Read E-paper
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಜಾರಿಗೆ ತಂದಿದ್ದ ವಿವಾದಾತ್ಮಕ “ವಿಮೋಚನಾ ದಿನದ ಸುಂಕ ನೀತಿ” ಕಾನೂನುಬಾಹಿರ ಎಂದು ಅಮೆರಿಕದ ಅಂತರರಾಷ್ಟ್ರೀಯ ವ್ಯಾಪಾರ ನ್ಯಾಯಾಲಯವು ತೀರ್ಪು ನೀಡಿದೆ.
ಇದರಿಂದ ಟ್ರಂಪ್ ಆಡಳಿತವು ಕೆಲವು ರಾಷ್ಟ್ರಗಳ ಆಮದುಗಳ ಮೇಲೆ ವಿಧಿಸಿದ್ದ ಹೆಚ್ಚುವರಿ ಸುಂಕಗಳು ಅಸಿಂಧುವಾಗಿದ್ದು, ಆಮದುದಾರರಿಗೆ ಕೋಟ್ಯಂತರ ಡಾಲರ್‌ಗಳ ಮರುಪಾವತಿಗೆ ದಾರಿ ಮಾಡಿಕೊಡುವುದು ಎನ್ನಲಾಗಿದೆ.
ಕಳೆದ ಜನವರಿಯಲ್ಲಿ ಟ್ರಂಪ್ ಉಕ್ಕು ಮತ್ತು ಅಲ್ಯೂಮಿನಿಯಂನ ಕೆಲವು ಉತ್ಪನ್ನಗಳ ಮೇಲೆ ಹೆಚ್ಚುವರಿ ಸುಂಕಗಳನ್ನು ವಿಧಿಸಿದ್ದರು. ಇದು ಮೂಲ ಉಕ್ಕು ಮತ್ತು ಅಲ್ಯೂಮಿನಿಯಂ ಆಮದು ಮೇಲೆ ವಿಧಿಸಲಾಗಿದ್ದ ಸುಂಕಗಳ ಮುಂದುವರಿಕೆಯಾಗಿತ್ತು. ರಾಷ್ಟ್ರೀಯ ಭದ್ರತೆಯ ಹಿತದೃಷ್ಟಿಯಿಂದ ಈ ಸುಂಕಗಳು ಅಗತ್ಯವೆಂದು ಟ್ರಂಪ್ ಆಡಳಿತವು ಸಮರ್ಥಿಸಿಕೊಂಡಿತ್ತು. ಈ ಸುಂಕಗಳನ್ನು “ವಿಮೋಚನಾ ದಿನದ ಸುಂಕಗಳು” ಎಂದು ಡೊನಲ್ಡ್‌ ಟ್ರಂಪ್ ಕರೆದಿದ್ದರು.
ಅಮೆರಿಕದ ಅಂತಾರಾಷ್ಟ್ರೀಯ ವ್ಯಾಪಾರ ನ್ಯಾಯಾಲಯವು ತನ್ನ ತೀರ್ಪಿನಲ್ಲಿ, ಅಧ್ಯಕ್ಷರು ಈ ಸುಂಕಗಳನ್ನು ವಿಧಿಸುವ ಮೂಲಕ ತಮ್ಮ ಅಧಿಕಾರ ವ್ಯಾಪ್ತಿಯನ್ನು ಮೀರಿದ್ದಾರೆ ಎಂದು ಸ್ಪಷ್ಟಪಡಿಸಿದೆ. 1962ರ ವ್ಯಾಪಾರ ವಿಸ್ತರಣಾ ಕಾಯ್ದೆಯನ್ನು ಉಲ್ಲೇಖಿಸಿರುವ ನ್ಯಾಯಾಲಯ, “ಟ್ರಂಪ್ ಅವರು ಉಕ್ಕು ಮತ್ತು ಅಲ್ಯೂಮಿನಿಯಂ ಉತ್ಪನ್ನಗಳ ಮೇಲಿನ ಸುಂಕಗಳನ್ನು ಶಾಸನಬದ್ಧ ಗಡುವನ್ನು ಮೀರಿ ವಿಧಿಸಿದ್ದಾರೆ” ಎಂದು ಅಭಿಪ್ರಾಯಪಟ್ಟಿದೆ. “ಮೂಲ ಸೆಕ್ಷನ್ 232 ತನಿಖೆಯು ಕಚ್ಚಾ ಉಕ್ಕು ಮತ್ತು ಅಲ್ಯೂಮಿನಿಯಂ ಆಮದುಗಳ ಮೇಲೆ ಕೇಂದ್ರೀಕೃತವಾಗಿತ್ತು. ಉತ್ಪನ್ನಗಳ ಮೇಲೆ ಪ್ರತ್ಯೇಕವಾಗಿ ಮತ್ತು ಸಮಯೋಚಿತವಾಗಿ ತನಿಖೆ ನಡೆಸದೆ ಸುಂಕ ವಿಧಿಸಿದ್ದು ಸರಿಯಲ್ಲ” ಎಂದು ನ್ಯಾಯಾಲಯ ಹೇಳಿದೆ.
ಈ ಕಾನೂನುಬಾಹಿರ ಸುಂಕಗಳನ್ನು ಪಾವತಿಸಿದ ಅಮೆರಿಕದ ಆಮದುದಾರರು, ಈಗ ತಾವು ಪಾವತಿಸಿದ ಹೆಚ್ಚುವರಿ ಹಣವನ್ನು ಮರಳಿ ಪಡೆಯುವ ಸಾಧ್ಯತೆ ಇದೆ. ರಾಷ್ಟ್ರೀಯ ಭದ್ರತೆಯ ಹೆಸರಿನಲ್ಲಿ ಅಧ್ಯಕ್ಷರು ಕೈಗೊಳ್ಳುವ ವ್ಯಾಪಾರ ಕ್ರಮಗಳ ಮೇಲೆ, ನ್ಯಾಯಾಂಗ ವ್ಯವಸ್ಥೆಯು ಪರಿಶೀಲನೆ ನಡೆಸಬಹುದು ಮತ್ತು ಅಧಿಕಾರ ದುರುಪಯೋಗವಾದಲ್ಲಿ ಅದನ್ನು ತಡೆಯಬಹುದು ಎಂಬುದನ್ನು ಈ ತೀರ್ಪು ಹೇಳುತ್ತದೆ.
ಟ್ರಂಪ್ ಆಡಳಿತವು ಚೀನಾ ಸೇರಿದಂತೆ ಹಲವು ದೇಶಗಳಿಂದ ಬರುವ ಸರಕುಗಳ ಮೇಲೆ ಸುಂಕಗಳನ್ನು ಹೇರಿತ್ತು, ಇದು ಜಾಗತಿಕವಾಗಿ ವ್ಯಾಪಾರ ಸಮರಕ್ಕೆ ಕಾರಣವಾಗಿತ್ತು. ಪಹಲ್ಗಾಮ್‌ನಲ್ಲಿ ಭಯೋತ್ಪಾದಕರು ನಡೆಸಿದ ದಾಳಿಯ ನಂತರ ಭಾರತ ಮತ್ತು ಪಾಕಿಸ್ತಾನ ದೇಶಗಳ ಸಂಭಾವ್ಯ ಯುದ್ಧವನ್ನು ತಪ್ಪಿಸಲು ಮತ್ತು ಕದನ ವಿರಾಮ ಮಧ್ಯಸ್ಥಿಕೆ ವಹಿಸಲು ಡೊನಾಲ್ಡ್ ಟ್ರಂಪ್ ತಮ್ಮ ಸುಂಕದ ಅಧಿಕಾರವನ್ನು ಬಳಸಿದ್ದಾರೆ ಎಂದು ಅಧಿಕಾರಿಗಳು ವಾದಿಸಿದರು. ಆದರೆ ಈ ವಾದವನ್ನು ತಳ್ಳಿಹಾಕಿದ ಅಂತಾರಾಷ್ಟ್ರೀಯ ವ್ಯಾಪಾರ ನ್ಯಾಯಾಲಯ, ಭಾರತ-ಪಾಕಿಸ್ತಾನ ಕದನ ವಿರಾಮ ಒಪ್ಪಂದದ ಕ್ರೆಡಿಟ್‌ನ್ನು ತೆಗೆದುಕೊಳ್ಳುವುದು ಬೇಡ ಎಂದು ಡೊನಾಲ್ಡ್ ಟ್ರಂಪ್ ಆಡಳಿತಕ್ಕೆ ನಿರ್ದೇಶಿಸಿದೆ.
