Read E-paper
ಪುಣೆಯಲ್ಲಿ ನಕಲಿ ಅರೆಸ್ಟ್ ವಾರಂಟ್ ನೀಡಿದ ಸೈಬರ್ ವಂಚಕರು ಮಹಿಳೆಯ ಬ್ಯಾಂಕ್ ಖಾತೆಯಿಂದ 99 ಲಕ್ಷ ರೂ. ದೋಚಿದ್ದಾರೆ. ಖದೀಮರು ಸರ್ಕಾರಿ ದಾಖಲೆಗಳನ್ನು ಸೃಷ್ಟಿಸಿ 62 ವರ್ಷದ ಮಹಿಳೆಯನ್ನು ಹೆದರಿಸಿ ಆನ್ಲೈನ್ನಲ್ಲೇ ಹಣ ವಂಚಿಸಿದ್ದಾರೆ. ಮಹಿಳೆಯು ಪುಣೆಯ ಕೊತ್ರುಡ್ ನಿವಾಸಿಯಾಗಿದ್ದು, ನಿವೃತ್ತ ಎಲ್ಐಸಿ ಅಧಿಕಾರಿ.
ಸೈಬರ್ ಸಿಟಿ ಸೈಬರ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಪೊಲೀಸರು ನೀಡಿರುವ ಮಾಹಿತಿ ಪ್ರಕಾರ, ಡಾಟಾ ಪ್ರೊಟೆಕ್ಷನ್ ಏಜೆನ್ಸಿ ಕಡೆಯವನೆಂದು ಹೇಳಿಕೊಂಡ ವ್ಯಕ್ತಿಯೊಬ್ಬ ಮಹಿಳೆಯನ್ನು ಸಂಪರ್ಕಿಸುತ್ತಾನೆ. ಆಕೆಯ ಮೊಬೈಲ್ ನಂಬರ್ ಅಕ್ರಮ ವಹಿವಾಟುಗಳಿಗೆ ದುರ್ಬಳಕೆಯಾಗಿದೆ ಎಂದು ಹೆದರಿಸಿದ್ದಾನೆ. ಮಹಿಳೆಗೆ ಫೋನ್ನಲ್ಲೇ ಪೊಲೀಸ್ ಅಧಿಕಾರಿ ಎನ್ನಲಾದ ಜಾರ್ಜ್ ಮ್ಯಾಥ್ಯೂ ಎಂಬಾತನನ್ನು ಪರಿಚಯಿಸುತ್ತಾನೆ. ಆ ನಕಲಿ ಪೊಲೀಸ್ ಅಧಿಕಾರಿಯು, ಮಹಿಳೆಯಿಂದ ಅಕ್ರಮ ಹಣ ವರ್ಗಾವಣೆ ಆಗಿದೆ ಎಂದು ಆರೋಪಿಸಿ, ಬ್ಯಾಂಕ್ ಖಾತೆಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗುವುದು ಎಂದು ಎಚ್ಚರಿಸುತ್ತಾನೆ.
ವಂಚಕರು ಮಹಿಳೆ ವಿರುದ್ಧ ಒಂದು ನಕಲಿ ಅರೆಸ್ಟ್ ವಾರಂಟ್ ದಾಖಲೆ ಸೃಷ್ಟಿಸಿ ಮೊಬೈಲ್ ನಂಬರ್ಗೆ ಕಳುಹಿಸಿದ್ದಾರೆ. ಆ ದಾಖಲೆಯಲ್ಲಿ ನಿರ್ಮಲಾ ಸೀತಾರಾಮನ್ ನಕಲಿ ಹಸ್ತಾಕ್ಷರ ಇರುತ್ತದೆ. ಸರ್ಕಾರ ಅಧಿಕೃತ ಮುದ್ರೆ ರೀತಿಯ ಸೀಲ್ ಹಾಕಿರುತ್ತದೆ.
ಮಹಿಳೆಗೆ ವಯಸ್ಸಾಗಿರುವುದರಿಂದ ಡಿಜಿಟಲ್ ಅರೆಸ್ಟ್ ಮಾಡಲಾಗುವುದು. ದೂರದಿಂದಲೇ ನಿಗಾ ಇರಿಸಲಾಗುವುದು ಎಂದು ಹೇಳುವ ವಂಚಕರು, ಎಲ್ಲಾ ಬ್ಯಾಂಕ್ ಖಾತೆಗಳ ಪರಿಶೀಲನೆ ಆಗಬೇಕಿರುವುದರಿಂದ, ಅದನ್ನು ಆರ್ಬಿಐ ಅಕೌಂಟ್ಗಳಿಗೆ ವರ್ಗಾಯಿಸಬೇಕೆಂದು ತಿಳಿಸುತ್ತಾರೆ. ನಂಬಿದ ಮಹಿಳೆ ತನ್ನಲ್ಲಿರುವ 99 ಲಕ್ಷ ರೂ. ಹಣವನ್ನು ವಂಚಕರು ತಿಳಿಸುವ ಬ್ಯಾಂಕ್ ಅಕೌಂಟ್ಗಳಿಗೆ ವರ್ಗಾವಣೆ ಮಾಡುತ್ತಾರೆ. ಸರ್ಕಾರಿ ಸಂಸ್ಥೆಗಳ ಹೆಸರಿನಲ್ಲಿ ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಮಹಿಳೆಗೆ ಕಳುಹಿಸಿ ಹೆದರಿಸುತಾರೆ.
ಮಹಿಳೆಯಿಂದ 99 ಲಕ್ಷ ರೂ. ಬಂದ ಬಳಿಕ ವಂಚಕರು ಸಂಪರ್ಕ ನಂಬರ್ಗಳನ್ನು ಸ್ವಿಚ್ ಆಫ್ ಮಾಡಿಕೊಳ್ಳುತ್ತಾರೆ. ಆಗ ಮಹಿಳೆಗೆ ಅನುಮಾನ ಬರುತ್ತದೆ. ಪುಣೆ ಸೈಬರ್ ಪೊಲೀಸ್ ಠಾಣೆಯಲ್ಲಿ ಮಹಿಳೆ ದೂರು ದಾಖಲಿಸಿದ್ದಾರೆ.
