿನ ಹೆಣ್ಣು ಮಕ್ಕಳ ಪ್ರಮಾಣ ವರ್ಷದಿಂದ ವರ್ಷಕ್ಕೆ ತೀವ್ರವಾಗಿ ಕುಸಿಯುತ್ತಿದ್ದು, ಕಳೆದ ಮೂರು ದಶಕಗಳ ಅವಧಿಯಲ್ಲಿ ಲೆಕ್ಕ ಕೈಗೆ ಸಿಗದಷ್ಟು ಹೆಣ್ಣುಮಕ್ಕಳ ಬದುಕನ್ನು ಹುಟ್ಟುವ ಮೊದಲೇ ಕಿತ್ತುಕೊಳ್ಳಲಾಗಿದೆ. ಹೆಣ್ಣು ಮಕ್ಕಳ ಮೇಲಿನ ಎಲ್ಲ ರೀತಿಯ ಲೈಂಗಿಕ ದೌರ್ಜನ್ಯ ಹೆಚ್ಚಳಕ್ಕೆ ಹೆಣ್ಣುಭ್ರೂಣ ಹತ್ಯೆಯೂ ಒಂದು ಮುಖ್ಯ ಕಾರಣ ಎಂದು ಸಮಾಜ ವಿಜ್ಞಾನಿಗಳು ಗುರುತಿಸಿದ್ದಾರೆ. ನಮ್ಮ ಹೈಕೋರ್ಟ್ ಮತ್ತು ಸುಪ್ರೀಂಕೋರ್ಟ್‌ಗಳು ಮತ್ತೆ ಮತ್ತೆ ಕಟುವಾಗಿ ಹೆಣ್ಣು ಭ್ರೂಣ ಹತ್ಯೆಯ ಹೆಚ್ಚಳ ಮತ್ತು ಅಸಮಾನ ಲಿಂಗಾನುಪಾತದ ಕುರಿತು ಎಚ್ಚರಿಸುತ್ತಲೇ ಇವೆ.

ಭಾರತೀಯ ಸಂಸ್ಕ ತಿಯಲ್ಲಿ ಮಹಿಳೆಯರಿಗೆ ವಿಶಿಷ್ಟ ಸ್ಥಾನ ಇದೆ. ವಿದ್ಯಾದೇವತೆ ಸರಸ್ವತಿ, ಧನಕನಕ ಕೊಡುವವಳು ಲಕ್ಷ್ಮೀ, ದುಷ್ಟರ ಸಂಹಾರ, ಶಿಷ್ಟರ ರಕ್ಷಣೆ ಮಾಡುವವಳು ದೇವಿ ಎನ್ನುವ ನಾವು ಸ್ತ್ರೀಯನ್ನು ಸರ್ವಶ್ರೇಷ್ಠ ಶಕ್ತಿಯನ್ನಾಗಿಸಿ ಹಾಡಿ ಹರಸಿವೆ. ತಾಯಿಗಿಂತ ಬಂಧುವಿಲ್ಲ, ಉಪ್ಪಿಗಿಂತ ರುಚಿಯಿಲ್ಲ ಎಂದು ವರ್ಣಿಸಿzವೆ. ಹೆಣ್ಣು ಅತ್ತಿಗೆಯಾಗಿ, ಸೋದರಿಯಾಗಿ, ಮಗಳಾಗಿ, ಮಡದಿಯಾಗಿ, ಅತ್ತೆಯಾಗಿ, ತಾಯಿಯಾಗಿ ಕುಟುಂಬದ ಅವಿಭಾಜ್ಯ ಅಂಗವಾಗಿದ್ದಾಳೆ. ಯತ್ರ ನಾರ್ಯಸ್ತು ಪೂಜ್ಯಂತೆ ರಮಂತೆ ತತ್ರ ದೇವತಾಃ ಎಂದು ಅಮೃತವಾಣಿಯಲ್ಲಿ ಮಹಿಳೆಯನ್ನು ವರ್ಣಿಸಿzವೆ. ಕವಿ ಪುಂಗವರಿಂದ ಶ್ಲೋಕಗಳನ್ನು ರಚಿಸಿ, ಪೂಜೆ ಮಾಡುವಾಗ ಉಚ್ಚರಿಸಿವೆ. ಆದರೆ, ವಾಸ್ತವದಲ್ಲಿ ಸ್ತ್ರೀ ಸ್ವಾತಂತ್ರ್ಯಮರ್ಹತಿ ಎಂಬ ಮನು ವಾಕ್ಯಕ್ಕೆ ಜೋತು ಬಿದ್ದು ಅವರನ್ನು ಪಂಜರದ ಪಕ್ಷಿಯಂತೆ ಬಂಧನದಲ್ಲಿಟ್ಟಿವೆ. ಅವರ ಹಂಬಲಗಳಿಗೆ ಕೆಸರು ಬಳಿದು ಕೊಳೆಯುವಂತೆ ಮಾಡಿವೆ.

ಹೆಣ್ಣು ಆಗೂದಕ್ಕಿಂತ ಮಣ್ಣು ಆಗೋದು ಲೇಸು
ಮಣ್ಣಿನ ಮ್ಯಾಲೊಂದು ಮರವಾಗಿ / ಬೆಳಿದರ
ಪುಣ್ಯವಂತರಿಗೆ ನೆರಳಾಗಿ

ಸಮಾಜದಲ್ಲಿ ಹೆಣ್ಣು ಅನುಭವಿಸಿದ ಯಾತನೆಯ ಪ್ರತಿಬಿಂಬ ಜಾನಪದ ತ್ರಿಪದಿಯಲ್ಲಿ ಹೊರಹೊಮ್ಮಿದ್ದು ಸ್ತ್ರೀ ಶೋಷಣೆಯನ್ನು ಸೂಚ್ಯವಾಗಿ ಸಾರುವ ಶಾಸನವಾಗಿದೆ.

ಹೆಣ್ಣು ಸೂಕ್ಷ್ಮ ಪ್ರಕೃತಿಯವಳು. ಅವಳ ಗರ್ಭಕೋಶದ ಆವರಣದಲ್ಲಿ ಆವಿಷ್ಕಾರಗೊಂಡ ಪಿಂಡದಲ್ಲಿಯ ಪೀಡೆಗಳನ್ನು ಪತ್ತೆ ಹಚ್ಚುವ, ರೋಗದ ಚಿಹ್ನೆಗಳು ಕಂಡುಬಂದರೆ ಭ್ರೂಣವನ್ನು ನಾಶ ಮಾಡಿ, ಮುಂದೆ ತಂದೆ-ತಾಯಿಗೆ ಒದಗಬಹುದಾದ ದುಃಖ-ದುಮ್ಮಾನ, ದುರಂತಗಳನ್ನು ದೂರ ಮಾಡುವ, ನೋವು ನಿರುಪಯೋಗಗಳ ನಿದ್ದೆ ಗುಂಗಿನ ಮುದ್ದೆಯಾದ ಮಕ್ಕಳು ಹುಟ್ಟುವುದನ್ನು ತಪ್ಪಿಸುವ ಉದ್ದೇಶದಿಂದ ಗರ್ಭಜಲ ಪರೀಕ್ಷೆ, ಕೋರಿಯಾನಿಕ್ ವಿಲ್ಲಸ್ ಬಯಾಪ್ಸಿ, ಅಲ್ಟ್ರಾ ಸೋನಾಗ್ರಾಫಿಯಂಥ ವಿಧಾನಗಳು ಜನ್ಮ ತಾಳಿದವು. ಈ ವಿಧಾನಗಳಿಂದ ಮಗುವಿನ ಭ್ರೂಣಾವಸ್ಥೆಯಲ್ಲೇ ಒಂದೆರಡಲ್ಲ ಸುಮಾರು ೭೦ ರೋಗಗಳನ್ನು ಪತ್ತೆ ಹಚ್ಚುವುದು ಸಾಧ್ಯವಾಗಿದೆ. ಈ ರೋಗಗಳಲ್ಲಿ ಕೆಲವು ಗಂಡು ಅಥವಾ ಹೆಣ್ಣು ಮಗುವಿಗಷ್ಟೇ ಸೀಮಿತವಾಗಿದ್ದರಿಂದ ಭ್ರೂಣಗಳ ಲಿಂಗಪತ್ತೆಯು ಅವಶ್ಯಕವಾಯಿತು.

ಹೀಗೆ ಒಂದು ವೈಜ್ಞಾನಿಕ ಪರೀಕ್ಷೆಯ ಅಂಗವಾಗಿ ಆರಂಭವಾದ ಲಿಂಗ ಪತ್ತೆಯ ವಿಧಾನ ಕಾಲಕ್ರಮೇಣ ಮೂಲೋದ್ದೇಶದಿಂದ ದೂರ ಬಹುದೂರ ಸಾಗಿ ಗರ್ಭದಲ್ಲೇ ಹೆಣ್ಣು ಭ್ರೂಣಗಳ ಕರುಳಿನ ಬಳ್ಳಿಯನ್ನು ಕತ್ತರಿಸುವ ಕತ್ತರಿ ಆಯಿತು. ಈ ವಿಧಾನಗಳಿಂದು ಅಪಾರವಾಗಿ ಅಪಬಳಕೆಗಳಾಗಿ ಹೆಣ್ಣು ಜೀವ ಕಣ್ಣು ಬಿಡುವ ಮೊದಲೇ ಮಣ್ಣುಗೂಡುವಂತೆ ಮಾಡುತ್ತಿವೆ. ಹೆಣ್ಣು ಸಂತಾನದ ಸಂಖ್ಯೆ ಗಮನಾರ್ಹವಾಗಿ ಕುಗ್ಗತೊಡಗಿತು. ಹೆಣ್ಣು ಗಂಡಿನ ಅಸಮತೋಲನಕ್ಕೆ ನಾಂದಿ ಹಾಡಿತು.

ಲಿಂಗ ಅಸಮಾನತೆ: ದೇಶದಲ್ಲಿ ಶಿಶುಲಿಂಗ ಅನುಪಾತ (೬ ವರ್ಷದವರೆಗೆ ವಯಸ್ಸಿನ ಮಕ್ಕಳ ಗುಂಪಿನಲ್ಲಿ ಪ್ರತಿ ೧೦೦೦ ಹುಡುಗರಿಗೆ ಹುಡುಗಿಯರ ಸಂಖ್ಯೆ ೨೦೦೧ ರಲ್ಲಿ ೯೨೭ ಇದ್ದು, ಅದು ೨೦೧೧ ರಲ್ಲಿ ೯೧೪ಕ್ಕೆ ಇಳಿಕೆಯಾಗಿದೆ.ಇದು ಸ್ವಾತಂತ್ರ್ಯಾ ನಂತರದ ಅತ್ಯಂತ ಕಡಿಮೆ ಅನುಪಾತವಾಗಿದೆ. ಮಿಜೋರಾಂ (೯೭೧) ಮತ್ತು ಮೇಘಾಲಯ (೯೭೦) ಅತಿ ಹೆಚ್ಚು ಲಿಂಗ ಅನುಪಾತ ಹೊಂದಿದ್ದರೆ, ಪಂಜಾಬ್ (೮೪೬) ಮತ್ತು ಹರ್ಯಾಣಾ (೮೩೦) ಅತ್ಯಂತ ಕಡಿಮೆ ಅನುಪಾತ ಹೊಂದಿವೆ. ಜಾಗತಿಕ ಆರ್ಥಿಕ ವೇದಿಕೆಯು ಇತ್ತೀಚೆಗೆ ಪ್ರಕಟಿಸಿರುವ ಲಿಂಗ ಸಂಬಂಧಿ ಅಸಮಾನತೆಯ ವರದಿಯಲ್ಲಿ ಭಾರತದ ಮಹಿಳೆಯರು ಅನುಭವಿಸುತ್ತಿರುವ ಬವಣೆಯ ಸ್ವರೂಪವನ್ನು ಚೆನ್ನಾಗಿ ಹಿಡಿದಿಡಲಾಗಿದೆ. ವಿಶ್ವದ ೧೨೮ ದೇಶಗಳ ಪೈಕಿ ಲಿಂಗ ಸಂಬಂಧಿ ಅಸಮಾನತೆಯಲ್ಲಿ ಭಾರತದ ಸ್ಥಾನ ೧೧೪ನೆಯದಾಗಿದೆ. ಇದು ಗೌರವ ತರುವ ಸಂಗತಿಯೇನಲ್ಲ.

ಕರ್ನಾಟಕದಲ್ಲಿ ೨೦೦೧ರ ಜನಗಣತಿ ಪ್ರಕಾರ ಜನಸಂಖ್ಯೆ ಪ್ರತಿ ಸಾವಿರ ಪುರುಷರಿಗೆ ಎದುರಾಗಿ ಮಹಿಳೆಯರ ಸಂಖ್ಯೆ ೯೬೩ ಇತ್ತು. ೨೦೧೧ರಲ್ಲಿ ೯೪೩ ಕ್ಕೆ ಇಳಿದಿದೆ. ‘ಕಡಿಮೆಯಾದ ಮಹಿಳೆಯರು’ ಎಂಬ ನುಡಿಗಟ್ಟನ್ನು ನೊಬೆಲ್ ಪುರಸ್ಕೃತ ಅರ್ಥಶಾಸ್ತ್ರಜ್ಞ ಅಮರ್ತ್ಯಸೇನ್ ಮೊದಲ ಬಾರಿಗೆ ತಮ್ಮ ಪ್ರಬಂಧದಲ್ಲಿ ಬಳಸಿದರು. ಸೇನ್ ಪ್ರಕಾರ, ಕಡಿಮೆಯಾದ ಮಹಿಳೆಯರನ್ನು ಮತ್ತೆ ಹುಡುಕುವುದು ಸಾಧ್ಯವಿಲ್ಲ. ಏಕೆಂದರೆ ಅವರು ಜೀವಂತ ಇರುವುದಿಲ್ಲ. ಹೆಣ್ಣು ಭ್ರೂಣ ಹತ್ಯೆಯ ಕಾರಣದಿಂದಾಗಿ ಇಂದು ಹೆಣ್ಣುಮಕ್ಕಳು ಹುಟ್ಟುವುದೇ ದುರ್ಲಭವಾಗುತ್ತಿದೆ. ಹುಟ್ಟುವ ಸ್ವಾತಂತ್ರ್ಯದಿಂದ ಅವರು ವಂಚಿತರಾಗಿದ್ದಾರೆ.

ಪ್ರಕೃತಿ ಸಮತೋಲನ ಕಾಯ್ದುಕೊಳ್ಳಲು ಗಂಡು ಸಂತತಿಗಿಂತ ಹೆಣ್ಣು ಸಂತತಿಯ ಪ್ರಮಾಣವನ್ನು ಹೆಚ್ಚು ಸೃಷ್ಟಿಸಿರುತ್ತದೆ. ಏಕೆಂದರೆ ವಂಶಾಭಿವೃದ್ದಿ ಹೊಣೆ ಹೆಣ್ಣು ಜೀವದ ಮೇಲಿರುತ್ತದೆ. ಇದು ಎಲ್ಲ ಪ್ರಾಣಿ ಸಂತತಿಗೂ ಅನ್ವಯವಾಗುತ್ತದೆ. ಆರು ವರ್ಷದೊಳಗಿನ ಹೆಣ್ಣು ಮಕ್ಕಳ ಪ್ರಮಾಣ ವರ್ಷದಿಂದ ವರ್ಷಕ್ಕೆ ತೀವ್ರವಾಗಿ ಕುಸಿಯುತ್ತಿದ್ದು, ಕಳೆದ ಮೂರು ದಶಕಗಳ ಅವಧಿಯಲ್ಲಿ ಲೆಕ್ಕ ಕೈಗೆ ಸಿಗದಷ್ಟು ಹೆಣ್ಣುಮಕ್ಕಳ ಬದುಕನ್ನು ಹುಟ್ಟುವ ಮೊದಲೇ ಕಿತ್ತುಕೊಳ್ಳಲಾಗಿದೆ.

ಹೆಣ್ಣು ಮಕ್ಕಳ ಮೇಲಿನ ಎಲ್ಲ ರೀತಿಯ ಲೈಂಗಿಕ ದೌರ್ಜನ್ಯ ಹೆಚ್ಚಳಕ್ಕೆ ಹೆಣ್ಣುಭ್ರೂಣ ಹತ್ಯೆಯೂ ಒಂದು ಮುಖ್ಯ ಕಾರಣ ಎಂದು ಸಮಾಜ ವಿಜ್ಞಾನಿಗಳು ಗುರುತಿಸಿದ್ದಾರೆ. ನಮ್ಮ ಹೈಕೋರ್ಟ್ ಮತ್ತು ಸುಪ್ರೀಂಕೋರ್ಟ್‌ಗಳು ಮತ್ತೆ ಮತ್ತೆ ಕಟುವಾಗಿ ಹೆಣ್ಣು ಭ್ರೂಣ ಹತ್ಯೆಯ ಹೆಚ್ಚಳ ಮತ್ತು ಅಸಮಾನ ಲಿಂಗಾನುಪಾತದ ಕುರಿತು ಎಚ್ಚರಿಸುತ್ತಲೇ ಇವೆ. ಹೆಣ್ಣು ಭ್ರೂಣ ಹತ್ಯೆ ಮಾನವ ಜನಾಂಗದ ಅತಿ ಕೆಟ್ಟ ಪದ್ಧತಿ ಎಂದು ಖಾರವಾಗಿ ಪ್ರತಿಕ್ರಿಯಿಸಿವೆ. ಕಾನೂನು ರಚನೆಯಾಗಿದ್ದರೂ ಅದರ ಪರಿಣಾಮಕಾರಿ ಅನುಷ್ಠಾನ ಆಗಿಲ್ಲ ಎಂದೂ ಪ್ರಶ್ನಿಸುತ್ತಿವೆ.

ಕಣ್ಮರೆಗೆ ಕಾರಣಗಳು: ಅಂದಿನವರು ಹೆಣ್ಣನ್ನು ಹೆಜ್ಜೆಹೆಜ್ಜೆಗೂ ಹೀಗಳೆದು, ಬೀಳುಗಳೆದರೆ ಅಷ್ಟೆಲ್ಲ ತಾಪತ್ರಯವೇ ಬೇಡವೆಂದು ಆಕೆಯನ್ನೇ ಇಲ್ಲವಾಗಿಸಿ ಬಿಡು ತ್ತಿದ್ದಾರೆ ಇಂದಿನವರು. ಇವರು ಅದೃಶ್ಯರಾಗಲು ಅವರ ಸ್ವಂತ ಅಪ್ಪ – ಅಮ್ಮ, ಅತ್ತೆ – ಮಾವ , ಅಜ್ಜ – ಅಜ್ಜಿ, ಗಂಡ ಕಾರಣಕರ್ತರೆಂಬುದನ್ನು ಕೇಳಿದಾಗ ಆಶ್ಚರ್ಯವೆನಿಸುತ್ತಿರಬೇಕಲ್ಲ. ಇತರ ಕಾರಣಗಳು -ಪುರುಷ ಶ್ರೇಷ್ಠತೆಯ ಮೌಲ್ಯ, ಗಂಡು ಬೇಕೆಂಬ ಹುಚ್ಚು , ಚಿಕ್ಕ ಚೊಕ್ಕ ಕುಟುಂಬದತ್ತ ಹೆಚ್ಚುತ್ತಿರುವ ಒಲವು, ಹೆಣ್ಣು ಹೊರೆ, ಗರ್ಭಪಾತವೇನು ಶಾಪವಲ್ಲ ಎಂಬ ಮನೋಭಾವ, ಕಟ್ಟುನಿಟ್ಟಿನ ಅನುಷ್ಠಾನ ಕಾನದ ಕಾನೂನು, ಸಾಮಾಜಿಕ ಜವಾಬ್ಧಾರಿ ಅರಿಯದ ವೈದ್ಯ, ವೈದ್ಯಕೀಯ ನೀತಿ ಸಂಹಿತೆಯನ್ನು ಉಲ್ಲಂಘಿಸಿ ಕೇವಲ ದುಡ್ಡಿನ ಆಸೆಗಾಗಿ ತಂತ್ರಜ್ಞಾನದ ದುರುಪಯೋಗ ಇತ್ಯಾದಿ.

ಪರಿಹಾರ: ಹೆಣ್ಣು ಮಗುವಿನ ಉಳಿವಿಗಾಗಿ, ಅಭಿವೃದ್ಧಿಗಾಗಿ ಸರಕಾರವು ಅನೇಕ ಕಾರ್ಯಕ್ರಮಗಳನ್ನು ಜಾರಿಗೊಳಿಸಿದೆ. ಭಾಗ್ಯ ಲಕ್ಷ್ಮಿ ಬಾಂಡ್, ಭೇಟಿ ಬಚಾವ್, ಭೇಟಿ ಪಡಾವೊ ಪ್ರಾರಂಭಿಸಿದೆ. ಹೆಣ್ಣು ಭ್ರೂಣ ಹತ್ಯೆಗೆ ಕಡಿವಾಣ ಹಾಕುವ ತಂತ್ರ (ನಿರ್ಬಂಧ ಮತ್ತು ದುರ್ಬಳಕೆ) ಕಾನೂನು ೧೯೯೪ ಅನ್ನು ೧.೧.೧೯೯೬ ರಿಂದ ಜಾರಿಗೆ ತಂದಿದೆ. ವಿಶ್ವ ಸಂಸ್ಥೆ ೧೯೭೫ -೭೬ರಿಂದ ಈವರೆಗೆ ಪ್ರತಿ ವರ್ಷ ಹೆಣ್ಣು ಮಕ್ಕಳ ವರ್ಷವನ್ನು ಆಚರಿಸುತ್ತ ಬಂದಿದೆಯಲ್ಲದೇ, ಸಾರ್ಕ್ ದೇಶಗಳೂ ಹೆಣ್ಣು ಮಗುವಿನ ವರ್ಷವನ್ನು ೧೯೯೦ ರಿಂದ ಆಚರಿಸುತ್ತ ಬಂದಿವೆ. ನಂತರ ಹೆಣ್ಣು ಮಗುವಿನ ದಶಕ ಎಂದು ಘೋಷಿಸಿ, ಹೆಣ್ಣಿನ ಸರ್ವಾಂಗೀಣ ಬದಲಾವಣೆಗಾಗಿ ಕಾರ್ಯಕಲಾಪಗಳನ್ನು ಹಾಕಿಕೊಂಡು ಕ್ರಾಂತಿಯ ಕಹಳೆ ಊದಿದೆ.

ಹೆಣ್ಣು ಮಕ್ಕಳ ಶಿಕ್ಷಣ, ಆರೋಗ್ಯ, ಲಾಲನೆ – ಪಾಲನೆ, ವೃತ್ತಿ ತರಬೇತಿ ಹಲವು ಹತ್ತು ಸಮಸ್ಯೆಗಳ ಬಗ್ಗೆ ದೆಹಲಿಯಲ್ಲಿ ಹಮ್ಮಿಕೊಂಡ ‘ಹೆಣ್ಣು ಮಗು ಕಮ್ಮಟದಲ್ಲಿ’ ವಿವರವಾಗಿ ಚರ್ಚಿಸಿದೆ. ಹೆಣ್ಣು ಭ್ರೂಣ ಹತ್ಯೆಯೂ ಸೇರಿದಂತೆ ಹೆಣ್ಣಿನ ಎಲ್ಲ ಥರದ ಶೋಷಣೆಗೂ ಕೇವಲ ಸರಕಾರದ ಕಾನೂನೊಂದೇ ಪರಿಹಾರವಾಗಲಾರದು. ಸಮಾಜ, ಸಂಘ ಸಂಸ್ಥೆಗಳೂ ಇದರಲ್ಲಿ ಭಾಗವಹಿಸಬೇಕು. ಜನಜಾಗೃತಿಯನ್ನು ಮೂಡಿಸಬೇಕು. ಸಾಮಾಜಿಕ ಸಹಾಯ ಸಿಕ್ಕಾಗ ಸಮಸ್ಯೆ ಪರಿಹರಿಸುವುದು ಸುಲಭ. ಕಾಯಿದೆ ಇಡೀ ಹೋರಾಟದ ಒಂದು ಭಾಗ ಮಾತ್ರ. ಇಡೀ ಸಂಸ್ಕೃತಿಯೇ ಈ ರೂಢಿಯ ತಳಪಾಯವಾಗಿರುವಾಗ ಕೇವಲ ಕಾನೂನಿನಿಂದ ಅದನ್ನು ಹೋಗಲಾಡಿಸುವುದು ಅಸಾಧ್ಯ.

ಲಭ್ಯವಿರುವ ಎಲ್ಲಾ ಮಾಧ್ಯಮಗಳ ಸೌಲಭ್ಯಗಳನ್ನು ಸಮರ್ಪಕವಾಗಿ ಬಳಸಿ ಹೆಣ್ಣು ಮಗುವಿನ ಉಳಿವಿಗಾಗಿ ಬಲವಾದ ಜನಾಭಿಪ್ರಾಯಗಳನ್ನು ನಿರ್ಮಿಸಿ ಒಂದು ವ್ಯಾಪಕ ಚಳುವಳಿಯನ್ನೇ ತಯಾರು ಮಾಡಬೇಕು. ಜನ ಸೇರುವ ಜಾಗದಲ್ಲಿ  ಪರಿಣಾಮಕಾರಿ ಪೋಸ್ಟರುಗಳನ್ನು ಹಚ್ಚಬೇಕು. ಸ್ತ್ರೀಯರ ಶೋಷಣೆಯ ವಿರುದ್ಧ, ವಿಜ್ಞಾನದ ದುರುಪಯೋಗದ ವಿರುದ್ಧ , ವೈದ್ಯಕೀಯ ವೃತ್ತಿಯ ವ್ಯಾಪಾರೀಕರಣದ ವಿರುದ್ಧ…ಹೀಗೆ ನಮ್ಮ ಹೋರಾಟ ಹಲವು ಮಟ್ಟದಲ್ಲಿ , ಹಲವು ವಿಧಗಳಲ್ಲಿ ನಡೆದಾಗ ಮಾತ್ರ ಹೆಣ್ಣು ಮಗು ಉಳಿದೀತು !

-ಡಾ.ಕರವೀರಪ್ರಭು ಕ್ಯಾಲಕೊಂಡ,  ವಿಶ್ರಾಂತ ಜಿಲ್ಲಾ ಶಸ್ತ್ರ ಚಿಕಿತ್ಸಕರು
ಕ್ಯಾಲಕೊಂಡ ಆಸ್ಪತ್ರೆ, ಬಾದಾಮಿ
ಮೊ : ೯೪೪೮೦೩೬೨೦೭.