GBA ನಿಂದ ಮನೆ ಮುಂದೆ ಕಸ ಸುರಿಯೋ‌ ಅಭಿಯಾನ

ರಸ್ತೆ ಬದಿ ಕಸ ಎಸೆಯುವವರ ಮನೆ ಮುಂದೆ ಕಸ ಸುರಿದು ಜಾಗೃತಿ ಮೂಡಿಸಲು GBA ಮುಂದಾಗಿದ್ದು, ರಸ್ತೆ ಬದಿಯಲ್ಲಿ ಕದ್ದು ಕಸ ಎಸೆದು ಹೋಗುವವರ ವೀಡಿಯೊ ಚಿತ್ರೀಕರಿಸಿರುವ ಮಾರ್ಷಲ್‌ಗಳು ಅದೇ ವ್ಯಕ್ತಿಗಳ‌ ಮನೆ ಮುಂದೆ ಕಸ ಸುರಿದು ಜಾಗೃತಿ ಹುಟ್ಟು ಹಾಕುವ ಪ್ರಯತ್ನ ನಡೆಸಿದ್ದಾರೆ. ದಂಡ ಕೂಡ ವಸೂಲಿ ಮಾಡಿದ್ದಾರೆ.

ಗಂಗಾನಗರದ ವ್ಯಕ್ತಿಯ ಮನೆ ಮುಂದೆ ಜಿಬಿಎ ಕಸ ಸುರಿದಿದೆ. ಆ ಮನೆಯ ದಂಪತಿ ಬೆಳಗ್ಗೆ ಕಸ ತಂದು ರಸ್ತೆ ಬದಿ ಹಾಕಿದ್ದಾರೆ. ಮಾರ್ಷಲ್ಸ್ ರಹಸ್ಯವಾಗಿ ವೀಡಿಯೊ ಮಾಡಿ ಕಸ ಹಾಕಿದವರ ಮನೆಗೆ ಹೋಗಿ ಪ್ರಶ್ನಿಸಿದ್ದಾರೆ. ತಾನು ಮಾಡಿಲ್ಲ ಎಂದು ವಾದಿಸಿದ ಮಹಿಳೆಗೆ ವೀಡಿಯೊ ತೋರಿಸಿ ಆಕೆಯ ಮನೆ ಮುಂದೆ ಕಸ ಸುರಿದಿದ್ದಾರೆ.

218 ಮನೆಗಳ ಮುಂದೆ ಜಿಬಿಎ ಅಧಿಕಾರಿಗಳು ಕಸ ಸುರಿದು ಒಂದೇ ದಿನ 2.80 ಲಕ್ಷ ರೂಪಾಯಿ ದಂಡ ವಸೂಲಿ ಮಾಡಿದ್ದಾರೆ. ಬೆಂಗಳೂರು ಘನತ್ಯಾಜ್ಯ ಅಭಿಯಾನದ ಭಾಗವಾಗಿ ರಸ್ತೆಯಲ್ಲಿ ಕಸ ಬಿಸಾಕುವ ವ್ಯಕ್ತಿ ಮನೆ ಮುಂದೆ ಪೌರಕಾರ್ಮಿಕರು ಕಸ ಸುರಿಯಲಿದ್ದಾರೆ. ಆ ಮನೆಯವರು ದಂಡ ವಿಧಿಸಿದ ‌ನಂತರ ಖುದ್ದು ಜಿಬಿಎಯಿಂದಲೇ ಕಸ ತೆರವು ಆಗಲಿದೆ. 1000 ರೂಪಾಯಿ ಯಿಂದ 10 ಸಾವಿರ ರೂಪಾಯಿವರೆಗೂ BSWML ದಂಡ ವಿಧಿಸುವುದು.

ಒಟ್ಟು 190 ವಾರ್ಡ್ ಗಳಲ್ಲಿ ಪ್ರತಿ ವಾರ್ಡ್ ಒಂದು ಮನೆಯಂತೆ 190 ಮನೆಗಳ ಮುಂದೆ ಕಸ ಸುರಿದು ಜಾಗೃತಿ ಅಭಿಯಾನ ನಡೆಸಲಾಗುತ್ತದೆ.