ಪ್ರೀತಿಸಿ ಮದುವೆ ಆಗಿದ್ದ ಅನ್ಯ ಕೋಮಿನ ಪತ್ನಿಯನ್ನೇ ಕೊಂದ ಪತಿ!

ಚಿಕ್ಕಬಳ್ಳಾಪುರ: ಸಮಾಜದ ವಿರೋಧದ ನಡುವೆಯೂ ಅನ್ಯ ಕೋಮಿನ ಯುವತಿಯನ್ನು ಪ್ರೀತಿಸಿ ಮದುವೆ ಆಗಿದ್ದ ಚಾಲಕ ಆಕೆಯ ಶೀಲವನ್ನು ಶಂಕಿಸಿ ಕೊಲೆ ಮಾಡಿದ ಘಟನೆ ಚಿಕ್ಕಬಳ್ಳಾಪುರದಲ್ಲಿ ನಡೆದಿದೆ.

ಚಿಕ್ಕಬಳ್ಳಾಪುರ ಜಿಲ್ಲೆಯ ಚೇಳೂರು ತಾಲೂಕಿನ ಗೆರಿಗೆರೆಡ್ಡಿಪಾಳ್ಯ ಅಲಿಯಾಸ್ ಪಾತೂರಿನ ನಿವಾಸಿ  ಡ್ರೈವರ್ ಆಗಿದ್ದ ಬಾಲು ಎಂಬಾತ ಅದೇ ಗ್ರಾಮದ ಅನ್ಯಕೋಮಿನ ದಿಲ್ಷಾತ್‌ಳನ್ನ ಕೊಲೆ ಮಾಡಿ ಜೈಲು ಸೇರಿದ್ದು, ಇಬ್ಬರು ಮಕ್ಕಳು ಅನಾಥವಾಗಿವೆ.

4 ವರ್ಷ ಹಿಂದೆ ಪ್ರೀತಿಸಿ ಪೋಷಕರ ವಿರೋಧದ ನಡುವೆಯೂ ದಿಲ್ಷಾತ್ ಳನ್ನು ಮದುವೆ ಆಗಿದ್ದ ಬಾಲು ನಂತರ ಕವಿತಾ ಅಂತ ಹೆಸರು ಬದಲಿಸಿದ್ದರು. ದಂಪತಿಗೆ ಎರಡು ಹೆಣ್ಣು ಮಕ್ಕಳಿವೆ.

ಇತ್ತೀಚೆಗೆ ಬಾಲುಗೆ ಹೆಂಡತಿ ದಿಲ್ಷಾತ್ ಅಲಿಯಾಸ್ ಕವಿತಾಳೆ ಮೇಲೆ ಅನುಮಾನ ಶುರುವಾಗಿತ್ತು. ಯಾರ ಜೊತೆಯೋ ಹೆಂಡತಿ ಸಲುಗೆಯಿಂದ ಇದ್ದಾಳೆ. ಫೋನಲ್ಲಿ ಮಾತನಾಡುತ್ತಿದ್ದಾಳೆ ಅಂತ ಪದೇ ಪದೇ ಜಗಳ, ಇದೇ ವಿಚಾರದಲ್ಲಿ ನಡೆದ ಜಗಳಲ್ಲಿ ಪ್ರೀತಿಸಿ ವರಿಸಿದವಳನ್ನೇ ಬಾಲು ಕೊಲೆ ಮಾಡಿದ್ದಾನೆ.

ಕೆಲಸಕ್ಕೆ ಹೋಗಿ ಮನೆಗೆ ಬಂದಿದ್ದ ಹೆಂಡ್ತಿ ಜೊತೆಗೆ ಬಾಲು ಜಗಳ ಶುರು ಮಾಡಿದ್ದ, ನೀನು ಯಾರ ಜೊತೆಯಲ್ಲೋ ಮಾತನಾಡ್ತಿದ್ದೀಯಾ? ಅಂತಾ ಜಗಳ ಶುರು ಮಾಡಿದ್ದ. ಇದೇ ವಿಚಾರಕ್ಕೆ ಇಬ್ಬರ ನಡುವೆ ಗಲಾಟೆಯಾಗಿ ತಾರಕಕ್ಕೇರಿತ್ತು.

ಈ ವೇಳೆ ಮನೆಯಲ್ಲಿದ್ದ ರಾಡ್ ನಿಂದ ಹೆಂಡತಿ ತಲೆಗೆ ಬಲವಾಗಿ ಹೊಡೆದಿದ್ದು, ಆಕೆಗೆ ತೀವ್ರ ರಕ್ತಸ್ರಾವವಾಗಿದೆ. ಕೊನೆಗೆ ಬಾಲು ಆಸ್ಪತ್ರೆಗೆ ಕರೆದೊಯ್ಯುವಷ್ಟರಲ್ಲಿ ದಿಲ್ಷಾತ್ ಮೃತಪಟ್ಟಿದ್ದಾಳೆ.

ಚೇಳೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಆರೋಪಿ ಬಾಲು ಬಂಧನ ಮಾಡಲಾಗಿದೆ.