ಮತ್ತ ಕಟು ಹಿಂದುತ್ವದತ್ತ ಉದ್ಧವ್ ಶಿವಸೇನೆ

ಮುಂಬೈ: ವಿಧಾನಸಭಾ ಚುನಾವಣಾ ಫಲಿತಾಂಶಗಳು ಶಿವಸೇನೆಯಲ್ಲಿ (ಯುಬಿಟಿ) ಬದಲಾವಣೆಯ ಪ್ರಕ್ರಿಯೆಯನ್ನು ಪ್ರಚೋದಿಸಿವೆ.

ಉದ್ಧವ್ ಠಾಕ್ರೆ ತಮ್ಮ ಸಂಘಟನೆಯನ್ನು ಕಟ್ಟರ್ ಹಿಂದುತ್ವ ಸಂಘಟನೆಯಾಗಿ ಮರುರೂಪಿಸಲು ಮುಂದಾಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ.

“ಏಕ್ ಹೈ ತೋ ಸೇಫ್ ಹೈ”, “ಕಾಟೆಂಗೆ ತೋ ಬಟೆಂಗೆ” ವೋಟ್ ಜಿಹಾದ್ ಮುಂತಾದ ಘೋಷಣೆಗಳು ಚನಾವಣೆಯಲ್ಲಿ ಮಹಾಯುತಿಯ ಗೆಲುವಿಗೆ ಸಹಾಯ ಮಾಡಿದ ವರದಿಗಳ ಹಿನ್ನೆಲೆಯಲ್ಲಿ ಮೂಲ ಶಿವಸೇನೆಯು ಆತ್ಮಾವಲೋಕನಕ್ಕೆ ಮುಂದಾಗಿದೆ.

ಇತ್ತೀಚಿನ ಸಭೆಯಲ್ಲಿ, ಉದ್ಧವ್ ತಮ್ಮ ಪಕ್ಷದ ಕಾರ್ಯಕರ್ತರನ್ನು ಪ್ರತಿ ಮನೆಗೂ ಹಿಂದುತ್ವದ ಸಂದೇಶವನ್ನು ಹರಡಲು ಮತ್ತು ಏಕಾಂಗಿಯಾಗಿ ಹೋರಾಡಲು ಸಿದ್ಧರಾಗುವಂತೆ ಒತ್ತಾಯಿಸಿದ್ದು, ಈ ಮರುಚಿಂತನೆಯ ಭಾಗವೇ ಆಗಿದೆ.

ಚನಾವಣೆಯ ನಂತರ, ಕಾಂಗ್ರೆಸ್ ಜೊತೆಗಿನ ಶಿವಸೇನೆ (ಯುಬಿಟಿ) ಸಂಬಂಧವೂ ಹಳಸಿದೆ. ಎಂವಿಎ ಉಳಿಯುತ್ತದೆಯೇ ಎಂಬುದು ಮುಂಬರುವ ನಾಗರಿಕ ಸಂಸ್ಥೆ ಚುನಾವಣೆಯ ಫಲಿತಾಂಶವನ್ನು ಆಧರಿಸಿದೆ.

ಉದ್ಧವ್ ಠಾಕ್ರೆ ಅವರ ಪಕ್ಷವು ಈಗ ತನ್ನನ್ನು ಕಟ್ಟರ್ ಹಿಂದುತ್ವ ಪಕ್ಷವಾಗಿ ಮರುಸ್ಥಾಪನೆ ಮಾಡಲು ಪ್ರಯತ್ನಿಸುತ್ತಿದ್ದರೂ, ಅದು ೨೦೦೩ಕ್ಕಿಂತ ಹಿಂದಿನ ತನ್ನ ಓಜಸ್ಸನ್ನು ಮರಳಿ ಪಡೆಯಬಹುದೇ ಎಂಬ ಪ್ರಶ್ನೆ ಉಳಿದಿದೆ.

ಉದ್ಧವ್ ಠಾಕ್ರೆ ಅವರ ವಿಶ್ವಾಸಾರ್ಹ ನಾಯಕ ನರ್ವೇಕರ್ ಅವರು ಬಾಬರಿ ಮಸೀದಿಯನ್ನು ಕೆಡವಿದವರನ್ನು ಶ್ಲಾಘಿಸಿ ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಿದ್ದು, ಎಂವಿಎಯೊಳಗೆ ಬಿರುಕುಗಳಿಗೆ ಕಾರಣವಾಗಿದೆ.

ಸಮಾಜವಾದಿ ಪಕ್ಷದ ಮಹಾರಾಷ್ಟ್ರ ಮುಖ್ಯಸ್ಥ ಅಬು ಅಜ್ಮಿ ವಿವಾದಾತ್ಮಕ ಪೋಸ್ಟ್ ನಂತರ ಮೈತ್ರಿಯಿಂದ ಹಿಂದೆ ಸರಿಯುವ ಸುಳಿವು ನೀಡಿದ್ದಾರೆ.

ಉದ್ಧವ್ ಠಾಕ್ರೆ ಅವರ ಶಿವಸೇನೆ ಇನ್ನು ಮುಂದೆ ಹಿಂದುತ್ವವಾದಿ ಪಕ್ಷವಲ್ಲ, ಬದಲಿಗೆ ಕಾಂಗ್ರೆಸ್ ಮತ್ತು ಎನ್‌ಸಿಪಿಯಂತೆಯೇ ಮುಸ್ಲಿಂ ತುಷ್ಟೀಕರಣದಲ್ಲಿ ತೊಡಗಿರುವ ಪಕ್ಷವಾಗಿದೆ ಎಂಬ ನಿರೂಪಣೆಯನ್ನು ಬಿಜೆಪಿ ಮತ್ತು ಶಿಂಧೆಸೇನೆ ನಿರ್ಮಿಸಿದೆ.

ಮುಸ್ಲಿಮರೊಂದಿಗೆ ಉದ್ಧವ್ ಅವರ ಹೊಸ ಬಾಂಧವ್ಯ ಲೋಕಸಭೆ ಮತ್ತು ವಿಧಾನಸಭಾ ಚುನಾವಣೆಯಲ್ಲಿ ಸ್ಥಾನಗಳನ್ನು ಪಡೆಯಲು ಸಹಾಯ ಮಾಡಿತು. ಕಠಿಣ ನಿಲುವನ್ನು ಅಳವಡಿಸಿಕೊಳ್ಳುವ ಮೂಲಕ ಮುಸ್ಲಿಂ ಬೆಂಬಲವನ್ನು ಕಳೆದುಕೊಳ್ಳುವ ಅಪಾಯವಿದೆ ಎಂಬ ವಾದವೂ ಕೇಳಿಬರುತ್ತಿದೆ.

ಒಟ್ಟಿನಲ್ಲಿ ಈ ಚುನಾವಣೆ ಉದ್ಧವ್ ಪಾಲಿಗೆ ಮಹತ್ವದ ತಿರುವು ನೀಡಲಿರುವುದಂತೂ ಸ್ಪಷ್ಟ ಎಂದು ಮೂಲಗಳು ಹೇಳಿವೆ.