ಸಿಎಂ ಫಡ್ನವೀಸ್ ಕರೆದ ಸಭೆಗೆ ಶಿಂಧೆ ಗೈರು: ‘ಮಹಾ’ ಬಿರುಕು

ಮುಂಬೈ: ಮಹಾರಾಷ್ಟ್ರ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್ ಕರೆದಿದ್ದ ಸಭೆಗೆ ಉಪಮುಖ್ಯಮಂತ್ರಿ ಏಕನಾಥ್ ಶಿಂಧೆ ಮತ್ತೆ ಗೈರು ಹಾಜರಾಗಿದ್ದಾರೆ.

ಉನ್ನತ ಹುದ್ದೆಯನ್ನು ನಿರಾಕರಿಸಿದ ಬಗ್ಗೆ ಶಿವಸೇನೆ ಮುಖ್ಯಸ್ಥ ಶಿಂಧೆ ಇನ್ನೂ ಅಸಮಾಧಾನಗೊಂಡಿದ್ದಾರೆ ಮತ್ತು ಪೋಷಕ ಮಂತ್ರಿಗಳ ನೇಮಕದ ಬಗ್ಗೆಯೂ ಭಿನ್ನಾಭಿಪ್ರಾಯವಿದೆ ಎಂಬ ಊಹಾಪೋಹಗಳ ಮಧ್ಯೆ ಈ ಬೆಳವಣಿಗೆ ಬಂದಿದೆ.

ಸೋಮವಾರ, ತಮ್ಮ ವಸತಿ ಇಲಾಖೆಗೆ ಸಂಬಂಧಿಸಿದ ಯೋಜನೆ ಸೇರಿದಂತೆ ಪ್ರಮುಖ ಯೋಜನೆಗಳ ಬಗ್ಗೆ ಚರ್ಚಿಸಲು ಫಡ್ನವೀಸ್ ಕರೆದ ಸಭೆಗೆ ಶಿಂಧೆ ಹಾಜರಾಗಿರಲಿಲ್ಲ. ಶಿಂಧೆ ಅವರನ್ನು ರಾಜ್ಯ ಸಚಿವ ಯೋಗೇಶ್ ಕದಮ್ ಪ್ರತಿನಿಧಿಸಿದ್ದರು. ಕಳೆದ ವಾರ ಶಿಂಧೆ ಕೂಡ ಕ್ಯಾಬಿನೆಟ್ ಸಭೆಗೆ ಗೈರು ಹಾಜರಾಗಿದ್ದರು.

ಈ ಬೆಳವಣಿಗೆಯು ಮುಖ್ಯಮಂತ್ರಿ ಮತ್ತು ಅವರ ಉಪ ಮುಖ್ಯಮಂತ್ರಿ ನಡುವೆ ಎಲ್ಲವೂ ಸರಿಯಿಲ್ಲ ಎಂಬ ವದಂತಿಗೆ ಮತ್ತಷ್ಟು ತುಪ್ಪ ಸುರಿದಿದೆ. ಆದಾಗ್ಯೂ, ಶಿವಸೇನೆ ಸಂಸದ ನರೇಶ್ ಮಾಸ್ಕೆ ಅವರು ಶಿಂಧೆ ಅವರ ಕುಟುಂಬ ಸದಸ್ಯರೊಬ್ಬರು ಅನಾರೋಗ್ಯಕ್ಕೆ ಒಳಗಾದ ಕಾರಣ ಸಭೆಯಲ್ಲಿ ಭಾಗವಹಿಸಲಿಲ್ಲ ಎಂದು ಹೇಳಿದರು.

“ಏಕನಾಥ್ ಶಿಂಧೆ ಅವರ ಮನೆಯಲ್ಲಿ ಯಾರೋ ಅನಾರೋಗ್ಯದಿಂದ ಬಳಲುತ್ತಿದ್ದರು, ಆದ್ದರಿಂದ ಅವರು ಹೋಗಲಿಲ್ಲ. ಉದ್ಧವ್ ಠಾಕ್ರೆ ಶಿಬಿರವು ಸುಳ್ಳು ಪ್ರಚಾರವನ್ನು ಹರಡುತ್ತಲೇ ಇದೆ” ಎಂದು ಮಾಸ್ಕೆ ಹೇಳಿದರು.

ಆಡಳಿತಾರೂಢ ಮಹಾಯುತಿ ಮೈತ್ರಿಕೂಟದ ಭಾಗವಾಗಿರುವ ಅಜತ್ ಪವಾರ್ ಅವರ ಎನ್ಸಿಪಿ ಕೂಡ ಈ ಬೆಳವಣಿಗೆಯ ಬಗ್ಗೆ ಮೌನವಹಿಸಿದೆ. “ಅವರು (ಶಿಂಧೆ) ಸಭೆಗೆ ಏಕೆ ಬರಲಿಲ್ಲ ಎಂದು ನಮಗೆ ಹೇಗೆ ತಿಳಿಯುತ್ತದೆ? ಒಂದು ವೇಳೆ ಸಭೆ ನಡೆದಿದ್ದರೆ ಮತ್ತು ಅವರು ಬರದಿದ್ದರೆ, ಏಕೆ ಬರಲಿಲ್ಲ ಎಂದು ಅವರನ್ನೇ ಕೇಳಿ” ಎಂದು ಛಗನ್ ಭುಜ್ಬಲ್ ಹೇಳಿದರು.

ಉದ್ಧವ್ ಬಣವು ಈ ವಿಷಯದ ಬಗ್ಗೆ ಆಡಳಿತಾರೂಢ ಮೈತ್ರಿಕೂಟವನ್ನು ತರಾಟೆಗೆ ತೆಗೆದುಕೊಂಡಿದ್ದು, ಇದು ಮಹಾರಾಷ್ಟ್ರದ ಪ್ರಗತಿಗೆ ಹೊಡೆತ ನೀಡಿದೆ ಎಂದು ಹೇಳಿದರು. ಶಿಂಧೆಗೆ ಇದು ಬೇಕಾಗಿತ್ತಿ. ಈಗ ಅವರಿಗೆ ಬಿಜೆಪಿ ಎಂದರೇನು ಎಂದು ತಿಳಿಯಲಿದೆ ಎಂದು ಶಿವಸೇನೆ ಸಂಸದ ಅರವಿಂದ್ ಸಾವಂತ್ ಹೇಳಿದ್ದಾರೆ.

ಪ್ರಿಯಾಂಕಾ ಚತುರ್ವೇದಿ ತಮ್ಮ ಟೀಕೆಯಲ್ಲಿ ಹೆಚ್ಚು ಕಟುವಾಗಿದ್ದರು. “ಕೆಲವೊಮ್ಮೆ ಶಿಂಧೆ ಅಸಮಾಧಾನಗೊಳ್ಳುತ್ತಾರೆ, ಕೆಲವೊಮ್ಮೆ ಅವರು ಹಳ್ಳಿಗೆ ಹೋಗುತ್ತಾರೆ. ಅವರಿಬ್ಬರೂ (ಶಿಂಧೆ ಮತ್ತು ಫಡ್ನವೀಸ್) ಪರಸ್ಪರ ಹೊಂದಿಕೊಳ್ಳುತ್ತಿಲ್ಲ. ಅವರ ನಡುವೆ ಜಗಳದಿಂದಾಗಿ ಸಾರ್ವಜನಿಕರಿಗೆ ನೀಡಿದ ಭರವಸೆಗಳನ್ನು ಮುರಿಯಲಾಗುತ್ತಿದೆ ಎಂದು ಶಿವಸೇನೆ (ಯುಬಿಟಿ) ರಾಜ್ಯಸಭಾ ಸಂಸದೆ ಹೇಳಿದರು.