ಚೀನಾ ವಾಸ್ತವಿಕ ನಿಯಂತ್ರಣ ರೇಖೆಯ ಸನಿಹ ಭೂತಾನ್‌ನಲ್ಲಿ ಭಾರತ ರಸ್ತೆ ನಿರ್ಮಾಣ

ಭಾರತವು ಚೀನಾದೊಂದಿಗಿನ ವಾಸ್ತವಿಕ ನಿಯಂತ್ರಣ ರೇಖೆಯ ಸನಿಹದಲ್ಲಿ ಸೈನಿಕರ ಸಂಚಾರವನ್ನು ಸುಗಮಗೊಳಿಸಲು ರಸ್ತೆಯೊಂದನ್ನು ನಿರ್ಮಾಣ ಮಾಡುತ್ತಿದೆ.

2017ರಲ್ಲಿ ಭಾರತ ಮತ್ತು ಚೀನಾ ನಡುವೆ ಡೋಕ್ಲಾಮ್‌ನಲ್ಲಿ ಘರ್ಷಣೆ ನಡೆದ ಸ್ಥಳದ ಬಳಿ ಭೂತಾನ್‌ನಲ್ಲಿ ರಸ್ತೆಯೊಂದನ್ನು ನಿರ್ಮಿಸಲಾಗಿದೆ. ಈ ರಸ್ತೆಯು ಡೋಕ್ಲಾಮ್‌ನಿಂದ ಸುಮಾರು 21 ಕಿಲೋ ಮೀಟರ್ ದೂರದಲ್ಲಿರುವ ಭೂತಾನ್‌ನ ಹಾ ಕಣಿವೆಯನ್ನು ಸಂಪರ್ಕಿಸುತ್ತದೆ.

ಗಡಿ ರಸ್ತೆ ಸಂಸ್ಥೆ (ಬಿಆರ್‌ಒ) ಸುಮಾರು 254 ಕೋಟಿ ರೂಪಾಯಿ ವೆಚ್ಚದಲ್ಲಿ ಈ ರಸ್ತೆಯನ್ನು ನಿರ್ಮಿಸಿದೆ. ಭೂತಾನ್‌ನ ಪ್ರಧಾನ ಮಂತ್ರಿ ತೊಬೈ ಶೆರಿಂಗ್ ಶುಕ್ರವಾರ ಈ ರಸ್ತೆಯನ್ನು ಉದ್ಘಾಟಿಸಿದರು. ಈ ರಸ್ತೆಯು ಭೂತಾನ್‌ನ ಸ್ಥಳೀಯ ಜನರಿಗೆ ಸಂಚಾರ ಸೌಲಭ್ಯವನ್ನು ಒದಗಿಸುವುದರ ಜತೆಗೆ ಅಗತ್ಯವಿದ್ದರೆ ಭದ್ರತಾ ಪಡೆಗಳ ಚಲನೆಯನ್ನು ಸುಗಮಗೊಳಿಸುತ್ತದೆ.

ಈ ರಸ್ತೆಯು ಟಿಬೆಟ್ ಸ್ವಾಯತ್ತ ಪ್ರದೇಶದ ಚುಂಬಿ ಕಣಿವೆಗೆ ತಲುಪುತ್ತದೆ. ಅಲ್ಲಿ ಚೀನಾದ ಸೈನಿಕರು ನಿಯೋಜನೆಗೊಂಡಿದ್ದಾರೆ. ಈ ರಸ್ತೆಯಿಂದ ಭೂತಾನ್ ಸೇನೆಗೆ ಚುಂಬಿ ಕಣಿವೆಯ ಗಡಿಗೆ ತಲುಪಲು ಮತ್ತು ಸರಬರಾಜು ಸಾಗಣೆಗೆ ಸಹಾಯವಾಗಲಿದೆ. ಭೂತಾನ್‌ಗೆ ಈಗ ಈ ರಸ್ತೆಯ ಲಾಭವಾದರೂ, ಭವಿಷ್ಯದಲ್ಲಿ ಭಾರತಕ್ಕೂ ಇದರಿಂದ ಪ್ರಯೋಜನವಾಗಲಿದೆ.